Ég hef verið að baksa við þurrflugurnar í morgun, en nú er mér öllum lokið. Þær hafa allar drukknað og sú síðasta sem ég prófaði í vatnsskálinni var svo örugg um að hún færi sömu leið og systur sínar að hún tók með sér björgunarhring.

Ég verð víst að endurskoða eitthvað fjaðrirnar mínar og aðferðir ef ég ætla að veiða eitthvað á þurrflugu næsta sumar.

.

Ummæli

24.11.2012 – Hilmar: Nei nei nei, þú ert rétt að byrja. Lenti í svipuðu dæmi þegar ég var að byrja! En þetta reddar málinu: Árvík  Aðeins nánar ( sjá HOW TO USE): Loonoutdoors Þetta svínvirkar.

mbk, Hilmar

24.11.2012 – Hilmar: En ATH ekki nota Hydrostop á CDC fjaðrir, það eyðileggur þær.

mbk, Hilmar

Svar: Já, frúin kom með undradolluna sína og smurði einhverju á eitt kvikindið og sú lifði í það minnsta 2 klst. í baðinu án þess að sökkva. Kannski á ég mér einhverja von, verð að prófa þetta. Takk fyrir ábendingarnar.

E.S. það sem frúin lumaði á er: FlyTop 

Nú er ég búinn að uppfæra flugulistann hér á síðunni með myndum af öllum flugunum. Eftir sem áður er listinn í stafrófsröð og tenglar úr honum yfir á uppskriftir og upplýsingar um allar flugurnar. Flugulistann má nálgast í valmyndinni hér að ofan eða einfaldlega með því að smella hér.

Úr fréttatilkynningu Veiðikortsins: Veiðikortið ehf. og Veiðifélag Elliðavatns hafa skrifað undir samning til þriggja ára um aðild Elliðavatns að Veiðikortinu og tekur samningurinn gildi strax á komandi veiðitímabili. Veiði hefst í vatninu Sumardaginn fyrsta 2013. Svæðið sem um ræðir er Elliðavatn, Helluvatn, Hólmsá auk Nátthagavatns.

Meira um þessi stórskemmtilegu tíðindi á veidikortid.is

Nú er að hefjast póstleikur veida.is þar sem heppnir þátttakendur geta unnið sér inn glæsilegt flugubox úr smiðju Júlla í Flugukofanum. Til að komast í pottinn þarf, eins og kemur fram á vef veida.is, aðeins að gera eitthvað eitt af eftirfarandi:

• Skrá þig á póstlistann
• Deila þessari frétt meðal vina þinna
• Senda fréttabréf veida.is áfram til einhvers sem þú telur að vilji skrá sig á póstlistann

Meðal kosta póstlistans: Frítt fréttabréf – upplýsingar um ný veiðileyfi og veiðisvæði – aðgangur að tilboðum veiða.is.

Nú hafa Flugur og skröksögur eignast sitt eigið lén: fos.is Gamla slóðin (https://kristjfr.wordpress.com) en enn í fullu gildi en auðvitað mun auðveldara að muna þá nýju. Eins og Bo sagði  um árið; Nýr jakki, sama röddin.

Ummæli

22.10.2012 – Guðmundur: Það er allt annað að sjá þig…..
kv Guðmundur

Svar: Já, segðu.

Kannski eru flestir veiðimenn skriðnir í vetrarhýðið, en fyrir okkur sem erum ennþá vakandi er ýmislegt áhugavert að gerast þrátt fyrir að veiðitímabilinu sé að mestu lokið. Sem dæmi um frábæra haust skemmtun má nefna að urriðinn á Þingvöllum, og eflaust víðar, sýnir sínar flottustu hliðar þessa dagana þegar hann leitar upp í Öxará til hrygningar. Stórkostlegt að sjá þá í bunkum í ánni, þó þeir hafi nú verið með rólegasta móti í kuldanum í gær þegar við hjónin renndum upp eftir. Í örstuttu spjalli við Jóhannes Sturlaugsson sem var við merkingar vildi hann þó meina að krafturinn mundi færast í hann aftur um næstu helgi þegar hlýnaði.

Fyrir þá sem ekki vilja eða hafa tök á að skoða urriðann á Þingvöllum má svo alltaf ylja sér innandyra við að fletta haustútgáfum veftímaritanna sem eru einmitt að hellast yfir okkur þessa dagana. Margt fróðlegt á ferðinni þar.