Nú þegar yfirferð allra tölvupósta og ólesinna bloggfærslna eftir viku fjarveru er lokið (alltaf gott að hvíla sig aðeins á tölvunni) þá er mér ofarlega í sinni umræðan sem fór á flug í lok síðustu viku um Hlíðarvatn í Selvogi. Því miður fór það nú ekki svo að ég kæmist í Hlíðarvatnið í þessari viku eins og ég hafði boðað, en það stendur sko til bóta; mánudagurinn skal það vera og ekki dregur þetta glæ nýja myndband frá Gústaf Gústafssyni úr manni. Svei mér ef Gústi hefur ekki tekið daginn sem ég ætlaði að fara, en tilhlökkunin fyrir mánudeginum er gríðarleg….

Veiðidagur fjölskyldunnar verður haldinn næstkomandi sunnudag, 30. júní. Þá gefst landsmönnum kostur á að veiða án endurgjalds í fjölmörgum vötnum víðsvegar um landið.

Eftirtaldir veiðistaðir verða í boði frítt fyrir alla fjölskylduna:

• Suðvesturland: Elliðavatn, Meðalfellsvatn, Þingvallavatn fyrir landi Þjóðgarðsins og Úlfljótsvatn.
• Vesturland og Vestfirðir: Geitabergsvatn, Þórisstaðavatn, Eyrarvatn, Langavatn á Mýrum, Hítarvatn, Vatnasvæði Lýsu, Hraunsfjarðarvatn, Baulárvallavatn, Haukadalsvatn, Vatnsdalsvatn í Vatnsfirði og Syðridalsvatn í Bolungarvík.
• Norðurland: Hópið, Höfðavatn, Vestmannsvatn, Botnsvatn, Ljósavatn, Hraunhafnarvatn, Æðarvatn, Arnarvatn og Kringluvatn.
• Austurland: Urriðavatn, Langavatn, Víkurflóð og Þveit.

Ekki amalegt að kynna sportið fyrir allri fjölskyldunni á sunnudaginn. Allar nánari upplýsingar í bæklingi Landssambandsins sem má nálgar hér.

Miðað við höfðatölu þá eigum við Íslendingar trúlega flesta vottaða FFF kennara í heiminum og nú hafa þeir allir tekið höndum saman og boða til kastkeppni á morgun, laugardaginn 1.júní kl.11 á bak við Skautahöllina í Laugardal. Væri nú ekki tilvalið fyrir þá sem eru á ferðinni í bænum að taka þátt.

Þeir Börkur og Hilmar verða með allar græjur á staðnum og öllum sem geta kastað með flugustöng er boðið. Ekkert þátttökugjald, bara mæta í regngallanum og spreyta sig í lengdarköstum, markhittni og í gegnum gjörð. Ekki skemmir fyrir að það eru flottir vinningar í boði frá Veiðivon, Veiðihorninu, Veiðiflugum, Útilíf og Vesturröst. Meira að segja síðasta sætið fær vinning.

Nú eru 14 gallvaskar konur að byrja að pakka niður fyrir Kastað til bata 2013, 4.júní er jú rétt handan við hornið. Og talandi um að pakka niður og hornið, Veiðihornið og Sage hafa árum saman stutt dyggilega við bakið á Kastað til bata og þetta árið er engin undantekning. Næstu helgi verða Sumardagar Veiðihornsins og margt góðra gesta munu heimsækja verslunina og þar á meðal Jerry Siem frá Sage sem kemur með glæsilegan glaðning í farteskinu til handa Kastað til bata á Íslandi, tvær glæsilegar Sage Grace flugustangir sem stelpurnar taka til kostanna í Laxá í næstu viku. Það verður örugglega glatt á hjalla á sunnudaginn upp úr kl.14 þegar fulltrúar Kastað til bata mæta á staðinn.

Veiðihornið færir svo öllum þátttakendum flugubox með sérstaklega vel völdum flugum til að taka með sér í Laxánna. En við sem heima sitjum þurfum ekki að örvænta því við getum fest kaup á Kastað til bata boxum í Veiðihorninu og hjá Krabbameinsfélaginu með úrvali Krabbameinsflugna. Sláum nú fjölda flugna í einu höggi, gleðjum einhverja góða veiðikonu og styrkjum gott málefni.

Auk Jerry Siem munu Simon Gawesworth frá Rio, Ingimundur frá Veiðikortinu og Einar Guðna frá Veiðiheimi ásamt fjölda annarra veiði- og flugugúrúa verða á vappi í Veiðihorninu í Síðumúla um helgina. Spennandi dagar framundan. Dagskránna í heild má sjá hér.