Nú ferð að hylla undir síðasta vatnið af Skagaheiðinni hérna á síðuna. Næst síðasta vatnið í röðinni er Grunnatjörn. Sjálfur hef ég rölt upp með læknum sem rennur í Ölvesvatn og inn að vatninu. Í augnablikinu man ég ekki hvers vegna ég renndi ekki fyrir fisk í tjörninni sjálfri, kannski ég láti bara reyna á það í sumar?

Vel að merkja; Gleðilegt sumar og til hamingju með daginn. Er ekki stuttbuxnaveður um allt land?

Ekki eru öll vötn jafn fengsæl á Skagaheiði, mögulega vegna lélegrar ástundunar. Nú í sumar er mögulega lag að hækka aflatölur Heyvatna á Skaga, leggja fengsælustu staðina á minnið og senda mér upplýsingar þannig að ég geti merkt þá á kortið. Sjálfur hef ég lengi haft það á tilfinningunni að vötnin ættu að gefa þokkalega á stöng, en ekki prófað ennþá.

Næsti nágranni Ölvesvatns á Skaga er komin á síðuna, Fossvatn. Svo stutt er á milli þessara vatna að við liggur að fiskurinn stökkvi á milli þeirra. Grínlaust er mikill samgangur fisks á milli vatnanna um Eiðsá og þar má setja í stóra urriða, hitti maður á þá.

Ármenn efna til Vorblóts n.k. laugardag kl.14  Þá verður vori og nýrri vertíð fagnað í faðmi fjölskyldu og vina í Árósum, félagsheimili Ármanna, Dugguvogi 13 (sjá kort)  Á blótinu verður boðið upp rjóma- og brauðtertur að hætti hússins ásamt veglegu happdrætti þar sem kennir ýmissa og ekki síður girnilegra vinninga ef að líkum lætur.

Flugur og skröksögur hafa það fyrir satt að meðal vinninga í happdrættinu verði gjafabréf frá Forlaginu og Kristjáni Friðrikssyni (#861) upp á rétt óútkomna veiðibók, Vatnaveiði -árið um kring.

Til að gera dagskránna ekki of þunglamalega verður einnig boðið upp á stöku ræður og eflaust nokkrar veiði- og skemmtisögur að hætti Ármanna. Vorblót Ármanna er hin prýðilegasta skemmtun og um að gera að láta það ekki framhjá sér fara.

Að endingu vilja Ármenn minna á Flóamarkaðinn sem verður í Árósum í kvöld, miðvikudag kl.20

Enn eitt vatnið af vatnsvæði Selár er komið á síðuna. Í þetta skiptið er það vatnið sem svæðið dregur nafni sitt óbeint af, Selvatn.

Vatnið er gjöfult á urriða og margir hafa gert góða veiði í vatninu, snemma vors, á miðju sumri og langt fram á haustið.

Miðvikudagskvöldið 15. apríl ætla Ármenn að efna til Flóamarkaðar þar sem kostur gefst á að koma ónotuðu veiðidóti í verð eða góðra manna hendur. Þarna gefst frábært tækifæri til að koma gömlum stöngum, hjólum, vöðlum og hnýtingarverkfærum á framfæri og gera mögulega úr þessu smá aur sem nýta má til að kaupa það sem vantar af öðrum veiðimönnum á staðnum.

Þegar hafa margir félagsmenn og söluaðilar boðað komu sína og kennir ýmissa grasa í því sem boðið verður uppá. Þetta er frábært tækifæri til að losa aðeins um pláss í geymslunni eða fylla í auðar skúffur.

Ármenn sjálfir hyggjast selja nokkrar lausar stangir í Hlíðarvatni í Selvogi áður en þær fara í almenna sölu á leyfi.is  Það getur því borgað sig að taka með sér smá aur á miðvikudagskvöldið og kíkja á Flóamarkaðinn.

Flóamarkaðurinn verður haldinn í Árósum, félagsheimili Ármanna að Dugguvogi 13 (sjá kort) og hefst stundvíslega kl.20:00. Allir velkomnir með gamalt og nýtt