Fluguveiði – Síða 62

Vífó, 9.apríl

9. apríl 2012

Veiði

Upp

Forsíða

Smelltu fyrir stærri mynd

Það er spurning hvort maður viljið nokkuð viðurkenna þessa ferð sem veiðiferð, kannski var þetta bara kastæfing. Annars skartaði vatnið sínu fegursta rétt fyrir hádegið í dag, nokkrir veiðimenn á stjái en lítið um fisk. Lofthiti var í lægra lagi, vindur nokkur á köflum og vatnið hreinlega skítkalt. Við hjónin komum okkur fyrir undir bökkunum að norðan og þreifuðum fyrir okkur frá miðju vatni og austur eftir. Lítið líf, sá til tveggja fiska sem héldu sig nokkuð djúpt, ef það er þá hægt að tala um dýpi í Vífó. Svolítið af flugu komin á stjá, en vatnið mjög kalt og því kaldara sem utar og nær suðurbakkanum dró. Af þeim veiðimönnum sem við tókum tali hafði enginn orðið varð, hvorki að sunnan, austan né norðan, en einhverjar fregnir voru af tveimur bleikjum sem komu á lang snemma í morgun. Jæja, það gengur bara betur næst.

Veiðitölur ársins

Bleikjur Sleppt Urriðar Sleppt Fj.ferða Núllað

– – 2 1 3 1

Ummæli

12.04.2012 – Veiði #1: Sæll, mig langar bara að hrosa þer fyrir þessa frabæru siðu, eg dett her inn a hverjum degi. Þetta er sennilega eina siðan a islandi sem segir fra veiði i votnum. Og er froðleikurinn sem kemur her inn alveg frabær. Takk fyrir mig og haltu afram að gera goða hluti.

Svar: Takk fyrir þetta. Ég væru auðvitað að ljúga ef ég viðurkenndi ekki að mér þætti hrósið gott. Og, jú, ég reyni að halda áfram eins lengi og mér finnst ég hafa eitthvað fram að færa

Bestu kveðjur og takk fyrir innlitið,

Kristján

Höfundur:

Kristján Friðriksson
Að komast á lappir

9. apríl 2012

Hnýtingar

Upp

Forsíða

Kaufmann’s Stone Fly

Það eru ekki aðeins púpur sem verða líflegri með gúmmílöppum, straumflugur eins og t.d. Nobbler, Damsel og Wooly Bugger öðlast nýtt líf í vatninu þegar skotið hefur verið undir þær löppum. Þegar ég prófaði mig áfram með gúmmílappirnar skaut fyrst upp í huga mér; Bölvað vesen er þetta, Hvort á ég að setja lappirnar á undan eða á eftir? Undir eða ofaná? Hvernig á ég að ná þeim jöfnum til allra átta?

Eftir að hafa böðlast í gegnum allskonar leiðbeiningar, skoðað ógrynni af myndböndum þá varð mín niðurstaða sú að hafa fjaðurtöngina (Hackle Plier) tiltæka ásamt nokkrum afskornum drykkjarstráum í mismunandi sverleika til að hemja lappirnar á meðan ég hnýtti þær niður og umfram allt, lappirnar síðast eða næstum því.

Smellið fyrir stærri mynd

Smellið fyrir stærri mynd

Annars hjálpaði Davie McPhail mér mest eins og svo oft áður með að ná einhverju viti í vinnubrögðin. Hér að neðan má líta hvernig hann fer að því að festa lappir á Gnasher Sedge Hog (u.þ.b. á hálfu elleftu mínútu). Í meðförum Davie er þetta ekkert mál en hjá mér varð þetta hrein kvöl og pína, en æfingin er sögð skapa meistarann.

Höfundur:

Kristján Friðriksson
Meðalfellsvatn, 8.apríl

8. apríl 2012

Veiði

Upp

Forsíða

Til að rýma til fyrir meira súkkulaði brugðum við hjónin okkur í Kjósina upp úr kl.15 í dag. Veðrið var alveg ágætt, gekk á með sólarglennum og örlítilli golu. Hitastigið var þetta rétt rúmlega 3°C á mæli en virkaði alls ekki svo svalt. Þar sem vindáttinn var af vest-suðvestan komum við okkur fyrir undir hlíðinni að sunnan, einu veiðimennirnir á staðnum. Og til að gera langa sögu stutta, frúin kvittaði í veiðibók ársins með tæplega punds urriða sem hún tók á svarta mjónu með gyltum kúluhaus. Að þessu sinni var fiskurinn settur undir smásjánna og magainnihald skoðað; eitthvað af lirfum (lítið þó) en aðallega kuðungur.

Annars virðist lífríkið vera að taka svolítið við sér, hettumáfurinn mættur á staðinn ásamt sílum og seiðum sem héldu til við bakkana. Sko, ég sagði að sumarið yrði snemma á ferðinni, mér er alveg sama hverju veðurfræðingar spá fyrir næstu daga.

Veiðitölur ársins

Bleikjur Sleppt Urriðar Sleppt Fj.ferða Núllað

2 1 2

Höfundur:

Kristján Friðriksson
Silungur að vori

6. apríl 2012

Fiskurinn

Upp

Forsíða

Urriði

Það liggur það orð á silunginum næstu vikurnar að hann sé alls ekki eins var um sig eins og þegar líða fer á sumarið, en það þýðir nú samt ekki að hann sé í einhverjum sjálfsmorðshugleiðingum. Við þurfum eftir sem áður að fara varlega að honum og umfram allt rólega. Lífríkið fer rólega af stað, mun rólegar heldur en við veiðimennirnir eftir veturlangan sult í veiði.

Eitt af því sem við þurfum að glíma við er þetta vandamál með línuna, tauminn og taumendann. Þetta vill allt stífna í köldu vatninu og skilja eftir sig rákir og slóða þar sem við viljum síst sjá þær. Því er ráð að finna til alla mjúku taumana og taumendana til að nota fyrst á vorin.

Í köldu vatninu heldur fiskurinn sig mjög neðarlega í vatninu, kannski þetta fet til tvö frá botninum og bíður þess að eitthvert æti syndi hjá. Það er ekki mikil fart á honum og því þurfum við að gíra okkur aðeins niður til að ofbjóða honum ekki. Hægur inndráttur með þokkalega þyngdum púpum og umfram allt, litlum. Það er ekki mikið um ofvaxnar lirfur á ferðinni svona snemma, það sem er á ferðinni er enn lítið og oft rautt eða svart. Það er sjaldnast ástæða til þess að taka öll fluguboxin með sér fyrstu dagana, fáar en vel valdar flugur sem líkja eftir lirfum í vetrarhýði ættu að duga og svo einn og einn Nobbler ef einhver seiði eða síli eru á stjái.

Tökurnar eru grannar þannig að stutt köst með strektri línu eru líklegri til að leiða nartið upp í fingurgómana á okkur heldur en löng köst og mögulegur slaki. Við getum leyft okkur að veiða stutt að vori því eins og ég nefndi í upphafi, þá er silungurinn ekki eins var um sig og hreyfir sig ekki fyrr en í fulla hnefana, hans fyrsta hugsun er enn orkusparnaður.

Höfundur:

Kristján Friðriksson
#5 Í beinni línu

3. apríl 2012

Kast

Upp

Forsíða

Til þess að geta framkallað þröngt kasthjól verður stangartoppurinn að ferðast í beinni línu. Ferill sem fellur í miðjunni kallar fram vindhnúta. Við höfum farið í gegnum þetta í grundvallarreglu #3. En það er önnur bein lína sem ferillinn okkar ætti að fylgja, sá sem við gætum komið auga á ef við værum staðsett fyrir ofan stöngina og horfum niður á kastið. Náum við að halda ferlinum í bæði láréttu og lóðréttu plani, uppskerum við þröngt kasthjól, þröngan línuboga og við eigum mun meiri séns á móti vindi. En það er annar kostur við þröngan línuboga, það er mun auðveldara að stjórna framsetningu flugunnar undir þröngum línuboga heldur en víðum. Víður línubogi er líka ávísun á að við missum línuna niður í fram- eða bakkastinu og við förum að glíma við sama vandann og við lýstum í grundvallarreglu #2.

Og svona hljóðar síðasta af grundvallarreglum Gammel feðganna eftir að ég hef stytt og sagt með mínum orðum nokkrar af þeim greinum sem skrifaðar hafa verið um The Essentials of Fly Casting. Klippurnar sem ég hef látið fylgja þessum greinum eru úr myndinni Casts that Catch Fish frá On the Fly Production þar sem Carl McNeil fer á kostum í frábærum sýnidæmum.

Höfundur:

Kristján Friðriksson
Meðalfellsvatn, 1.apríl

1. apríl 2012

Veiði

Upp

Forsíða

Oft hefur nú fyrsti dagur í veiði verið hráslagalegri heldur en dagurinn í dag. Veiðifélagið tók sig til í allri sinni mannmergð og tróð sér, stöngum, vöðlum og öðrum græjum í jepplinginn og tók stefnuna á Kjósina þennan fyrsta dag í vertíð. Miðað við árstíma getur víst enginn kvartað undan veðrinu, þokkalega hlýtt og gola með köflum.

Mannmergðin við vatnið var slík að engu var líkara heldur en Bubbi sjálfur væri með útitónleika á staðnum. Menn sitt hvoru megin við Bugðuós og alveg inn eftir ströndinni að norðan. Það var líka staðið þétt undir hlíðinni að sunnan þannig að við ákváðum að koma okkur fyrir á tánni gengt syðri bátaskýlunum og dreifðum úr okkur eins og kostur var. Ég hrökklaðist aðeins undan suð-vestanáttinni út á grynningarnar utanvert í víkinni. Hefði viljað koma flugu upp í vindinn en var ekki alveg að ná þeim köstum sem ég vildi svo ég lét bara vaða undan vindi út í dýpið. Prófaði Héraeyra, Pheasant Tail en tók svo loksins einn rúmlega pundara (urriða) á Svarta og rauða mjónu (Buzzer) sem hann hefur væntanlega tekið í misgripum fyrir mýlirfu. Samkvæmt venju fékk fyrsti fiskur ársins líf og ég sá ekki betur en hann hafði verið frelsinu feginn.

Ekki fór neitt meira fyrir veiði í okkar hópi, raunar held ég að lítið hafi komið á land þennan fyrsta dag. Vonandi þó nóg til að viðhalda áhuga manna þangað til fiskurinn fer að gefa sig að ráði.

Aðeins eitt að lokum: Það er ekki oft sem maður er óhress með traffíkina á blogginu, en mér finnst nú eins og þeir 203 (þegar þetta er skrifað) sem höfðu ekkert annað að gera í dag heldur en kíkja inn hefðu átt að láta slag standa og skella sér í veiði í stað þess að vafra á netinu 🙂 Nei, annars, takk fyrir öll innlitin á árinu; 14.082 fyrstu þrjá mánuðina.

Veiðitölur ársins

Bleikjur Sleppt Urriðar Sleppt Fj.ferða Núllað

1 1 1

Ummæli

Árni Jónsson 03.04.2012 – Fór Vífilstaðarvatn og þótt að fjöldi hafi verið, þá var það þolanlegt. Urðum ekkert varir, en aðeins ein bleikja rétt yfir pundi var kominn á land. Veðrið var fallegt með lítilli golu, og ekki laust við að þungu fargi vetrar sé af manni létt.

Höfundur:

Kristján Friðriksson