Þær eru mismikið lesnar greinarnar sem koma hér á síðuna eins og gengur. Ein er sú grein sem hefur staðið upp úr síðustu vikurnar og það er uppskriftin að Burton. Þess er vert að geta að síðunni barst afskaplega vinsamlegur póstur um daginn frá höfundi flugunnar með góðu ítarefni um þessa mögnuðu flugu. Við höfum því uppfært uppskriftina og aukið við greinina. Smellið hér til að skoða uppfærða uppskrift að Burton.

Febrúarflugum 2020 er lokið. Okkur er fyrst og fremst í huga ómælt þakklæti til allra sem lögðu sitt á vogaskálarnar til þess að gera þennan viðburð að þeim stærsta og langsamlega skemmtilegasta fram til þessa. Það komu margar hendur að þessu átaki í febrúar og færum við þeim öllum okkar bestu þakkir.

Fyrst og fremst skal telja alla þá sem lögðu fram flugur inn á Facebook eða Instagram í mánuðinum, aldrei áður hafa jafn margir hnýtarar tekið þátt, takk þið 125 sem sýnduð snilli ykkar í febrúar.

Það er erfitt að áætla nákvæmlega hve margir fylgjast með svona viðburðum í netheimum, en hópurinn á Facebook stækkaði verulega þetta árið, fór úr tæplega 400 í 527. Í febrúar heimsóttu 2.104 einstaklingar FOS.IS í 16.513 skipti og nær allir lögðu leið sína inn á myndasafnið með flugunum sem inniheldur þær allar á einum stað.

Aldrei áður hafa flugurnar verið jafn margar sem komið hafa fram á einum mánuði í Febrúarflugum. Að þessu sinni voru það 1.040 flugur sem bar fyrir augu okkar.

Svo má ekki gleyma öllum þeim sem lögðu sitt að mörkum til að gera upplifun hnýtara og áhugamanna um fluguhnýtingar sem skemmtilegasta í mánuðinum. Fjöldi félaga í Stangaveiðifélögum Akureyrar, Borgarness, Reykjavíkur og Ármanna lögðu gjörva hönd á plóg, stóðu fyrir samkomum, hnýtingarkvöldum og námskeiðum sem voru mörg hver sérstaklega vel sótt. Flugucastið og Haugur fá sérstakar þakkir fyrir þeirra ómetanlega þátt í Barflugum á American Bar í febrúar.

Undanfarin ár hefur FOS.IS notið einstakrar velvildar styrktaraðila þannig að unnt væri að veita nokkrum heppnum hnýturum viðurkenningu fyrir þátttökuna í Febrúarflugum, svo var einnig þetta árið. Við færum; Vesturröst, Veiðikortinu, Valdemarsson, VEIDA.IS, JOAKIM‘S, Fish Partner, Veiðiflugum og Flugubúllunni okkar bestu þakkir fyrir stuðninginn þetta árið.

Það er í eðli Febrúarflugna að átakið er ekki bundið við landssvæði, ekki einu sinni lönd og því þykir okkur við hæfi að draga út rafrænt nöfn þeirra 18 heppnu hnýtara sem lögðu fram flugur að þessu sinni. Nöfnin og viðurkenningarnar má sjá hér að neðan og á myndbrotinu má fylgjast með æsispennandi útdrættinum þar sem nöfn duttu inn og út þar til 18. viðurkenninginn hafði fengið sitt nafn. Samband verður haft við alla lukkuriddarana á Facebook eða Instagram þannig að unnt sé að láta styrktaraðila okkar vita um nöfn og heimilisföng þeirra.

Að lokum vill FOS.IS einfaldlega segja við ykkur öll sem hjálpuðu til við að gera þennan mánuð jafn skemmtilegan og áhugaverða sem raun bar vitni;

Við sjáumst vonandi aftur að tæpu ári liðnu þegar Febrúarfugur 2021 hefja göngu sína.

Febrúarflugur halda ótrauðar áfram og í vikunni sem leið náðust tveir merkilegir áfangar; meðlimir í hópinum Febrúarflugur á Facebook fóru yfir 500 og fjöldi flugna sem hnýtarar hafa sett inn á hópinn fóru yfir 700. Við höfum reynt að halda í við þennan fjölda og vorum rétt í þessu að uppfæra myndasafnið hér á síðunni með öllum flugunum sem komið hafa fram þetta árið.

Fyrir hálfum mánuði efndi Stangaveiðifélag Akureyrar til hnýtingarkvölds í Zontahúsinu. Félagar SVAK eru ekki af baki dottnir og tvíelfdir mæta þeir aftur til leiks í Febrúarflugum, þriðjudaginn 25. febrúar og efna til annars hnýtingakvölds. Ný dagsetning, sami staður, sami tími.

Vitaskuld verða græjur á staðnum, heitt á könnunni og landsfrægir hnýtarar SVAK verða á staðnum og leiðbeina þeim sem þess óska. Enn eitt frábært tækifærið fyrir byrjendur og þá sem vilja rifja upp gamla takta að eiga góða kvöldstund yfir hnýtingarþvingunum fyrir norðan.

Félagar SVAK munið að merkja flugurnar ykkar í Febrúarflugum með #SVAK.

Takið kvöldið frá og munið að það eru viðburðir í tengslum við Febrúarflugur í hverri viku mánaðarins.

Á hádegi í dag, 16. febrúar voru flugurnar í Febrúarflugum orðnar 583. Svo margar flugur hafa aldrei áður komið fram og meðlimum hópsins á Facebook fer enn fjölgandi, eru nú 492. Auk þess fylgist ótrúlegur fjöldi með Febrúarflugum á FOS.IS, þar hafa daglegar heimsóknir farið upp í 1.626 og lang flestir koma við á síðunni sem geymir myndir af þeim flugum sem lagðar hafa verið fram þetta árið, sjá hérna.

Það er ýmislegt sem hnýtarar og gestir á síðunni eru að velta fyrir sér og send fyrirspurnir á mig um. Hér eru nokkrar spurningar sem komið hafa upp ásamt svörum:

Er hægt að finna myndir frá fyrsta árinu (2014) einhvers staðar?

Svar: Nei, því miður er það ekki lengur hægt, það ár voru Febrúarflugur sem lokaður viðburður á Facebook og því miður er þann viðburð ekki lengur að finna á vefnum.

Hvað kostar að vera með í Febrúarflugum?

Svar: Ekki krónu, þú sækir bara um aðild að hópinum á Facebook og setur inn flugu. Ef þú ert ekki á Facebook, þá er þér velkomið að senda mynd á fos@fos.is og við póstum henni í þínu nafni.

Hvað hafa margar flugur komið frá, öll árin?

Svar: Miðað við stöðuna á hádegi í dag (16.feb.2020) þá eru flugurnar orðnar 2.651  Skiptingin á milli ára er eins og sést á kökunni hér að neðan: 

Eru vinningar í Febrúarflugum?

Svar: Nei, en heppnir hnýtarar sem verða dregnir úr pottinum í lokin fá veglegar viðurkenningar frá styrktaraðilum Febrúarflugna. Allir sem leggja fram flugur, eiga jafna möguleika á viðurkenningu. Dregið verður úr nöfnum hnýtara óháð því hvort þeir hafi lagt fram 29 eða færri flugur í mánuðinum.

This slideshow requires JavaScript.

Ármenn endutaka leikinn frá því fyrir hálfum mánuði síðan og bjóða öllum sem vettlingi eða þvingu geta valdið að koma í félagsheimili sitt, Árósa í Dugguvogi 13, mánudagskvöldið 17. febrúar kl. 20:00 og njóta félagsskapar og leiðsagnar í fluguhnýtingum. Sem fyrr verða það félagarnir Hjörleifur Steinarsson og Hjörtur Oddsson sem leiða hóp Ármanna sem reiðubúnir eru að aðstoða alla sem þess óska. Hnýtingaráhöld til staðar, heitt á könnunni og kex á bakka. Allir velkomnir, byrjendur sem og þeir sem vilja rifja upp gamla takta.

Ármenn munið að merkja flugurnar ykkar í Febrúarflugum með #armenn

Takið kvöldið frá og munið að það eru viðburðir í tengslum við Febrúarflugur í hverri viku mánaðarins.