Í dag, 16. september, er afmælisdagur Ómars Ragnarssonar og þar með Dagur íslenskrar náttúru. Áhugasömum er bent á fjölda viðburða sem tengdir eru deginum og má sjá þá flesta á vef Umhverfis- og auðlindaráðuneytisins með því að smella hérna.

Veiðimenn eru hvattir til að bregða sér í veiði í dag, njóta hreinnar náttúru okkar og ósnortinna fiskistofna. Nú, sem aldrei fyrr, steðjar ógn að okkar viðkvæma lífríki þegar áform um stórfelld umhverfisspjöll eru áformuð við strendur Íslands í formi sjókvíaeldis með erlendum fiskistofnum.

Segjum nei við því að leppfyrirtæki erlendra fiskeldisrisa komist upp með að flytja hingað mengandi sjókvíastóriðjur sem sannanlega ógna náttúru Íslands. Hvaða dagur er til þess fallinn til að standa vörð um náttúruna, ef ekki Dagur íslenskrar náttúru?

Nýjar aflatölur úr Framvötnum, vötnunum sunnar Tungnaár voru að koma á heimasíðu Veiðivatna. Veiðitölurnar byggja á 55 skýrslum sem skilað hafði verið inn til 30. ágúst. Sem fyrr trónir Frostastaðavatn á toppnum með 966 fiska og Ljótipollur í öðru sæti með 192 stk. Það vekur athygli að í Sauðleysuvatni er þyngsti fiskur skráður 2,8 pund sem eru virkilega jákvæðar fréttir þar sem vatnið hefur verið þekkt fyrir allt annað en væna fiska á undanförnum árum. Svipaða sögu er að segja af Hrafnabjargavatni með 1,3 pund þyngst, en þar hafa að vísu aðeins verið veiddir 7 fiskar það sem af er árs. Bæði þessi vötn hafa átt undir högg að sækja sökum ofsetningar bleikju á undanförnum árum, spurning hvort þar sé að komast upp stofn ránbleikju, en eflaust er of snemmt að fjölyrða eitthvað um það.

Eins og sjá má vantar ekki nema eina góða dagsstöng upp á að Frostastaðavatni fari yfir 1.000 fiska. Eflaust lumar einhver veiðimaður á óskilaðri veiðiskýrslu sem gæti togað tölurnar yfir þúsundið, nú og svo er sumarið alls ekki búið og margir góðir dagar eftir að Fjallabaki. Ef einhver á í fórum sínum skýrslu sem gleymdist að skila, þá geri ég ekki ráð fyrir öðru en henni megi skila með tölvupósti á info(hjá)landmannahellir.is eða hringja tölurnar inn í síma 893-8407

Á vef Veiðivatna má finna frétt af aflabrögðum úr Framvötnum. Tölurnar byggja á veiði frá 24. júní til 9. júlí, en það sem vekur athygli er að aðeins er úr 16 veiðiskýrslum að moða á þessu tímabili. Það kemur engum á óvart að Frostastaðavatn trónir á toppinum með 600 bleikjur, næst kemur Ljótipollur með 28 urriða og Dómadalsvatn með 21 stk. Samtals voru því komnir 649 fiskar upp úr vötnunum þann 9. júlí, en verulega hefur bætt í þessa tölu síðan og Herbjarnarfellsvatn m.a. komið á blað með í það minnsta 4 væna urriða.

Í fréttinni eru veiðimenn hvattir til að skila inn veiðiskýrslum í póstkassana við Frostastaðavatn og vegamótum Landmannaleiðar og afleggjara að Landmannahelli. Eins má skila skýrslum til umsjónarmanna við Landmannahelli. Það verður spennandi að sjá hvort skýrslum fjölgi ekki eitthvað eftir þessa hvatningu, skil hafa verið mjög léleg m.v. útgefin leyfi og því verður vart trúað að menn hafi núllað á svæðinu í sumar.
Þess má geta í framhjáhlaupi að skráð heildarveiði 2014 úr Frostastaðavatni voru 624 fiskar og það hefur örugglega verið toppað núna, því inn í tölur ársins vantar m.a. 55 fiska okkar veiðifélaganna úr síðustu ferð. Því miður hafa aflatölur fyrir 2015 ekki verið birtar ennþá.

Nýverið fór undirritaður í jómfrúarferð í Langavatn á Skagaheiði. Eins og oft áður nýtti ég tækifærið og tók veiðimenn og umsjónaraðila tali og aflaði nokkurra upplýsinga fyrir vefinn.

Nú hefur þessum upplýsingum ásamt korti af vatninu verið komið fyrir á vefnum sem aðgengilegar eru hér.