Þegar þetta fer í loftið eru sléttar 5 klst. þar til Febrúarflugur 2019 hefjast formlega. Ég þekki einn aðila sem bíður spenntur eftir því að setja fyrstu fluguna sína inn á Fésbókarhópinn á slaginu 00:01 í kvöld. Þetta er að vísu ég sjálfur, en ég viðurkenni að ég er er virkilega spenntur. Það hefur verið þannig frá því ég fékk þá hugmynd árið 2014 að draga hnýtara Íslands betur fram í dagsljósið, þó ekki nema einn mánuð ársins, að ég hef sífellt orðið meira og meira hissa á þeim undirtektum og athygli sem þetta átak hefur fengið ár hvert.

Frá upphafi hafa mörg fyrirtæki stutt við bakið á þessu átaki og við höfum þegar kynnt hér 7 aðila sem styðja átakið þetta árið. Nú kynnum við tvo aðila til viðbótar sem styðja okkur og það eru Flugubúllan og Vesturröst sem báðir hafa stutt við átakið með ráðum og dáð á umliðnum árum. Þar með eru það níu aðilar sem leggja átakinu lið að þessu sinni með ýmsu móti.

Líkt og endranær munu allir styrkir renna til heppinna fulltrúa þeirra sem setja flugur inn á Fésbókarhópinn í febrúar.

Nú stendur undirbúningur Febrúarflugna 2019 sem hæst. Þótt þetta sé sára einfaldur viðburður í eðli sínu, þá er að ýmsu að hyggja í undirbúningi, meðal annars að útvega styrktaraðila og setja saman dagskrá fyrir hnýtingarkvöldin sem að venju verða fjögur í mánuðinum.

Sem endranær höfum við ekki verið í vandræðum með styrktaraðila og nú þegar hafa 7 fyrirtæki og félagasamtök staðfest þátttöku sína og munu styrkja átakið myndarlega. Þeir sem hafa staðfest stuðning sinn nú þegar eru; Ármenn, Árvík, JOAKIM’S, Mistur.is, Veiða.is, Veiðihornið og Veiðikortið. Á meðal þessara aðila eru tveir nýir styrktaraðilar og bjóðum við þá velkomna í hópinn. Hafir þú lesandi góður, áhuga á að styrkja þetta átak er þér bent á að senda okkur tölvupóst á fos(hjá)fos.is eða skilaboð hér á síðunni. Það er ekki seinna vænna að leggja sitt að mörkum því allir styrktaraðilar verða auglýstir rækilega hér á FOS.IS og í Facebook hópinum Febrúarflugur og það eru ekki nema fjórir dagar þar til átakið hefst formlega.

Eins og áður segir þá eru áformuð fern hnýtingarkvöld í febrúar þar sem gestum og gangandi er boðið í Árósa, félagsheimili Ármanna, Dugguvogi 13 frá kl. 20:00 – 22:00. Á liðnum árum hefur oft á tíðum skapast hin skemmtilegasta stemming á þessum hnýtingarkvöldum og reynt hefur verið að höfða jafnt til reyndra sem óreyndra hnýtara. Margir nýliðar í sportinu hafa gripið þetta tækifæri til að prófa hnýtingar og nýtt sér auðfengna aðstoð reyndari hnýtara við þau fyrstu skref.

Tveir aðrir viðburðir eru á döfinni í febrúar, en dagskrá þeirra er enn ekki að fullu frágengin. Allar nánari upplýsingar um viðburðinn þetta árið, sem og fyrri ára, má nálgast hér á síðunni og auðvitað á Fésbókarhópinum þar sem þungi átaksins fer fram eins og venjulega.

Vatn vikunnar er Ónýtavatn í Veiðivötnum. Allar upplýsingar um vatnið má nálgast með því að smella á myndina hér að neðan.

Á sama tíma, í næstu viku, kemur hér enn eitt vatnið á síðuna og það er þessu ekkert síðra, jafnvel fremra. Missið ekki af því.

Eitthvað verður vatn vikunnar að heita og hvers vegna ekki Ónefndavatn? Allar upplýsingar um vatnið má finna með því að smella á myndina hér að neðan.

Að viku liðinni kemur auðvitað enn eitt vatnið, það er nú ekki ónýtt.

Vatn vikunnar er eitt af minni vötnum Veiðivatnasvæðisins, Nýrað. Þótt vatnið renni oft saman við nágranna sinn, Rauðagíg, þá fær það nú samt að fljóta hér með undir eigin nafni. Allar upplýsingar um vatnið má nálgast með því að smella á myndina hér að neðan.

Á sama tíma í næstu viku er kominn enn einn föstudagurinn og það þýðir aðeins eitt, þá kemur enn eitt vatnið fram á síðunni.

Eins og glöggir veiðimenn hafa tekið eftir, þá brást Veiðikortið ekki væntingum og kom út fyrir síðustu jól. Ef að líkum lætur þá eru flestir búnir að blaða í gegnum veglegan bækling kortsins og kynna sér þær breytingar sem hafa orðið frá fyrra ári.

Nýtt vatn á kortinu er Hreðavatn í Norðurárdal ásamt Hólmavatni og Laxárvatni í Dölum sem koma nú aftur inn á kortið eftir smá fjarveru. Meðalfellsvatn í Kjós sem kom aftur inn á kortið s.l. sumar eftir örstutta fjarveru er nú formlega komið aftur inn, eflaust mörgum til ánægju. Verði kortsins er að venju stillt í hóf og kostar það aðeins 7.900,- kr. sem gera 232,35 kr. á vatn sé farið í öll 34 vötnin sem bjóðast, þó ekki nema einu sinni hvert þeirra.

Þau vötn sem hverfa (enn og aftur) af kortinu eru vötnin í Svínadal en þar að auki hverfur Hítarvatn nú af kortinu eftir að hafa verið með frá upphafi.

Upplýsingar um mörg þeirra vatna sem eru á kortinu má einnig finna hér á síðunni:

Upplýsingar um öll vötnin á Veiðikortinu má finna á heimasíðu kortsins og í bæklingi þess sem aðgengilegur er á netinu og auðvitað einnig hér á síðunni með öðrum merkum vefritum.