Til viðbótar áður nefndri lagersölu JOAKIM’S ætla þeir félagar nú að opna gáttir sínar fyrir gestum og gangandi, annan daginn í röð, í dag sunnudaginn 1.desember að Tunguhálsi 10, húsnæði Kemi ehf frá kl.13 – 17. Eins og segir í tilkynningu frá JOAKIM’S gefst hér tilvalið tækifæri til að versla jólagjafir veiðimannsins á góðu verði í dag.

Eftir tæp 11 ár á markaðnum heldur JOAKIM´S ehf sína fyrstu alvöru lagersölu. Þar sem ekkert var haldið sérstaklega upp á 10 ára afmælið þá bjóðum við nú verð sem gæti vel verið 10 ára gamalt.

Joakim´s ehf hefur nánast eingöngu flutt inn og selt stangir, hjól og línur til fluguveiða en einnig vöðlur, vöðluskó, króka, kúlur og keilur til fluguhnýtinga, flugubox, veiðigleraugu, háfa og margt fleira. Nú er tækifæri að versla jólagjöf veiðimannsins á frábæru verði.

Til dæmis má fá flugustöng í hólk með aukatoppi á kr.10.500,- ( sú ódýrasta ) , 100 stk. Silungakróka í fluguhnýtingar ( allar stærðir ) á kr.600,- og flott fluguhjól á kr.20.000,- sem kosta nærri helmingi meira í verslunum   ( sama hjólið en annað merki ).

Verð og vörulista má finna inni á www.joakims.is

Við höfum opið í dag sunnudaginn 1.des frá 13:00- 17:00 að Tunguhálsi 10 (sjá kort)

Veiðikortið 2014 er að koma út á næstu dögum, þannig að það ætti að vera klárt í jólapakka landsmanna. Tvö ný vötn bætast við og eitt dettur út. Verðið er óbreytt frá því í fyrra eða kr. 6.900, sannkölluð kjarabót á meðan allt annað hækkar.

Tvenn ný vötn verða á kortinu þetta árið; Gíslholtsvatni í Holtum og Vestmannsvatni í Suður-Þingeyjarsýslu.  Eitt svæði dettur út; Þingvallavatn II fyrir landi Ölfusvatns.

Bæklingur ársins er klár á netinu og hann má nálgast hérna.

Lesendum þessarar síðu þarf ekkert að koma það á óvart þegar ég játa að ég hef undanfarin ár haldið tryggð við Joakim’s flugustangir í mínum meðförum. Stangirnar og sú þjónusta sem ég notið hjá Joakim’s hafa hreint og beint verið framúrskarandi og ég þori því alveg að lauma smá auglýsingu hér inn frá Joakim’s sem ætti að gleðja veiðimenn allt til loka janúar 2014:

Við eigum talsverðan lager og höfum áhuga á að minnka hann og rýma til fyrir nýjum vörum.

Nú hafa JOAKIM´S flugustangir verið á markaðnum í tæp 11 ár og hafa mjög margir góða reynslu af þeim. Enda þótt við séum ekki með svokallaða lífstíðarábyrgð heldur venjulega vöruábyrgð eins og skylda er þá er það mál manna að okkar ábyrgð og þjónusta sé engu síðri en annarra söluaðila. JOAKIM´S ehf býður einnig upp á margt annað í fluguveiði svo sem hjól, línur, króka til hnýtinga, kúlur, keilur, þverhausa og flashabou. Einnig flugubox, háfa, veiðivesti, hjólatöskur og öndunarvöðlur. Í meðfylgjandi lista er að finna allar okkar vörur og nú á verði sem er lægra en nokkru sinni fyrr og gildir hann á meðan birgðir endast eða til 31.janúar 2014. Við höfum aldrei haft eiginlega útsölu á vörum okkar en alltaf boðið hagstætt verð. Ástæðan fyrir því að við getum boðið svo lágt verð er að það er engin yfirbygging og engir fastráðnir starfsmenn. Við vinnum þetta utan hefðbundins vinnutíma og bjóðum fría heimsendingu um allt land ef verslað er fyrir kr. 15.000,- eða meira. Einnig er hægt að koma til okkar til að skoða eða sækja vörur. Vörulisti lagersölunnar má opna hér ásamt pakkatilboðum hér. Vörurnar má flestar sjá á heimasíðu Joakim’s, joakims.is

Jón V.Óskarsson 698 4651 joakims@simnet.is eða Júlíus Guðmundsson 699 2087 julli@vortex.is

Síðunni barst í dag bréf sem mér er skylt og einstaklega ljúft að koma á framfæri og bið hnýtara að gæta vel að:

Sælt veri fólkið.

Var að skoða vef ykkar og sá Heimasætuna mína illa til hafða og rangfærða á annars góðum og áhugaverðum vef (ætti að skoða hann oftar).
Virðingarfyllst þætti mér, að misskilningur sem hefur gengið lengi um að Heimasætan ætti að vera gyllt í vöfum er ekki rétt, hún var og er silver og hefur alltaf verið, eins er með væng þá er hann Magenta að lit. Þætti vænt um að uppskrift að Heimasætuni verði leiðrétt á vef ykkar.

Virðingarfyllst, með kveðju
Óskar Björgvinsson höfundur Heimasætunar.

Hér hefur undirritaður fallið í þá gildru að styðjast við uppskriftir úr annars ágætri íslenski bók um veiðiflugur og af öðrum veiðisíðum án þess að gæta að áræðanleika þeirra uppskrifta. Þykir mér þetta miður og hef vitaskuld leiðrétt uppskriftina sem um ræðir og sjá má hér. Eins og ég hef áður sagt, þá verður þessi vefur minn aldrei betri en svo að ekki sé hægt að bæta um betur. Þar koma ábendingar sem þessar að góðum notum og kann ég Óskari kærar þakkir fyrir.

Kristján Friðriksson

Það virðist vera nokkuð rólegt yfir veiðimönnum þessa daga, lítið um innlegg á spjallsíðum og eiginlega enn minna um færslur á veiðibloggum. Fyrst lítið er að frétta héðan frá Íslandi, þá er ég búinn að merkja nokkur áhugaverð erlend tímarit inn á Issuu-síðuna mína ef einhver hefur áhuga á að blaða í gegnum nokkur tímarit. Smelltu á myndina til að opna Issuu.

Smá viðbót: ég hafði varla sleppt orðinu þegar Veiði-Eiður kom með þessa fínu samantekt eftir sumarið á blogginu sínu. Endilega lítið við hjá honum hérna.

Önnur tímarit sem ekki eru gefin út á Issuu, reyni ég að uppfæra reglulega hér til hliðar á síðunni.

Að öllu jöfnu telst það ekki í frásögur færandi að maður kíki í bókabúð, en í þetta skiptið var það gert í mjög svo ákveðnum erindagjörðum. Ég ætlaði nefnilega að skyggnast í bækur Sölva Björns, Stangveiðar á Íslandi og Íslensk vatnabók.

Fyrirfram vissi ég að samtals næðu þessar tvær bækur ríflega 1000 blaðsíðum og hlytu því að vera nokkurt verk, en hvorki óraði mig fyrir umfanginu eða innihaldinu. Þetta er glæsilegt verk með mörgum frábærum lýsingum og frásögnum veiðimanna, framsett á skemmtilegan og auðlesin máta sem ber höfundi gott vitni um áhuga og elju við skrif.

Auðvitað greip egóið aðeins um sig og ég fletti í gegnum langar nafnaskrár beggja bókanna og fannst bara nokkuð til þess koma að eiga þar nokkur innlegg ásamt fjölda annarra veiðimanna og kvenna.

Þetta eru einstaklega eigulegar bækur sem vonandi eiga eftir að rata á náttborðið hjá mér innan tíðar.