Jamm, það er 30.september í dag og síðasti sjéns að bregða sér í megnið af vötnunum á Veiðikortinu. Þrátt fyrir að mjög hefur dregið úr veiði síðustu vikur, þá er alltaf von. Vötnin sem loka eftir daginn í dag eru; Kleifarvatn á Reykjanesi, Úlfljótsvatn, Ljósavatn, Arnarvatn, Hraunhafnarvatn, Æðvarvatn, Baulárvallarvatns, Haukadalsvatn, Hraunsfjarðarvatn, Hraunsfjörður, Vatnsdalsvatn í Vatnsfirði, Laxárvatn og Hólmavatn í Dölum, Kleifarvatn og Mjóavatn í Breiðdal og Þveit við Hornafjörð.

Ekki má gleyma því að sum þessara vatna eru fiskgeng frá sjó og því ekki loku fyrir það skotið að hægt sé að krækja sér í einn slíkan, svona að hausti. Svo eru haustlistaferðir alltaf ágæt afsökun.

Ef maður er nú á bjartsýnu nótunum þá er ekki alsæmt að liggja í rúminu með flensu, þ.e. svo lengi sem maður hefur eitthvað fyrir stafni. Nú á þriðja degi flensu hefur mér tekist að klára ríflega 30 greinar fyrir bloggið sem duga að mestu til loka ársins, á bara eftir að skrifa jólakveðjuna. Slatti af flugum, fullt af þurrflugupælingum, ýmislegt um tauma, flugustangir og ýmislegt annað sem ég hef átt í uppkasti síðustu mánuði. Svo sjáum við bara til hvað dettur inn þegar ég fer að fikta við væsinn á næstu vikum og hef lokið við lestur nokkurra bóka sem bíða eftir mér. Það er alltaf eitthvað….

Áfram heldur útgáfa Veiðislóðar og nú er 4.tbl. ársins komið á netið. Nú getur maður víst örugglega sagt; að vanda er efnið og frágangur frábær og ættu allir að finna eitthvað áhugavert í blaðinu. Af greinum í þessu tölublaði má nefna; Fjölskylduveiði í Frostastaðavatni, Vöðluskórnir og Meðferð afla. Tölublaðið má skoða hér.

Annað árið í röð standa veiðirétthafar Hlíðarvatns í Selvogi fyrir opnum degi og bjóða öllum sem vilja að reyna fyrir sér í vatninu. Þrátt fyrir sterka umræðu um aflabrest í vatninu nú í sumar, í það minnsta annað sumarið í röð, þá er vatnið og umhverfi þess eftir sem áður eitt það fallegasta sem veiðimönnum býðst hér sunnan- og suðvestanlands.

Boðið stendur nú á sunnudaginn, 26.ágúst og verður opið í vatnið frá 10 – 17. Flestir ef ekki allir veiðirétthafar verða á staðnum og opna hús sín; Stangaveiðifélag Selfoss, Stangveiðifélag Hafnarfjarðar, Ármenn og Árblik. Þeim sem ekki þekkja til vatnsins er bent á prýðilega umfjöllun Ármanna sem má nálgast hér , kynningu veida.is á svæði Árbliks eða kíkja á smá umfjöllun hér á blogginu. Allar nánari upplýsingar má finna á heimasíðum veiðirétthafa hér að ofan.

Fjöldi ókeypis tímarita á netinu er sífellt að aukast og ég hef reynt að fylgjast með þeim og setja inn tengla á þau eins og mér er frekast unnt. Flest þessara tímarita eru aðgengileg án innskráningar, en svo eru líka til þau sem maður verður að skrá sig inn á. Eitt þeirra er The Contemporary Sportsman sem í síðustu tveimur tölublöðum er með nokkuð skemmtilegar greinar um Laxá í Aðaldal. Þriðja og síðasta greinin mun svo birtast í næsta tölublaði.

Ég hef verið skráður fyrir þessu vefriti í nokkurn tíma og ekki orðið var við neitt bögg eða vesen af þeirra hálfu og því þori ég alveg að mæla með því að menn skrái sig inn á síðuna þeirra fyrir áskrift hérna.

Að halda úti bloggi er góð skemmtun og sérstaklega þegar það virðist vekja einhverja eftirtekt og einhverjum ánægju. Í gær, föstudaginn 20.júlí kom nokkuð óvæntur toppur í heimsóknirnar á bloggið.

783 heimsóknir á einum degi, fyrra metið var 533 frá því um svipað leiti í fyrra og nú hafa innlitin á bloggið skriðið yfir 85.000 frá því ég byrjaði á þessari dellu í maí 2010. Ég hef sagt það áður og segi það enn, mín laun fyrir þetta spjall eru heimsóknirnar og mér finnst eins og ég hafi fengið einhvers konar jólabónus í gær.

Ég hafði hugsað mér að launa lesendunum mínum innlitin þegar nýjum toppi væri náð og nú fer ég á fullt að skoða málið í samvinnu við góða aðila. Meira um það þegar málin skýrast. Bestu þakkir fyrir mig, nú er ekkert annað að gera en að setjast niður og sjóða saman greinar fyrir næstu vikur…. gott að nýta rokið og rigninguna til þess svona inn á milli veiðiferða.

Ummæli

21.07.2012 – Gústaf Ingvi: Þetta er líka stór skemmtileg síða hjá þér og áttu hrós skilið fyrir. keep up the good work 

23.07.2012 – Sigurjón: Þetta er frábær síða sem ég er farinn að lesa reglulega svo það er ekkert skrýtið að hún sé farin að vekja athygli. Takk fyrir mig.