Um þetta leiti árs er flest allt það sem úti grær fallið í dvala, veturinn genginn í garð og flugurnar gengnar til náða. Þá vaknar FOS.IS úr dvala nördismans og tekur til við að dæla út hugleiðingum sem hafa verið að grassera í kolli mínum í sumar.

Sem endranær er efnið sem hér birtist úr eigin kolli, en nokkuð af því er í raun frá lesendum komi í formi fyrirspurna og hugmynda sem þeir hafa gaukað að mér á liðnum mánuðum. Sumar þessara hugmynda hafa reynst mér heldur ofviða þekkingarlega séð eða mér hefur ekki gefist tími til vinna úr þeim eins og ég hefði viljað þannig að einhverjar þeirra hvíla enn í skilaboðaskjóðunni. Fjöldi greinarkorna í vetur verður á bilinu 60 – 70 eins og endranær, allt eftir efnum og ástæðum en þegar eru 50 greinar klárar og bíða birtingar.

Á liðnum vikum hef ég tekið aðeins til á vefnum, lagfært ýmislegt smálegt sem betur hefur mátt fara og vonandi tekist að auðvelda gestum síðunnar að nálgast upplýsingar um það sem þeir sækja í. Meðal þess sem ég bætti við er listi við hverja grein yfir aðrar greinar sem fjalla um sama eða svipað efni. Þetta auðveldar vonandi gestum að velja sér lesefni úr þeim tæplega 1.700 pistlum sem þegar eru á vefnum.

Einn af föstu liðum vetrarins verður á sínum stað, en það eru Febrúarflugur. Formið verður með svipuðu sniði og áður, þátttakendur leggja fram myndir og upplýsingar um flugur sem þeir hnýta inn á fésbókarhópinn sem nú telur 350 meðlimi og vitaskuld er öllum frjáls þátttaka. Mig hefur lengi langað að færa þetta skilgetna afkvæmi FOS meira út á netið, fá enn meira líf í hópinn, t.d. með því að tengja það t.d. stangaveiðifélögum, hnýtingarklúbbum og hópum þennan mánuð sem það stendur. Hvernig það tekst á næsta ári verður að koma í ljós, en ég mun bráðlega auglýsa eftir áhugasömum aðilum sem vilja nýta sér þetta átak eða taka þátt í því með öðrum hætti. Umfram allt, þá vil ég halda í það form sem hingað til hefur verið, þ.e. þetta á ekki að vera flókið, bara gaman og þannig að því staðið að allir geti tekið þátt.

Annars verður veturinn nokkuð hefðbundinn í efnisvali, hinar og þessar hugleiðingar og eitthvað úr reynslubankanum. Einhverjar nýjar flugur koma inn á síðuna og efni eftir því sem verkast vill. Nú hljóma ég eins og ég viti ekki nákvæmlega hvað kemur inn á vefinn í vetur, en það er nú bara skröksaga. Allt efnið er löngu klárt og tilbúið eins og áður segir, en það er nú alltaf svigrúm fyrir skyndihugdettur eða alvarlegar fréttir.

Í dag á þetta litla og netta kríli mitt 4. ára afmæli. Ekki hefði mig grunað fyrir fjórum árum síðan að þetta skilgetna afkvæmi veiðidellunnar minnar næði því að lifa jafn góðu lífi og það hefur gert.

Enn þann dag í dag selst hún og það gleður mitt litla hjarta jafn mikið þegar ég sé hana í betri bókaverslunum og það sem meira er, hún er ekki rykfallin í hillunum.

Til þeirra sem gluggað hafa í bókina og eiga hana jafnvel; Takk fyrir samfylgdina í þessi fjögur ár.

Fyrsta ferð okkar veiðifélaganna í Hlíðarvatn í Hnappadal þetta árið. Klassísk vindátt, klassískur vindstyrkur og klassískur afli. Viðvörun: Í lok klippunnar sjást dauðir fiskar, viðkvæmum er bent á að slökkva fyrir mín. 1:38

Veiðifélag Landmannaafréttar hefur opnað upplýsinga- og sölusíðu fyrir nýjan og sérstaklega áhugaverðan valkost fyrir fluguveiðimenn, Sauðafellsvatn við rætur Heklu.

Það hefur legið í loftinu í nokkurn tíma að Veiðifélagið kæmi þessu vatni í sölu eftir að rannsóknir þar leiddu í ljós að urriða af Grenlækjarstofni sem sleppt var í vatnið árið 1993 hefur reytt vel af á undanförnum árum og hefur náð að fjölga sér þrátt fyrir að ekkert að- eða frárennsli sé sjáanlegt við vatnið. Svo virðist vera sem fiskurinn hafi náð að nýta sér lindir í vatninu til að viðhalda stofninum.

Veiði hefst þann 18. júní og sala fer eingöngu fram á vefsíðunni saudafellsvatn.is sem og skráning í veiðibók. Það ber að fagna því að önnur eins perla og Sauðafellsvatnið er hafi nú komið á markaðinn og þá sérstaklega að aðeins er leyfð fluguveiði. Umferð báta á vatninu er bönnuð og það ætti því ekkert að geta truflað upplifun veiðimanna í kyrrðinni við rætur Heklu. Veiðivörslu annast ferðaþjónustan Áfangar ehf. sem staðsett er í Áfangagili, skammt norðan Sauðafellsvatns.

Allar nánari upplýsingar um vatnið má finna á vefnum saudafellsvatn.is og hér á FOS.IS því vitaskuld hefur þessari perlu verið bætt inn í önnur vötn sem fjallað eru um hér á vefnum.

Það er víðar en í laxveiðinni sem sala veiðileyfa breytist og færist til. Nú hefur eitt þeirra vatna sem ég hef lengi átt í opinberu ástarsambandi við bæst við vötnin á Veiðikortinu. Hlíðarvatn í Hnappadal fyrir landi Hraunholta var að koma inn á kortið og er það eflaust mörgum kærkomin viðbót við annars frábæra flóru vatna á Veiðikortinu.

Síðustu ár hafa bændur við Hlíðarvatn selt sjálfir í það, auk þess sem félagar Stangaveiðifélags Borgarness hafa veitt fyrir landi Hraunholta. Með þessari viðbót á Veiðikortið má segja að sala bænda í Hraunholtum færist af þröskuldinum þeirra og yfir á Veiðikortið. Allar nánari upplýsingar um veiðisvæðið og fyrirkomulag má finna á vef Veiðikortsins auk þess sem ítarleg umfjöllun og upplýsingar um vatnið má auðvitað finna hér á vefnum.

Annað vatn í næsta nágrenni var um árabil innan vébanda Veiðkortsins en við færslu Hítarár í vor frá SVFR færðist Hítarvatn undan kortinu og yfir til Grettistaks. Nú hafa þeir félagar í Grettistaki stofnað sérstaka heimasíðu fyrir Hítarvatn og selja þar dags-, helgar- og sumarleyfi. Dagsveiði kostar 2.500,- kr. helgarveiði 5.000,- og sumarkortið 10.000,- kr. Þessar fréttir gleðja eflaust einhverja gesti FOS.IS því nokkuð hefur verið spurt um fyrirkomulag veiðileyfasölu í Hítarvatn frá því breyting varð á. Allar nánari upplýsingar um Hítarvatnið má vitaskuld finna hér á síðunni.

Sú mynd sem fylgir þessari færslu er á gráu svæði, eins og sést. Myndin er tekin af atvinnuljósmyndara sem lagði töluvert á sig að ná þessu myndefni þokkalegu og hún birtist í opinberu plaggi fyrir einhverjum árum síðan. Ef ekki væri fyrir það að myndefnið væri ég sjálfur og ég hefði leyfi til að birta þetta á síðunni, þá væri ég að brjóta höfundarrétt á ljósmyndaranum og einhvern annan rétt á þeim sem kostaði myndatökuna.

Á FOS.IS má finna 5.862 myndir og myndbrot. Þar af eru 208 kort og teikningar sem ég hef útbúið sjálfur og 5.570 ljósmyndir sem ég eða veiðifélagi minn höfum tekið. Restin, sem telur 84 ljósmyndir hef ég keypt eða fengið leyfi frá höfundi að birta hér á síðunni og get hans þá sérstaklega. Þessar myndir tengjast rétt um 2.000 greinum sem er að finna á síðunni og innihalda efni sem er mitt.

Vefurinn hefur aldrei verið tekjulind og ég á ekki von á að það breytist. Ég er ekki einn af kostuðum áhrifavöldum samfélagsmiðla, ef ég nefni einhverja vöru, þjónustu eða fyrirtæki, þá er það vegna þess að ég tel það þess virði að nefna og ekkert annað liggur þar að baki.

Það getur verið snúið að vernda höfundarrétt efnis og ég hef ekki verið að eltast við slíkt í gegnum tíðina. Öllum hefur verið frjálst að vísa í það sem hér hefur verið sett fram, sé uppruna þess getið.

Að gefnu tilefni vil ég árétta að þetta er sett fram með þeim fyrirvara að viðkomandi þiggi ekki greiðslu fyrir eða noti efnið sér til tekna með beinum eða óbeinum hætti. Ef einhver hefur áhuga á slíkri notkun, þá þarf mitt samþykki.