Hnýtt í tímaþröng

Það eru ekki allir sem hafa ótakmarkaðan eða nægan tíma til þess að fylla á boxin sín í vetur. Því miður geta óþarfa hlutir og athafnir sem tengjast veiði ekki nokkurn skapaðan hlut stolið af þér tímanum sem annars færi í að fylla á boxin. Það eru til ýmsar leiðir til að flýta fyrir því að ná að fylla á boxin, sumar góðar og gildar á meðan aðrar eru beinlínis bara kjánalegar.

Byrjum á kjánalegu leiðunum, fyrst þeirri sem ég leyfi mér að úthluta þeim vafasama heiðri að vera sérlega kjánaleg; slepptu því bara að hnýta og keyptu áfyllingu á boxið þitt. Einmitt, og missa af öllu gamninu? Ég segi nú ekki meir.

Önnur kjánaleg leið sem útvöldum veiðimönnum stendur til boða er aðeins kjánaleg að hálfu leiti; fáðu góðan vin til að hnýta fyrir þig. Þessi leið er aðeins kjánaleg fyrir annan/annað ykkar, þig. Sá sem hnýtir fyrir þig græðir alla ánægjuna og fær ómælda útrás fyrir sköpunargleðina á meðan þú getur bara notið þess að raða flugunum í boxið þitt þegar þær eru tilbúnar. Ill skárri kjánakosturinn ef þú átt ekki eina einustu stund aflögu til að hnýta sjálfur.

En það eru til nokkrar raunhæfar leiðir til að flýta aðeins fyrir áfyllingu fluguboxanna. Fyrst skal telja öruggu leiðina. Hún fellst í því að velja þér flugur sem þú þekkir vel, hefur hnýtt áður og hefur þokkalegt vald á að hnýta. Með öðrum orðum, nærð upp ágætum hraða og afkastar einhverjum tugum stykkja á góðu kvöldi í stað þess að eyða helmingi tímanns í að skoða uppskriftir að nýjum flugum eins og þeim sem finna má á þessari síðu.

Svo má líka stytta sér leið, sleppa einhverjum smáatriðum í flugunni sem taka óþarflega langan tíma. Þótt flugan sé ekki alveg 100% eins og höfundur hennar hefur ætlað henni, þá er alls ekki þar með sagt að hún veiði neitt síður. Stundum er einfaldara líka miklu betra. Ef þú trúir mér ekki, prófaðu að skera aðeins niður í hráefninu, sleppa þessu erfiða og stytta þér jafnvel leið með því að nota tilbúið búkefni í stað þess að vefja hverju laginu á fætur öðru til að ná ákveðnu þvermáli eða útliti.

Að herma eftir Henry Ford er líka góð leið til að auka afkastagetuna í hnýtingum, búðu til færiband. Þetta er kannski einfaldasta leiðin til að spara tíma, en mér finnst hún ekkert endilega skemmtileg. Þessi leið fellst í því að taka til það hráefni sem þú þarft í allar þær flugur sem þú ætlar að hnýta af ákveðinni tegund og raða á borðið. Svo kemur að partinum sem mér finnst svo leiðinlegur; byrjaðu á því að setja kúlu á alla krókana sem þú ert búinn að taka til. Næst þekur þú hvern krókinn á fætur öðrum með hnýtingarþræði og festir niður skottið. Þar næst tekur þú dub efnið eða burstann og festir niður við skottið á öllum flugunum. Þá fyrst er komið að því að taka búkefnið, festa það niður og vefja fram að kúlunni, hverja fluguna á fætur annarri. Og þannig heldur þú áfram þar til þú ert kominn með allar flugurnar tilbúnar, alltaf sama handbragðið þangað til þær eru allar tilbúnar á svo til sama tíma. Einhverra hluta vegna finnst mér alltaf skemmtilegra að setja fullbúna fluguna í svampinn eða korktappann áður en ég byrja á þeirri næstu.

Svo er það reyndar þetta með þörfina á fjölda flugna, stundum er hún svolítið heimatilbúin og aðeins til í kollinum á mér. Það hefur alveg komið fyrir að ég hef hnýtt einfaldaðar útgáfur af flugu og þá aðeins í takmörkuðu upplagi til að prófa. Að vera með einfalda flugu í farteskinu sem virkar, það gefur alveg færi á að vera með einmitt hráefnið í hana í hnýtingartöskunni og taka hana með sér í veiðiferðina. Þá getur maður smellt í þær flugur sem vantar á örskotsstund, næstum sama hvar maður er.

Burton

Þessa flugu hef ég oft og iðulega séð skráða fyrir fjölda fiska í Hlíðarvatni í Selvogi. Veiðimaðurinn er nær alltaf sá sami, en ég veit fyrir víst að þessi fluga er gjöful víða enda hönnuð eftir fyrirmynd sem fengin er beint upp úr maga ný veiddrar bleikju. Ólyginn sagði mér að þessi fluga hefði t.d. fært höfundi hennar, Hafsteini Björgvinssyni einar 600 bleikjur á tveimur sumrum úr Elliðavatni, þaðan sem flugan á ættir að rekja.

Flugunni hefur skotið upp kollinum í nokkrum útfærslum í gegnum árin og uppskrift hennar hefur verið nokkuð á reiki hjá þeim sem ég hef spurt um. Sumir nota ullargarn, aðrir árórugarn og enn aðrir nota einfaldlega grófan hnýtingarþráð og láta þar við sitja. Höfundur flugunnar, Hafsteinn Björgvinsson, lét hafa eftir sér hér um árið eitthvað á þá leið að efniviðurinn í fluguna væri aðallega eitthvert járnarusl, spotti og einhver hár.

Alveg sama hvernig hnýtarar fara að því að hnýta Burton og hvort hann er bústinn eða mjór, þá er eins víst að hann veiðir vel í stærðum #10, #12 og #14.

Höfundur: Hafsteinn Björgvinssin
Þráður: Svartur að eigin vali + garn ef vill
Öngull: Legglangur votfluguöngull
Vöf: Silfurvír
Kinnar: Hvítar stíffanir

Burton a’la FOS.IS

Vatnsglas

Það er gott ráð að vera með kalt vatn í glasi á hnýtingarborðinu, svo lengi sem það fær að standa þar í friði. Örlítið vatn á fingurgómana kemur sér ágætlega til að ná betur utan um hnýtingarefnið, forma marabou fjaðrir og lagfæra bilaðar fjaðrir. Svo virkar vatnið ágætlega til að afrafmagna tinsel og flash strimla þannig að þeir hætti að krullast upp, bara væta fingurna og renna efninu á milli tveggja fingra.

Langskeggur

Langskeggur er ein þeirra flugna sem ber nafn með réttu. Skegg flugunnar er langt, mjög langt og vel umfram það sem öll púpu- og votflugufræði segja hnýturum. En það hefur alls ekki komið niður á veiðni þessarar flugu, nema síður sé. Frá því Örn Hjálmarsson kom fram með þessa flugu hefur hún fært veiðimönnum ómælanlegar ánægjustundir á bakkanum.

Lengi vel veigraði ég mér við að hnýta þessa flugu, því eins og myndirnar bera með sér þá virðist ég ekki alveg ná því glæsilega, en jafnfram óvenjulega útliti flugunnar sem mörgum öðrum er gefið. Þessi hlédrægni mín við fluguna vék sumarið 2019 þegar ég horfði lengi vel á tifandi skordýr í Hraunsfirðinum sem var eins og snýtt út úr nös Langskeggs, eða öfugt. Ég nagaði mig heldur betur í hnýtingarhendina þegar ég sá umrætt kvikindi og einsetti mér að láta slag standa og setja í nokkrar flugur.

Mælt er með að eiga þessa flugur í stærðum #12 og #14 sem lætur nokkuð nærri stærð þess kvikindis sem ég sá í Hraunsfirðinum.

Höfundur: Örn Hjálmarsson
Öngull: 2XL votfluguöngull
Þráður: Svartur 8/0
Vöf: Koparvír
Bolur og frambolur: svart árórugarn
Vængstæði: dökkbrúnt flos eða Body Stretch
Skegg: Svört hanafjöður

Fréttir af Febrúarflugum

Febrúarflugur halda ótrauðar áfram og í vikunni sem leið náðust tveir merkilegir áfangar; meðlimir í hópinum Febrúarflugur á Facebook fóru yfir 500 og fjöldi flugna sem hnýtarar hafa sett inn á hópinn fóru yfir 700. Við höfum reynt að halda í við þennan fjölda og vorum rétt í þessu að uppfæra myndasafnið hér á síðunni með öllum flugunum sem komið hafa fram þetta árið.

Staðan kl.11:15 22.02.2020

 

Aftur á Akureyri

Fyrir hálfum mánuði efndi Stangaveiðifélag Akureyrar til hnýtingarkvölds í Zontahúsinu. Félagar SVAK eru ekki af baki dottnir og tvíelfdir mæta þeir aftur til leiks í Febrúarflugum, þriðjudaginn 25. febrúar og efna til annars hnýtingakvölds. Ný dagsetning, sami staður, sami tími.

Vitaskuld verða græjur á staðnum, heitt á könnunni og landsfrægir hnýtarar SVAK verða á staðnum og leiðbeina þeim sem þess óska. Enn eitt frábært tækifærið fyrir byrjendur og þá sem vilja rifja upp gamla takta að eiga góða kvöldstund yfir hnýtingarþvingunum fyrir norðan.

Félagar SVAK munið að merkja flugurnar ykkar í Febrúarflugum með #SVAK.

Takið kvöldið frá og munið að það eru viðburðir í tengslum við Febrúarflugur í hverri viku mánaðarins.

Hise‘s Hetero-Genius

Höfundur þessarar flugu, Dave Hise, segir hana tilvalda leitarflugu, þ.e. flugu til að kanna hvort einhver fiskur leynist í vatninu. Sumir hafa sagt þessa flugu vera bræðing af Royal Wulff og Pheasant Tail sem má til sannsvegar færa m.v. útlitið. Appelsínuguli liturinn í flugunni er alveg vís með að kveikja vel í fiski.

Þessi fluga varð töluvert vinsæl undir lok síðustu aldar, seldist vel og náði töluverðri útbreiðslu, en lítið farið fyrir henni í umfjöllun á vefsíðum hin síðari ári, hverju sem það kann nú að sæta.

Það skal tekið fram að meðfylgjandi mynd af flugunni er fenginn að láni (með samþykki) frá Dave Hise, sjálfur hef ég ekki enn hnýtt þessa flugu.

Höfundur: Dave Hise
Öngull: Púpukrókur 10 – 16
Þráður: Hot Orange 6/0
Skott og vængstæði: Fasanafjöður
Vöf: Koparvír
Thorax: Peacock (brún frekar en græn)
Kragi: Svart dub (t.d. Hareline Ice Dub)
Haus: gull

Hise‘s Carp Nasty

Enn heldur leit mín að flugum sem hnýttar eru úr föðrum Hringfasana áfram. Þessi árlega leit mín leiddi mig á slóðir Dave Hise að þess sinni, en fyrri leit mín hefur m.a. leitt mig á slóðir  Mrs. Simpson. Þó þessi fluga beri nafn sem vísar á vatnakarfa, þá fullyrðir Dave að hann hafi veitt vartara, barra og fengrana á hana, en ekki bleikju eða urriða, ekki einu sinni regnbogasilung. Það gæti því orðið spennandi að prófa þessa flugu í okkar íslensku ferskvatnsfiskum.

Carp Nasty er nokkuð þekkt fluga í Bandaríkjunum og til í ótal útgáfum. Líkt og með margar aðrar flugur sem menn eiga við, þá ættleiða hinir ýmsu hnýtarar þær með því að bæta ættarnafni sínu við heiti þeirra, þannig er því farið með þessa útgáfu en myndbandið hér að neðan er ekki nákvæmlega sama flugan.

Það skal tekið fram að meðfylgjandi mynd af flugunni er fenginn að láni (með samþykki) frá Dave Hise, sjálfur hef ég ekki enn náð að hnýta þessa flugu svo vel útlítandi sé.

Höfundur: Dave Hise
Öngull: Votflugukrókur 8 – 12 / Grubber 8 – 12
Augu: Keilur eða vaskakeðja
Vöf: Koparvír
Fætur: Silly legs
Kragi/hringvaf: Fjöður úr hringfasana
Skott: Fjaðrir úr hringfasana

Fréttir af Febrúarflugum

Á hádegi í dag, 16. febrúar voru flugurnar í Febrúarflugum orðnar 583. Svo margar flugur hafa aldrei áður komið fram og meðlimum hópsins á Facebook fer enn fjölgandi, eru nú 492. Auk þess fylgist ótrúlegur fjöldi með Febrúarflugum á FOS.IS, þar hafa daglegar heimsóknir farið upp í 1.626 og lang flestir koma við á síðunni sem geymir myndir af þeim flugum sem lagðar hafa verið fram þetta árið, sjá hérna.

Það er ýmislegt sem hnýtarar og gestir á síðunni eru að velta fyrir sér og send fyrirspurnir á mig um. Hér eru nokkrar spurningar sem komið hafa upp ásamt svörum:

Er hægt að finna myndir frá fyrsta árinu (2014) einhvers staðar?

Svar: Nei, því miður er það ekki lengur hægt, það ár voru Febrúarflugur sem lokaður viðburður á Facebook og því miður er þann viðburð ekki lengur að finna á vefnum.

Hvað kostar að vera með í Febrúarflugum?

Svar: Ekki krónu, þú sækir bara um aðild að hópinum á Facebook og setur inn flugu. Ef þú ert ekki á Facebook, þá er þér velkomið að senda mynd á fos@fos.is og við póstum henni í þínu nafni.

Hvað hafa margar flugur komið frá, öll árin?

Svar: Miðað við stöðuna á hádegi í dag (16.feb.2020) þá eru flugurnar orðnar 2.651  Skiptingin á milli ára er eins og sést á kökunni hér að neðan: 

Eru vinningar í Febrúarflugum?

Svar: Nei, en heppnir hnýtarar sem verða dregnir úr pottinum í lokin fá veglegar viðurkenningar frá styrktaraðilum Febrúarflugna. Allir sem leggja fram flugur, eiga jafna möguleika á viðurkenningu. Dregið verður úr nöfnum hnýtara óháð því hvort þeir hafi lagt fram 29 eða færri flugur í mánuðinum.

This slideshow requires JavaScript.

Hnýtingarkvöld Ármanna

Ármenn endutaka leikinn frá því fyrir hálfum mánuði síðan og bjóða öllum sem vettlingi eða þvingu geta valdið að koma í félagsheimili sitt, Árósa í Dugguvogi 13, mánudagskvöldið 17. febrúar kl. 20:00 og njóta félagsskapar og leiðsagnar í fluguhnýtingum. Sem fyrr verða það félagarnir Hjörleifur Steinarsson og Hjörtur Oddsson sem leiða hóp Ármanna sem reiðubúnir eru að aðstoða alla sem þess óska. Hnýtingaráhöld til staðar, heitt á könnunni og kex á bakka. Allir velkomnir, byrjendur sem og þeir sem vilja rifja upp gamla takta.

Ármenn munið að merkja flugurnar ykkar í Febrúarflugum með #armenn

Takið kvöldið frá og munið að það eru viðburðir í tengslum við Febrúarflugur í hverri viku mánaðarins.

Sagan af Moppunni

Ein af þeim flugum sem hafa skotist upp á stjörnuhimininn í fluguveiðinni er Moppan eða The Mop Fly sem kom fram á sjónarsviðið undir lok síðustu aldar vestur í Bandaríkjunum. Flestir veiðimenn og hnýtarar þekkja þessa flugu í einhverri þeirri mynd sem hún hefur tekið á sig frá því hún kom fyrst fram. Höfundur flugunnar er Jim Estes sem búsettur var á þeim tíma í Norður Karólínu. Að sögn er Jim sérstaklega uppátækjasamur hnýtari, fer ótroðnar slóðir og leitaði hráefnis á ólíklegustu stöðum. Efnið í Moppuna fann hann í s.k. Dollarstore, fannst það spennandi og prófaði það þegar heim var komið.

Upphaflega hnýtti Jim þessa flugu í ljósgrænum lit til að líkja eftir s.k. Sourwood ormi sem er algengur austanvert í Bandaríkjunum. Vissulega voru til nokkrar eftirlíkingar af þessum ormi í flugulíki, en Jim þótti þær óþarflega flóknar í hnýtingu og leitaði leiða til að einfalda hana. Það má fullyrða að mikið einfaldari gæti flugan ekki orðið.

Það er ákveðin tenging á milli Squirmito flugunnar og Moppunnar, þótt mörgum finnist sú tenging heldur léttvæg. Báðar falla þær í þann flokk sem höfundar þeirra kalla Trash flies eða Rusl-flugur, þ.e. þær eru hnýttar úr efni sem finnst víða og er ekkert sérstaklega ætlað til fluguhnýtinga, gjarnan eitthvað sem verður afgangs eða er ónýtt til sinna upprunalegu nota. Annað eiga þær sameiginlegt, þær hafa báðar lent á milli steins og sleggju þegar kemur að kærumálum í fluguveiðikeppnum, reyndar þeirri sömu með nokkurra ára millibili.

Sjálfur var ég fyrir mörgum árum afar trúr þessari flokkun flugunnar, þ.e. að hún væri rusl-fluga og hnýtti hana úr þykkum pípuhreinsara sem mér áskotnaðist sem afgangar einhvers föndurs á mínu heimili. Illu heilli voru þessir pípuhreinsarar aðeins í æpandi rauðum, bláum og grænum litum og ég veiddi aldrei neitt á þær flugur. Minni afbrigði sem ég hnýtti úr venjulegum pípuhreinsurum gáfu mér jafn marga fiska. Það er greinilega ekki sama hvaða rusl maður notar.

Eftir að flugan komst í hámæli og naut sífellt meiri og meiri vinsælda, þá urðu uppgrip í moppubransanum í byggingavöruverslunum vestan hafs. En það leið töluverður tími þar til þekktir fluguframleiðendur bitu á agnið. Nokkrir þeirra vildu hreint ekki sjá þessa flugu í sínum röðum, höfðu enga trú á þessari local flugu frá Karólínufylki. Það var ekki fyrr en löngu síðar að þessir framleiðendur tóku fluguna upp á sína arma og hófu framleiðslu og sölu á henni. Þeirra á meðal voru Umpqua og Montana Fly Company sem þannig misstu af mesta æðinu, en selja hana í dag í fjölda útfærslna.

Moppan líkir ágætlega eftir lirfu- og púpustigi fjölda skordýra og er hreint engin local fluga vestur í Bandaríkjunum lengur. Í dag finna hnýtarar hráefnið í þessa flugu í vel flestum verslunum, þar á meðal byggingavöruverslunum þar sem hægt er að kaupa lífstíðar lager af moppuþráðum, meira að segja í nokkrum mismunandi litum í einni og sömu moppunni. Nokkrir minni framleiðendur skúringamoppa brugðust við aukinni eftirspurn á sínum tíma og tóku upp á því að blanda saman bómullar- og fiberþráðum í ýmsum litum í moppurnar sínar og juku þannig sölutölur verulega. Það má því segja að moppuframleiðendur hafi stutt við bakið á hnýturum löngu áður en framleiðendum hnýtingarefnis datt í hug að bjóða staka moppuþræði til hnýtinga.

Í dag finnst þessi fluga í öllum mögulegum litum og útfærslum og kjaftasagan segir að þeir sem eiga lager af þessum flugum þurfi aldrei að kvíða aflatregðu.

Fréttir af Febrúarflugum

Þegar 10 dagar eru liðnir af Febrúarflugum þá eru 388 flugur komnar inn á Facebook, 470 meðlimir í hópinum og vel yfir 40 flugur inn á Instagram sem merktar hafa verið #februarflugur. Flugurnar eru nú komnar inn á FOS.IS og má skoða þær allar á einni síðu með því að smella hérna.

Aðsókn að viðburðum sem tengjast átakinu hafa líka verið einstaklega vel sóttir. Það var vel á fjórða tug gesta sem lögðu leið sína í Árósa til Ármanna þann 3. febrúar og í gærkvöldi náðu gestir á Barflugum á American Bar því að vera 100 talsins. Í kvöld taka svo félagar í Stangaveiðifélagi Akureyrar á móti gestum í Zontahúsinu og á morgun, miðvikudag ætla Borgnesingar að opna sýnar dyr og efna til hnýtingakvölds í tilefni Febrúarflugna.

Aðstandendur FOS.IS geta ekki annað en verið ánægðir með þessar frábæru undirtektir. Takk, öll þið sem hafið sýnt þessu átaki okkar áhuga og stutt við bakið á okkur.

Moppan

Þessi fluga er sérstaklega einföld í hnýtingu, svo einföld að margir hnýtingaleiðbeinendur hafa tekið hana upp á sína arma sem fyrstu flugu nemenda sinna.

Flugan líkir ágætlega eftir lirfu- og púpustigi fjölda skordýra þannig að hún gæti verið n.k. alhliða fluga í boxi veiðimanna. Litir flugunnar spanna nær allt sjáanlega litrófið og raunar vel út fyrir það eftir að UV útgáfur efnisins fóru að koma fram.

Höfundur: Jim Estes
Öngull: Standard votflugukrókur 10-12 eða Jig krókur í sömu stærð
Haus: Gylt brass kúla (2.8 – 3.8 mm) eða samsvarandi tungsten
Búkur: Moppuefni
Þráður: 8/0 í sama lit og moppan
Kragi: Dub að eigin vali t.d. héri

Hér má síðan sjá hnýtingarhandbragð Brandon Mena hjá Fly Fish Food þegar hann snarar í eina svona flugu:

Hnýtingarkvöld á Akureyri

Stangaveiðifélag Akureyrar tekur þátt í Febrúarflugum og ber út fagnaðarerindi fluguhnýtinga norðan heiða. Þriðjudaginn 11. febrúar ætla félagsmenn SVAK að bjóða til hnýtinarkvölds í Zontahúsinu, Aðalstræti 54 kl. 20:00

Vitaskuld verða græjur á staðnum, heitt á könnunni og meðal félagsmanna SVAK er að finna einhverja bestu hnýtara landsins og þeir verða á staðnum til leiðsagnar. Allir velkomnir, byrjendur sem og þeir sem vilja rifja upp gamla takta.

Félagar SVAK munið að merkja flugurnar ykkar í Febrúarflugum með #SVAK.

Takið kvöldið frá og munið að það eru viðburðir í tengslum við Febrúarflugur í hverri viku mánaðarins.

Opið hús hjá SVFB

Það verður opið hús hjá Stangveiðifélagi Borgarness, miðvikudaginn 12. febrúar kl. 20:00 í húsnæði Límtré vírnets. Þar geta menn hnýtt flugur, kennt öðrum að hnýta eða bara spjallað. Kaffi og léttar veitingar verða í boði. Félagar í SVFB eru hvattir til að merkja flugur sínar í Febrúarflugum með #svfb

Þeim fjölgar bara viðburðunum þar sem menn halda upp á skemmtilegan febrúar við fluguhnýtingar.

Vesturröst styrkir Febrúarflugur

Einn dyggasti styrktaraðili Febrúarflugna í gegnum árin hefur verið Vesturröst. Allt frá því byrjað var á að veita viðurkenningar fyrir þátttöku í Febrúarflugum, hefur Vesturröst styrkt átakið og þá hnýtara sem taka þátt í því með beinum og óbeinum hætti.

Í vöruúrvali verslunarinnar má finna ýmislegt góðgæti fyrir stangaveiðimenn og fluguhnýtara og hluta þess má skoða og versla á vefnum, en vitaskuld er alltaf skemmtilegast að koma við á Laugavegi 178 og kíkja á úrvalið. Það kemur vart fyrir að veiðimenn fari tómhentir úr Vesturröst.

Veiðikortið styrkir Febrúarflugur

Veiðikortið styður við Febrúarflugur að vanda. Veiðikortið hefur allt frá upphafi stutt dyggilega við átakið og glatt heppna hnýtara með Veiðikortinu sem þetta árið veitir aðgang að 34 vötnum og vatnasvæðum, hringinn í kringum landið.

Eins og áður segir, þá felur Veiðikortið í sér leyfi í 34 vötn og vatnasvæði. Með kortinu fylgir að vanda veglegur bæklingur með haldgóðum upplýsingum um tilhögun og staðhætti á hverju svæði. Þess má geta að fram til 1. júní fá Veiðikortshafar 15% afslátt af stangaveiðivörum í Vesturröst, sem einmitt er styrktaraðili Febrúarflugna líka.

Valdemarsson styrkir Febrúarflugur

Valdemarsson flyfishing styrkir Febrúarflugur þetta árið líkt og undanfarin ár. Að þessu sinni leggja þeir til, hvorki meira né minna, heldur en V-Calmness Plús fluguveiðistöng fyrir línu #5 sem er þriðja kynslóð þessara vinsælu stanga.

Um árabil hefur Valdemarsson boðið upp á eigin hönnun flugustanga, fluguhnýtingaefni og áhöld, auk þess að selja eigin flugur í miklu úrvali. Á vefsíðu Valdemarsson má finna breitt úrval veiðivara sem vert er að gefa gaum.