Þeir eru nokkrir viðburðirnir sem eru á dagskrá í febrúar sem tengjast Febrúarflugum. Lesendur eru hvattir til að nýta sér þessa viðburði, allir eru þeir ókeypis, bæði sunnan og norðan heiða.

3. febrúar – Ármenn bjóða upp á ókeypis námskeið í Árósum, Dugguvogi 13 kl.20:00  Ármenn sjá um græjurnar fyrir námskeiðið en aðrir hnýtarar mæta með sitt.

10. febrúar – SVFR, Flugucastið og Haugur efna til hnýtingakvölds á American Bar kl.20:00. Fræðslunefnd SVFR sér um græjurnar.

11. febrúar – SVAK heldur Febrúarflugukvöld í Zontahúsinu, Aðalstræti 54 kl.20:00. Efni og áhöld á staðnum fyrir þá sem vilja prófa og nýta sér leiðsögn félagsmanna.

17. febrúar – Ármenn bjóða aftur upp á ókeypis námskeið í Árósum, Dugguvogi 13 kl.20:00  Ármenn sjá um græjurnar fyrir námskeiðið en aðrir hnýtarar mæta með sitt.

25. febrúar – SVAK heldur annað Febrúarflugukvöld í Zontahúsinu, Aðalstræti 54 kl.20:00. Efni og áhöld á staðnum fyrir þá sem vilja prófa og nýta sér leiðsögn félagsmanna.

Oft hafa Febrúarflugur farið af stað með hvelli, en aldrei eins og núna. Í lok fyrsta dags Febrúarflugna var búið að smella inn 54 myndum á hópinn á Facebook og það sem er sérstaklega ánægjulegt er að á meðal þessara flugna voru frumraunir nokkurra nýrra hnýtara. Allar flugurnar má finna hér á síðunni og svo auðvitað á hópinum á Facebook.

Eins og undanfarin ár, þá njótum við einstakrar velvildar styrktaraðila sem gera okkur kleift að veita nokkrum hnýturum viðurkenningar í lok mánaðarins. Að þessu sinni eru það Fishpartner, VEIDA.IS, Veiðiflugur, Veiðikortið, JOAKIM‘S og Vesturröst sem styrkja Febrúarflugur með sérstaklega veglegum hætti.

Langþráður draumur okkar að fá fleiri í lið með okkur að boða fagnaðarerindi fluguhnýtinga er að verða að veruleika þetta árið. Líkt og undanfarin ár, hafa Ármenn stutt dyggilega við átakið og það gera þeir einnig þetta árið. Í hópinn hafa nú bæst Stangaveiðifélag Akureyrar, Flugucastið, Stangaveiðifélag Reykjavíkur og Haugur. Þessir aðilar hafa boðað til hnýtingarviðburði í febrúar og bjóða öllum að slást í hópinn. Þessir viðburðir verða auglýstir reglulega hér á síðunni, á Facebook og Instagram.

Fyrsti viðburðurinn er á vegum Ármanna, mánudagskvöldið 3. febrúar kl.20:00 í Árósum, félagsheimili þeirra að Dugguvogi 13. Að venju hittast Ármenn á mánudagskvöldum til hnýtinga undir heitinu Skegg og skott, en að þessu sinni munu þeir félagarnir, Hjörleifur Steinarsson og Hjörtur Oddsson leiða föngulegan hóp Ármanna sem standa fyrir ókeypis námskeiði í fluguhnýtingum. Allar græjur verða á staðnum og efni til hnýtinga þannig að þeir sem vilja prófa þurfa bara að mæta og njóta. Að sjálfsögðu verður aðstaða til hnýtinga fyrir þá sem vilja koma með sínar eigin græjur og eigið efni.

Á næstu dögum munum við kynna sérstaklega þá aðila styrkja Febrúarflugur og bæta myndum af meistarastykkjum hnýtara hér inn á síðuna.

Fyrsta félagið sem setur viðburð á sína dagskrá í tilefni Febrúarflugna er Stangaveiðifélagið Ármenn, en þeir bjóða gestum og gangandi upp á ókeypis hnýtingarnámskeið, mánudaginn 3. febrúar kl.20:00 í félagsheimili sínu, Árósum sem er í Dugguvogi 13 í Reykjavík.

Ármenn hafa um árabil lagt Febrúarflugum lið sitt með ýmsu móti og þeir bregðast ekki þetta árið með þessu skemmtilega kvöldi. Það eru þeir Hjörleifur Steinarsson og Hjörtur Oddsson sem leiða hóp vaskra Ármanna sem leiðbeina byrjendum sem lengra komnum í að hnýta nokkrar vel valdar flugur í tilefni Febrúarflugna. Ármenn hafa tryggt sér #armenn til að merkja sín innlegg í átakið þetta árið og það verður spennandi að sjá hve margar flugur Ármenn og gestir þeirra leggja til átaksins sem hefst n.k. laugardag, 1. febrúar.

Allar nánari upplýsingar um Ármenn og þetta ókeypist hnýtingarnámskeið má finna á heimasíðu félagsins armenn.is , Fésbókarsíðu félagsins og auðvitað á Febrúarflugur.

Já, ég veit. Jólin eru búin og gott betur en það, en það er bara svona veður í dag að ég tók fram þessar tvær sem lúrðu í jólapakkaflóðinu og mér hefur ekki gefist tími til að lesa vel og vandlega.

Ég byrjaði á því að taka fram At the end of the line eftir hinn velska George Barron. Nú ætla ég að leyfa mér að sletta; My, Oh, My. Þessi bók er alveg hreint frábær lesning, hreint augnayndi og hafsjór fróðleiks fyrir þá sem unna klassískum votflugum í vatnaveiði. Fyrir utan það að George er afskaplega lunkinn hnýtari, þá hefur hann þá gáfu að geta sagt létt og lipurt frá upplifun sinni og reynslu. Ég mæli eindregið með þessari bók, gullmoli.

Eins og ég nefndi, þá er í bókinni að finna hafsjó fróðleiks um vatnaveiði og þá er nú ekki verra að hafa Veiðikortabæklinginn við höndina, fletta upp völdum vötnum og máta í huganum hvar, hver fluga gæti virkað. Enn hef ég ekki fundið það vatn sem þessar flugur ættu ekki samlegð með, hvað þá flugu sem ætti ekki virkar í þessum vötnum. Það verður notalegur laugardagur í kotinu í dag og hugurinn fyllist tilhlökkun fyrir næsta sumri.

Nú eru aðeins 26 dagar þar til Febrúarflugur hefjast og eflaust eru einhverjir byrjaðir að hnýta og mynda flugur til að setja inn á hópinn Febrúarflugur á Facebook.

Að þessu sinni freistum við þess að virkja stangaveiðifélög og hnýtingarhópa hringinn í kringum landið til að taka þátt, hver með sínu nefni og getu. Tölvupóstur hefur verið sendur á vel flest stangaveiðifélögin þar sem sú hugmynd er kynnt að hvetja félagsmenn sína til að merkja flugurnar með hashtag (#) sem tengist viðkomandi félagi. Jafnframt hefur félögunum verið boðið að efna til einhverra samkoma þar sem félagsmenn hittast, hnýta flugur eða njóta fræðslu af einhverju tagi sem tengist flugum eða fluguhnýtingum og kynna það í Febrúarflugum. Ef félögin kjósa að koma þessum viðburðum á framfæri þá er þeim boðið að senda FOS.IS skilaboð þar um og þetta verður auglýst í hópinum og hér á síðunni. Við bíðum spennt eftir viðbrögðum við þessari hugmynd okkar.

Ef þú, lesandi góður, ert meðlimur í hópi eða öðrum félagsskap sem kemur saman og hnýtir flugur, þá er þér einnig velkomið að senda okkur skilaboð og tilgreina hashtag þíns hóps og merkja þitt framlag til Febrúarflugna 2020 með því.

Annars verður átakið með nokkuð hefðbundnu sniði þetta árið, létt og lipurt og allir geta tekið þátt með því að skrá sig í hópinn á Facebook. Engin skuldbinding fellst í þátttökunni, en þeir sem leggja fram flugur eiga möguleika á að hljóta smá viðurkenningu fyrir frá styrktaraðilum átaksins.