Ég hafði orð á því um daginn að nokkuð skemmtilegt stæði til hjá Berki Smára, FFF flugukastkennara, og það kom í ljós á mbl.is í dag. Fyrsta myndbandið af sjö þar sem Börkur fer í gegnum m.a. The Essentials of Fly Casting eða því sem næst. Fyrsta myndbandið er komið í loftið, endilega skoðið það hér og fylgist með þeim næstu. Frábært að fá svona atriði beint í æð á svona flottann hátt, það líða vonandi ekki margir dagar þar til við sjáum #2.

Ummæli

16.07.2012 – Eiður Kristjánsson: Við, næstum því, hjónin vorum hjá Berki í dag. Algörlega frábært! Strákurinn er góður kennari og það er hrein unun að horfa á hann kasta. 

Allt of oft ber það við að við einblínum á það neikvæða í umhverfi okkar og samskiptum við náungann sbr. nýlega umræðu um slælega umgengni við Þingvallavatn og fleiri staði. Auðvitað er rétt að benda á það sem betur má fara og þá líka….. það sem vel er gert.

Í nýjasta tölublaði Veiðislóðar, sem laumaðist í pósthólfið mitt í dag er einmitt ágæt grein um það hvenær vöðlurnar okkar eru ónýtar. Skemmtileg tilviljun ef ekki væri nema fyrir það að ég upplifði ótímabært andlát neophrene vöðlanna minna um síðustu helgi. Stígvélin einfaldlega fóru að leka víðsvegar án nokkurra sýnilegra áverka. Auðvitað fannst mér þetta frekar dapurt af ‚nýjum‘ vöðlum að vera svo ég ákvað að renna með þær, þó ekki væri nema til að sýna strákunum í Vesturröst hvernig þær hefðu farið án þess endilega að gera ráð fyrir einhverjum greiða í staðinn. En, það var nú öðru nær. Menn tóku málið föstum tökum af mikilli fagmennsku og voru fljótir að greina meinið og buðu mér nýjar vöðlur með lítilli milligjöf. Þar sem ég er með eindæmum kulvís, urðu nýjar Airflo neophrene vöðlur fyrir valinu og nú bíðum við, ég og vöðlurnar bara eftir næsta veiðitúr með óþreyju. Flott og góð þjónusta, lofið hljóta þeir sem eiga það.

Allt varð fullt á fyrsta námskeiðinu hjá Berki Smára á þriðjudaginn, en örvæntið ekki því auka byrjendanámskeið verður n.k. miðvikudag 11. júlí! Nú er bara að rífa sig upp úr sófanum og smella sér á námskeið.

Byrjendanámskeið eins og það sem var haldið síðastliðinn þriðjudag verður haldið miðvikudaginn 11. júlí. Nánari lýsingu er hægt að nálgast á heimasíðu Barkar undir Kastnámskeið í júlí. Skráning er á borkur.smari@gmail.com eða í síma 666-1990.

Svo hef ég öruggar heimildir fyrir því að strákurinn er með nokkuð skemmtilegt í bígerð næstu daga og vikur, fylgist með.

Aldrei verður góð vísa of oft kveðin. Að heimsækja góðan kastkennara er gulls í gildi. Nú ætlar Börkur Smári Kristinsson, FFF flugukastkennari að halda námskeið fyrir byrjendur og lengra komna á Miklatúni í júlí. Tímasetningin á þessum námskeiðum er alveg hreint frábær, öll byrja þau kl.19 og standa í 2 klst. þannig að enginn hefur afsökun fyrir því að komast ekki sökum vinnu.

Nú er bara að drífa sig, hvort sem þú ert byrjandi eða lengra kominn, það hafa allir gott af því að fá smá tilsögn þó ekki væri nema til að leiðrétta einhverjar villur sem hafa grafið um sig í kastinu. Allar nánari upplýsingar á blogginu hans Barkar sem má nálgast hérna.

Veiðidagur fjölskyldunnar verður haldinn næstkomandi sunnudag, 24. júní. Þessi árvissi viðburður er tilvalinn fyrir þá sem vilja kynna sér stangveiði eina dagstund án endurgjalds. Fjöldi vatna, 28 að tölu verða opin almenningi; Elliðavatn, Vífilstaðavatn, Meðalfellsvatn, Þingvallavatn fyrir landi Þjóðgarðsins , Úlfljótsvatn, Geitabergsvatn, Þórisstaðavatn, Eyrarvatn, Langavatn á Mýrum, Hítarvatn, Vatnasvæði Lýsu, Hraunsfjarðarvatn, Baulárvallavatn, Haukadalsvatn, Vatnsdalsvatn í Vatnsfirði, Syðridalsvatni í Bolungarvík, Hópið, Höfðavatn, Vestmannsvatn, Botnsvatn, Ljósavatn, Hraunhafnarvatn, Æðarvatn, Arnarvatn, Kringluvatn, Urriðavatn, Langavatn í Breiðdal, Víkurflóð og Þveit. Nánar um veiðidaginn á heimasíðu LS og í bæklingi sem nálgast má hér.

Við hjónin áttum frábæra 2ja klst. stund með Stefáni B. Hjaltested seinni partinn í dag. Það er hverjum manni hollt að leita til sér hæfari manna og Stefán kann svo sannanlega að koma fram með gagnlegar ábendingar um það sem betur má fara þegar kemur að flugukastinu. Það sem stendur uppúr hjá mér er lélegt aftara stopp og laus úlnliður, þar hafið þið það. Nú verður kaststíllinn settur undir smásjánna á næstunni og stefnan tekin á að laga lausan úlnliðinn. Ætli næsta grasflöt fái ekki að finna fyrir æfingunum næstu kvöld.

Til þeirra sem þora að takast á við eigin misbresti í flugukasti og fá gagnlegar ábendingar beini ég þeirri áskorun að setja sig í samband við Stefán í síma 553-1329 / 862-1329. Að fá því næst sem einkakennslu (2-3 í hópi) þar sem hann einbeitir sér að hverjum þátttakenda fyrir sig er ómetanlegt og flugurnar hjá karli eru heldur ekki neitt slor. Viltu eignast 1.flokks flugur á frábæru verði? Þá er Stefán maðurinn.

Núna þarf ég að leggjast í svolitla naflaskoðun, stífa úlnliðinn af og renna yfir eldri greinar um kasttækni og misbresti. Hver veit nema ég líti þær öðrum augum eftir þessa gæðastund með Stefáni. Meira um það síðar.

Ummæli

31.05.2012 – Árni Jónsson: Áhugavert að þú skulir einmitt nefna þetta með úlnliðinn. Þar sem að ég er nú svo heppinn að vera með æfingasvæði við hliðina á húsinu mínu, eyði ég miklum tíma einmitt þar til að einmitt vinna í þessu. Þess á milli er ég tíður gestur að viða að mér meiri fróðleik (lesist: hangi á síðunni þinni) og viti menn, rakst ég ekki á einn á YouTube sem að segir akkúrat hið mótstæða með úlnliðinn (YouTube). Þetta er greinilega ekki svo heilagt eins og ég einmitt hélt.