Það má með sanni segja að maður varð upprifinn eftir kynningu Geirs Thorsteinssonar á Elliðavatni í kvöld í húsakynnum SVFR, kærar þakkir fyrir mig. Stangaveiðifélagið og Veiðikortið eiga hrós skilið fyrir framtakið, vonandi verður framhald á að vatnaveiði verði gerð jafn góð skil og gert var í kvöld.
Tenglar á bæði Elliðavatnsbækling Geirs og Þingvallavatnsbækling SVFR eru nú komnir hér inn á síðuna og munu eiga sér fastan sess hér til hliðar ásamt bæklingi Veiðikortsins og öðrum vefbæklingum. Þeir sem ekki hafa enn kynnt sér þessa bæklinga eru hvattir til þess að hlaða þeim niður hið fyrsta.
Að gefnu tilefni og vegna nokkurra fyrirspurna sem mér hafa borist hef ég fengið staðfest hjá SVFR að fræðslukvöldið á morgun (13.03.2013) um Elliðavatn er opið öllum, ekki aðeins félögum SVFR. Nú er um að gera að drífa sig og heyra hvað Háskólarektor Elliðavatns, Geir Thorsteinsson hefur fram að færa í húsakynnum SVFR í Elliðarárdalnum kl.19:30.
Af vef Veiðikortsins: Fræðslukvöld hjá SVFR um Elliðavatn.
Það verður mikið um að vera á fræðslukvöldi Stangaveiðifélags Reykjavíkur á miðvikudagskvöldið 13. mars kl. 19.30. Þá mun Geir Thorsteinsson, sem þekkir Elliðavatnið sjálfsagt manna best, kynna fyrir veiðimönnum veiði í Elliðavatni. Vatnasvæðið hefur oft verið nefnt háskóli veiðimannsins þannig að þessi „kurs“ hlýtur að vera veiðimönnum kærkominn.
Ég fékk smá áskorun frá vini mínum á Fésbókinni þannig að í staðinn fyrir að lesa blaðið í morgun settist ég niður og skellti í eina flugu, algjörlega utan dagskrár. Það getur líka verið gaman að hnýta eitthvað sem ekkert vit er í.
Eins og glöggir lesendur síðunnar tóku eftir fyrir skömmu, fékk ég smá hjálp við hnýtingarnar sem urðu til þess að gamlir krókar dúkkuðu upp úr krókaboxinu mínu. Þegar ég réðst á hrúguna valdi ég þá leið að flokka krókana með einföldum samanburði, án þess að leiða nokkuð hugann að merktum stærðum þeirra. Það kemur e.t.v. engum vönum hnýtara á óvart að hrúgurnar mínar urðu nokkuð fleiri heldur en merkingarnar í boxinu sögðu til um. Sem dæmi get ég nefnt að af #12 sem ég taldi mig eiga í lengdum Standard, 1XL og 2XL komu fimm hrúgur. Áferð krókanna sagði mér auðvitað að hér væru í það minnsta 3 mismunandi framleiðendur á ferðinni og lengdirnar töluvert mismunandi hjá þeim öllum. Þannig endaði ég með einhverjar millistærðir þegar ég var búinn að taka frá þá styðstu, miðlungs og lengstu.
Krókur
Auðvitað vaknaði forvitnin hjá mér og ég lagðist í netið í skýringaleit. Sem sagt; smátt og smátt hafa framleiðendur reynt að sammælast um hver stærð önguls #10 sé, þ.e. bilið á milli odds og leggjar ( 8 á myndinni hér til hliðar ) og útbúa einhvern staðal þannig að þegar við kaupum #10 frá Mustad er bilið jafn stórt og á #10 frá Kamasan. Svo virðist sem frændur okkar í Noregi hafi vinninginn því flestir framleiðendur hafa sæst á að nota stærðarflokkun Mustad sem viðmið.
Þessar aðlaganir framleiðenda hafa orðið þess valdandi að nokkuð reglulega hafa krókar framleiðenda skipt um vörunúmer og stærðarflokkun síðustu árin með tilheyrandi óþægindum fyrir veiðimenn en á sama tíma hafa stærðirnar staðlast. Aftur á móti virðist vera aðeins lengra í það að framleiðendur komi sér saman um samræmda merkingu fyrir lengd króka, þar kennir ennþá ýmissa grasa sem ég fékk sko heldur betur að kenna á þegar ég sorteraði hrúguna mína. Ég sem sagt sat uppi með mun fleiri lengdir í hverri stærð heldur en ég hafði nokkurn tímann keypt.
Á öllu þessu rápi mínu um netheima hrasaði ég auðvitað um alls konar samanburðartöflur á krókum ýmissa framleiðenda, sumar flóknari heldur en aðrar, aðrar einfaldari. Til gamans tók ég nokkrar þessara taflna, sneið af þeim króka sem mér þóttu utan áhugasviðs og framleiðendur sem ég hef aldrei heyrt nefnda. Úr varð mini-útgáfa sem hef sett hér á síðuna undir Töflur / Krókar. Til að einfalda samanburð smellti ég síðan myndum af umræddum krókum inn í töfluna til glöggvunar.
Nú er komið að því, RISE 2013 verður haldin í Bíó Paradís, fimmtudagskvöldið 7. mars. Eins og fram kemur í fréttatilkynningu frá Stjána Ben. opnar húsið kl.19 en sýningar hefjast kl.20.
Svona litu nú önglarnir mínir út þegar ég var búinn að sópa þeim saman af gólfinu í hnýtingarhorninu mínu í morgun. Ég á nefnilega ketti sem greinilega ætluðu að hjálpa mér eitthvað við hnýtingarnar og steyptu önglaboxinu mínu í gólfið í nótt sem leið. Eins gott að ég er búinn að hnýta vel á annað hundrað flugna, nú eru bara u.þ.b. 300 stk. til að sortera niður í stærðir í kvöld.
Nú er komið að því, RISE 2013 verður haldin í Bíó Paradís, fimmtudagskvöldið 7. mars. Eins og fram kemur í fréttatilkynningu frá Stjána Ben. opnar húsið kl.19 en sýningar hefjast kl.20.
