Og enn bætist í vötnin á síðunni. Nú er það þriðja og síðasta vatnið í Svínadal, Eyrarvatn. Snoturt vatn og tilvalin tilbreyting frá hinum tveimur vötnunum í Svínadal.
Eins og um flest vötn sem nú eru á síðunni, má nálgast ýmiss kort og gagnlegar upplýsingar, m.a. dýptarkort Orkustofnunar, okkar eigið kort og svo ýmsa gagnlega tengla.
Höfundur:
Loksins, loksins. Nei, ekki misskilja mig, það kom ekki fiskur á land en ég fór upp að Elliðavatni seinni partinn og baðaði tvær flugur, flækti allt of grannt taumefnið og endaði á því að festa fluguna í eina trénu í mílu fjarlægð. Örlitlar ýkjur, en sagan er skemmtilegri þannig.
Það gekk á með tveimur dropum og einu til tveimur snjókornum þótt hitamælirinn segði 5°C og það kulaði óþægilega ofan úr Heiðmörkinni, en mikið rosalega var gott að komast að vatninu. Ég böðlaðist ekkert lengi í vatninu, svona rétt aðeins á meðan konan lék Joan Wulff á grasblettinum við Elliðavatnsbæinn og þangað til kuldinn gerði óþægilega vart við sig í tánum á mér. Vatnið var sem sagt heldur kalt en samt var líf, fluga á vatninu og töluvert um uppitökur.
Nú fer þetta alveg að detta í gang, held ég. Verð trúlega samt að láta sjá mig á Klambratúni á morgun; JOAKIM’s dagur og Stefán Hjaltested örugglega til í að skamma mig fyrir léleg köst.
| Bleikjur í ferð | Bleikjur alls | Urriðar í ferð | Urriðar alls | Fj.ferða |
|---|---|---|---|---|
| 0 / 0 | 0 / 0 | 0 / 0 | 0 / 0 | 0 / 2 |
Höfundur:
Annað vatnið í Svínadalnum er komið á síðuna, Glammastaðavatn. Sumir þekkja vatnið sem Þórisstaðavatn, en það er seinni tíma viðurnefni. Af tómum tiktúrum ætla ég að halda mig við Glammastaðavatn.
Rétt eins og um Geitabergsvatn sem kom hér á síðuna um daginn, þá gefur að líta upplýsingar um veður og veðurspá fyrir vatnið, kort frá Orkustofnun, Já.is og mitt eigið í stærri útgáfu. Allt upplýsingar sem vonandi hjálpa veiðmönnum eitthvað.
Höfundur:
Nú í byrjun maí ættu vötnin í Svínadal að vera að koma vel til. Næstu daga munu síðan birtast hér lýsingar á hinum tveimur vötnum sem dalurinn geymir. Raunar byrjar upptalningin á því vatninu sem síðast kemur yfirleitt til á vorin, Geitabergsvatni.
Á síðunni um vatnið gefur að líta kort frá Já.is, dýptarkort Orkustofnunar, kortið hér til hliðar í mun stærri útgáfu, auk veðurupplýsinga frá Veðurstofunni og YR auk annarra gagnlegra tengla.
Höfundur:
Nú hefur Veiðivötnum verið bætt hér inn á síðuna, þ.e. smávæginlegu efni sem ekki er að finna á frábærum vef Arnar Óskarssonar, veidivotn.is
Hér er ekki um hefðbunda veiðistaðalýsingu að ræða, þess í stað hef ég safna nokkrum gagnlegum upplýsingum saman á einn stað, s.s dýptarkortum Orkustofnunar af flest öllum Veiðivötnunum. Á síðunni er einnig að finna nýtt, stórt kort af Veiðivötnum í boði fos.is Gott að prenta út og hafa með sér í vötnin.
Höfundur:
Síðasta vatnið í röð vatnanna af Skagaheiði, Andavatn. Mér duttu óteljandi aulabrandarar í hug þegar ég setti þessa frétt saman, en ætla að sleppa þeim öllum.
Andavatn er eitt gjöfulasta vatnið á Skagaheiðinni og margir leggja gagngert leið sína á heiðina í þetta vatn. Vel þess virði að skoða það í sumar.
Á næstu dögum kynnum við síðan ný vötn á nýjum slóðum til sögunnar á síðunni.
Höfundur:
FOS 