Nú hefur verið bætt töluvert við vötnin og upplýsingar um þau hér á síðunni. Allar uppfærðar upplýsingar um vötnin innihalda nú dýptarkort og flest af nýju vötnunum innihalda einnig stærri kort sem eru okkar eigin.
Það liggur alltaf töluverð vinna í að sannreyna upplýsingar sem koma fram á kortum, vefkort eru ekki alltaf áræðanleg varðandi örnefni og því hef ég reynt að sannreyna staðarheiti, veiðistaði o.s.frv. eins og unnt er skv. áræðanlegum heimildum.
Síðasta vatnið í þessari atrennu er Haukadalsvatn í Dölum. Frábært veiðivatn sem er vel þess vert að gefa aukin gaum.
Ótvírætt merki um að þetta sé að smella í gang er þegar við setjum kaffi á brúsa, kleinur og smurt í box og látum okkur hverfa út í buskann. Við ákváðum að heilsa upp á gamla kunningja og renndum því inn Hvalfjörðinn og yfir í Svínadal þar sem Eyrarvatn, Glammastaðavatn og Geitabergsvatn eru aftur kominn á kortið, þ.e. Veiðikortið. Eftir stutt, en áhugavert spjall við nýja staðarhaldara á Þórisstöðum kíktum við á Eyrarvatnið austanvert en stoppið var heldur stutt í stífri vestanáttinni.
Næst lá leiðin í Geitabergsvatnið þar sem sólarglætan náði að ylja sálartetrin okkar í tvígang með undursamlegum árangri, sumarið blasti við. Að vísu vorum við sammála um að lítið væri komið í gang af skordýrum, ekki ein einasta náttúruleg fluga á sveimi og ekki eitt einasta hornsíli að sjá. Að vísu var himbriminn mættur og á einum tímapunkti tókst honum að hræða einn urriða í áttina til mín, en ekki lét sá glepjast af mínum flugum og synti rösklega aftur út í djúpið.
Að lokum renndum við inn að Glammastaðavatni og gerðum heiðarlega tilraun við ós Kúhallarár en lítið urðum við vör við fisk á þeim slóðum. Þegar svo sólin dró sig í hlé létum við gott heita og eftirlétum vatnið nokkrum fjölda veiðimanna sem voru mættir á staðinn. Það verður trúlega ekki langt þangað til við kíkjum aftur í Svínadalinn, þá er aldrei að vita nema sumarið hafi gengið í garð fyrir alvöru.
Hraunsfjarðarvatn, vestan Baulárvallavatns á Snæfellsnesi er mörgum kunnugt þótt ég hafi aldrei veitt í því. Að vísu hef ég komið að vatninu og það sló mig strax sem djúpt, djúpt og kalt. E.t.v. hefur veðrið sem þá var haft eitthvað að segja um fyrsta álit mig á því, en djúpt er það svo sannanlega og lítið um grynningar.
Hver veit nema sumarið sem nú er að spretta fram undan köldu vorinu færi mér eins og eina ferð vestur á nesið til að spreyta mig við vatnið.
Vötnin tvö við Vatnaleiðina vestur á Snæfellsnesi hafa oft gefið veiðimönnum vel. Fyrra vatnið, Baulárvallavatn, kemur nú loks inn á síðuna með hefðbundnum upplýsingum, kortum og veðurupplýsingum.
Síðara vatnið, Hraunsfjarðarvatn, fylgir svo fast á hæla Baulárvallavatns á fimmtudaginn.
Það er ekkert lítið sem Elliðavatnið hefur tekið við sér þessa viku sem leið á milli ferða. Vatnshitinn, náttúran og veðrið (framan af) voru mjög nálægt því að vera komin í sumarbúning þegar við hjónin skruppum upp að Elliðvatnsbænum í gærkvöldi.
Fiskur að vaka og fluga í lofti, á vatni og hnýtt á taum. Dásamlegt veður og við reyndum fyrir okkur í næstum tvo tíma fram undan bænum þangað til kulaði skyndilega og fór að rigna allhressilega. Fyrsta nart sumarsins hjá mér, að vísu mjög nett, þannig að þetta er allt að koma.
Þau eru nokkru vötnin sem eru alveg við bæjardyr höfuðborgarinnar, nánast í göngufæri. Flestir þekkja Elliðavatn og Vífilsstaðavatn, en færri leggja leið sína að Hafravatni. Sjálfur hef ég nýtt vatnið nokkrum sinnum til kastæfinga, en sjaldan farið þangað beinlínis til veiða. Fiskurinn í vatninu er þó að koma til og því ætti að vera í lagi að setja upplýsingar um það hér á síðuna.
FOS 