Það er engan bilbug að finna á þátttakendum Febrúarflugna því nú erum fylgjendur viðburðarins orðnir 230, hnýtararnir 53, flugurnar nálgast óðfluga 400 stk. og enn eru tvö Febrúarflugukvöld eftir í Árósum Ármanna. Á morgun bregðum við ekkert út af vananum því þá mætir á staðinn landsþekktur hnýtari með afsprengi sitt í farteskinu; Sigurður Héðinn (Siggi Haugur) verður á staðnum með aldamótafluguna Hauginn. Hver veit nema aðrir fjölskyldumeðlimir mæti einnig því Haugurinn á sér systur sem heitir Von, náfrænda sem nefnist Gosi og eitthvað er Skuggi líka tengdur fjölskyldunni.

Að sjálfsögðu eru allir velkomnir og hnýtarar hvattir til að taka með sér tól og tæki, smella í eins og eina eða fleiri flugur því það er alltaf tími fyrir flugu.

Á miðvikudaginn höldum við síðan uppskeruhátíð í Árósum með sérstaklega góðum gesti sem allir áhugamenn um flugur og fluguhnýtingar þekkja, meira um það síðar.

Ármenn eru stoltir styrktaraðilar Febrúarfluga, enda í anda starfsemi Ármanna að auka áhuga og hróður fluguveiði og öllu því jákvæða sem fylgir þeirri íþrótt.

Því eru Ármenn ánægðir með að tilkynna samkeppni tengda Febrúarflugum sem þeir kalla Hlíðarvatnsflugan 2018.

Ármenn munu veita verðlaun fyrir þá flugu sem talin er líklegust til að virka vel í Hlíðarvatni á komandi sumri.

Reglurnar eru ósköp einfaldar. Allar flugur sem eru hnýttar í tengslum við Febrúarflugur og hafa verið settar inn á Facebook eru gjaldgengar. Dómnefnd þriggja Ármanna með áralanga reynslu af Hlíðarvatni metur flugurnar. Dómnefndin hefur algjörlega frjálsar hendur með val á sigurvegara og er niðurstaða dómnefndar endanleg.

Verðlaunin eru ársaðild að Ármönnum (félagsgjald 2018) ef sigurvegarinn er ekki þegar félagi eða  dagur í Hlíðarvatni (3 stangir).

Myndin sem fylgir þessari tilkynningu sýnir minnigaskjöld fyrir eðal-Ármanninn Kolbein Grímsson. Þennan skjöld má finna við Kaldós við Hlíðarvatn. Það verður erfitt að hnýta betri flugu en Peacock sem Kolbeinn er höfundur að, en hver veit nema þessi keppni færi okkur eitthvað nýtt eða skemmtilega útfærslu af þekktri flugu.

Í kvöld er þriðja Febrúarflugukvöldið þetta árið í Árósum, Dugguvogi 13 kl. 20:00 og það má teljast skemmtileg tilviljun að seinni partinn í dag datt 300. flugan inn í átak ársins.

Í kvöld ætlar Kjartan Antonsson að leiða gesti um leyndardóma Zeldu, þ.e. flugunnar í Árósum og eflaust detta einhverjar flugur inn á hópinn á Facebook í lok kvöldsins því það verður örugglega hnýtt eitthvað á hliðarlínunni eins og venjulega.

Þriðja Febrúarflugukvöld ársins verður nú á mánudaginn í Árósum Ármanna að Dugguvogi 13. Að þessu sinni mun Kjartan Antonsson, höfundur Zeldu heimsækja okkur en sú fluga var trúlega mest á milli tanna bæði fiska og manna á liðnu ári. Saga Zeldu er nokkuð lengri en margir vilja halda, flugan var fyrst reynd árið 1999, en þá hafði Kjartan gengið með hugmyndina að henni í kollinum í einhver ár.

Þátttakendur í Febrúarflugum eru sérstaklega hvattir til að mæta með hnýtingagræjurnar með sér og smella í eins og eina eða fleiri flugur á milli þess sem þeir geta fylgst með Kjartani á skjánum. Auk þess eru allir áhugamenn um flugur og fluguhnýtingar ævinlega velkomnir til að fylgjast með því sem um er að vera á staðnum. Veðurútlitið ætti ekki að skemma fyrir, hitatölur í kortunum og skaplegt veður almennt.

Sem sagt; Mánudagskvöld kl.20 í Árósum, Dugguvogi 13.

Það sem af er Febrúar hafa 222 flugur verið lagðar fram í átakinu og það stefnir í metfjölda þetta árið ef fram fer sem horfir. Það er líka eftirtektrarvert að á bak við allar þessar flugur stendur 41 hnýtari og þar með er þegar slegið fyrra met sem var 38.

Aðstandandi Febrúarflugna er í skýjunum yfir þessari þátttöku og þakka þessar gríðarlega góðu undirtektir.

Eins og venjulega eru flugurnar færðar reglulega yfir í eitt safn á FOS.IS sem má nálgast hérna.

Á Febrúarflugukvöldi í Árósum, mánudaginn 12. febrúar gefst gestum kostur á að kynnast tilurð einnar af spútnik-flugum aldarinnar, Frigga. Höfundur Frigga, Baldur Hermannsson mætir í Árósa og segir frá tilurð flugunnar og sýnir gestum hvernig eigi að bera sig að við að hnýta hana svo vel sé.

Þeim sem þekkja til ætti ekki að koma á óvart að höfundinum er umhugað að flugan sé hnýtt rétt og úr réttum hráefnum. Þeir eru víst fáir veiðimennirnir sem hafa ekki í það minnsta reynt fluguna í fiski eða í hnýtingarþvingunni og lengi vel var talað um ‚leynivopnið Frigga‘ eða ‚ofurfluguna Frigga‘ og margar ótrúlegar sögur sem sagðar hafa verið af þessari flugu frá því uppvíst varð um tilvist hennar.

Af gefinni reynslu síðasta Febrúarflugukvölds, þá verður bætt við hnýtingaraðstöðuna því ljóst var að færri komust að heldur en vildu. Sem fyrr, þá er öllum heimill aðgangur, hvort heldur til að hlýða á og fylgjast með Baldri eða hnýta nokkrar flugur, já eða bara hvoru tveggja. Húsið opnar stundvíslega kl.20:00 og Árósar eru auðvitað í Dugguvogi 13.