Flugur – uppskriftir

Í framhaldi af boxinu mínu, fór ég í gegnum nokkrar bækur og greinar með flugu uppskriftum sem ég hef sankað að mér og setti einar 23 niður á vefinn. Þetta eru sem sagt uppskriftir og athugasemdir á 23 af 24 flugum sem ég þykist ætla að hafa í boxinu mínu á næstunni.

Uppskriftirnar eru aðgengilegar úr greininni ‘Boxið mitt’ með því að smella á nafn viðkomandi flugu. Eins má nálgast þessar uppskriftir úr valmyndinni undir Flugur / Uppskriftir.

Boxið mitt

Það eru þó nokkrir sem setja saman lista yfir ‘sínar’ flugur, þ.e. hvað leynist í boxinu. Sjálfur hef ég verið að fylgjast með nokkrum svona hlekkjum og þrælað mig í gegnum vinsælustu flugurnar hér og þar. Ef ég klára nú einhvern tíman að hnýta ‘mínar’ flugur þá gæti boxið mitt litið einhvern veginn svona út:

Black Ghost
Bleikja: N/A
Sjóbleikja: N/A
Urriði: Straumfluga 8, 10 & 12
Sjóbirtingur: Straumfluga 6, 8 & 10
Blae and Black
Bleikja: Votfluga 10, 12 & 14
Sjóbleikja: N/A
Urriði: N/A
Sjóbirtingur: N/A
Bleik og blá
Bleikja: Kúluhaus 8 & 10 / Púpa á grubber 10 & 12
Sjóbleikja: Straumfluga 6, 8 & 10
Urriði: N/A
Sjóbirtingur: N/A
Bloody Butcher
Bleikja: N/A
Sjóbleikja: Votfluga 6, 8 & 10
Urriði: Votfluga 8,10 & 12
Sjóbirtingur: N/A
Blue Charm
Bleikja: N/A
Sjóbleikja: N/A
Urriði: Straumfluga 8 & 10
Sjóbirtingur: Straumfluga 8 &10
Butcher
Bleikja: Votfluga 10, 12 & 14
Sjóbleikja: N/A
Urriði: N/A
Sjóbirtingur: N/A
Connemara Black
Bleikja: Votfluga 8, 10 & 12
Sjóbleikja: N/A
Urriði: N/A
Sjóbirtingur: N/A
Copper John / Kopar moli / Rafm.flugan
Bleikja: 10, 12 & 14
Sjóbleikja: N/A
Urriði: 10, 12 & 14
Sjóbirtingur: N/A
Dentist
Bleikja: N/A
Sjóbleikja: Straumfluga 6, 8 & 10
Urriði: Straumfluga 8, 10 & 12
Sjóbirtingur: Straumfluga 6, 8 & 10
Dýrbítur
Bleikja: N/A
Sjóbleikja: Bleikur 6, 8 & 10
Urriði: N/A
Sjóbirtingur: Svartur 6, 8 6 10
Flæðarmús
Bleikja: N/A
Sjóbleikja: N/A
Urriði: Straumfluga 8 & 10
Sjóbirtingur: Straumfluga 6, 8 & 10
Heimasætan
Bleikja: Straumfluga 8 & 10 / Púpa á grubber 10 & 12
Sjóbleikja: Straumfluga 6, 8 & 10
Urriði: N/A
Sjóbirtingur: N/A
Héraeyra
Bleikja: 10 & 12
Sjóbleikja: N/A
Urriði: 10 & 12
Sjóbirtingur: N/A
Mickey Finn
Bleikja: Straumfluga 6, 8 & 10
Sjóbleikja: Straumfluga 6, 8 & 10
Urriði: Straumfluga 8 & 10
Sjóbirtingur: Straumfluga 6, 8 & 10
NobblerBleikja: Orange & bleikur 8, 10 & 12
Sjóbleikja: Orange, rauður & bleikur 8, 10 & 12
Urriði: Olive & svartur 8, 10 & 12
Sjóbirtingur: Orange 8, 10 & 12
Peacock
Bleikja: Gjarnan með kúluhaus 8, 10 & 12
Sjóbleikja: N/A
Urriði: Með og án kúluhauss 8, 10 & 12
Sjóbirtingur: N/A
Peter Ross
Bleikja: Votfluga 10 & 12 / Púpa 12 & 14
Sjóbirtingur: Votfluga 10, 12 & 14
Urriði: N/A
Sjóbirtingur: N/A
Pheasant Tail
Bleikja: 10, 12 & 14
Sjóbleikja: N/A
Urriði: 10 & 12
Sjóbirtingur: N/A
Royal Coachman
Bleikja: N/A
Sjóbleikja: Votfluga 10 & 12
Urriði: N/A
Sjóbirtingur: N/A
Teal and Black
Bleikja: N/A
Sjóbleikja: N/A
Urriði: Votfluga 10, 12 & 14
Sjóbirtingur: N/A
Teal, Blue and Silver
Bleikja: Votfluga 12 & 14
Sjóbleikja: N/A
Urriði: Votfluga 12 & 14
Sjóbirtingur: N/A
Vinstri græn
Bleikja: Púpa á grubber 10 & 12 / Straumfluga 10 & 12
Sjóbleikja: N/A
Urriði: Straumfluga 8, 10 & 12 / Púpa á grubber 10 & 12
Sjóbirtingur: N/A
Watson’s Fancy
Bleikja: Kúluhaus 10, 12 & 14
Sjóbleikja: N/A
Urriði: Votfluga 10 & 12
Sjóbirtingur: N/A
Þingeyingur
Bleikja: N/A
Sjóbleikja: N/A
Urriði: Straumfluga 6, 8 & 10
Sjóbirtingur: Straumfluga 6, 8 & 10

Eins og sjá má þá er þetta all þokkalegur listi og greinilega nóg að gera á næstunni að fylla á boxið. Fyrir þá sem áhuga hafa er hægt að nálgast þennan lista hér á PDF formi. Uppskriftir að þessum flugum má nálgast með því að smella á nafn flugunnar.


Langavatn 21.ág.

Það var ein lítil 1/2 punda bleikja sem forðaði því að hér yrði öngull í rassi enn eitt skiptið. Af okkur fjórum sem börðum Langavatn frá morgni til kvölds í strekkings vindi og úrkomu á köflum, var ég sá eini sem einhvern fisk fékk. Prófuðum undir Réttarmúlanum alveg frá Beilárvöllum og út fyrir víkina undir sæluhúsinu en ekkert gekk. Ekki litið við maðk, spún né flugum. Upp úr hádegi rölti ég Beilárvellina inn að Klifi og þar varð ég loksins var við fisk beint á móti vindi. Reyndum síðan aftur rétt fyrir ljósaskiptin undir Klifi, vel á móti vindi ef ske kynni að bleikjan væri í æti í öldurótinu, en ekkert gekk. Kannski er fiskurinn farinn inn að Langavatnsárós í hryggningu? Finnst það samt full snemmt svona upp úr miðjum ágúst.

Whip í höndunum – Skýringarmynd

Sjálfur nota ég ekki nein tól við að hnýta endahnútinn á flugurnar mínar. Til gamans setti ég saman fáeinar skýringarmyndir af því hvernig ég set endahnútinn í höndunum.

Það er nokkuð misjafnt hvort menn vefja alltaf réttsælis um öngulinn eða velta lykkjunni á milli vafninga. Báðar aðferðirnar mynda í raun sama hnútinn að lokum.

Smellið fyrir stærri mynd

Úlfljótsvatn 14.ág.

Enn og aftur er það öngull í rassi. Fikruðum okkur niður slóðann að Borgarvík og eyddum 4 klst. í mjög fallegu veðri, súld / þoka en afskaplega stillt og hlýtt. Í það minnsta inni í víkinni. Í sem skemmstu máli urðum við ekki vör, utan þess að konan sá einn ‘lítinn’ eltast aðeins við fluguna sem hún var að baða í það skiptið. Nokkuð var um fólk sem naut veðursins á þessum slóðum, en ég veit ekkert um hvernig þeim gekk.  Það gengur bara betur næst.

Vinsælustu flugurnar

Ég var að leika mér aðeins með þekktan lista yfir veiðistaði og fengsælar flugur sem hægt er að kaup á flugur.is Í þessum lista sem Sigurður Pálsson tók saman eru tilgreindir 200 veiðistaðir og þær flugur sem taldar eru fengsælastar á hverjum stað. Auðvitað er þessi listi aðeins ætlaður til leiðbeiningar um fluguval á hverjum stað, en það getur líka verið gaman að skoða hann út frá öðru sjónarhorni.

Oftast nefndu flugurnar eru:

  1. Dentist, 47 sinnum
  2. Peter Ross, 46 sinnum
  3. Watson’s Fancy, 41 sinnum
  4. Svört Frances, 39 sinnum
  5. Teal and Black, 38 sinnum
  6. Black Gnat, 37 sinnum
  7. Black Ghost, 30 sinnum
  8. Alder, 28 sinnum
  9. – 10. Blue Charm og Rauð Frances, 27 sinnum

Samtals voru nefndar 399 flugur í þessum lista, misjafnlega margar þeirra fyrir hvern veiðistað. Miðað við nöfnin í listanum er greinilega eitthvað um liðið frá því hann var tekin saman eða endurskoðaður, en góður er hann samt.

Svínadalurinn 6.-7.ág.

Jamm, hér er öngull í rassi.  Bæði hjá mér og frúnni.  Veðrið var ekkert sérstakt á föstudaginn, rok og rigning og við mættum frekar seint á tjaldstæðið á Þórisstöðum.  Prófuðum Glammastaðavatn (Þórisstaðavatn) aðeins um kvöldið en ekkert gekk.

Renndum inn að Eyrarvatni á laugardaginn í þokkalegasta veðri og háðum hetjulega baráttu við mjög vaxandi gróður í vatninu. Í stuttu máli; gróðurinn hafði betur. Annað sem vakti athygli mína var fjölskrúðugt líf vaðfugla við vatnið sbr. ágætis grein Engilberts Jensen um Vífilstaðarvatn sem finna má hér. Jú, jú, ég á líka vöðlur og nota þær mikið, en ég get svo svarið það að ég göslast ekki tugi metra út í vatnið með látum og gusugangi, til þess eins að geta komið færinu fyrir stóru fiskana úti. Ég hafði það á tilfinningunni að á staðinn væru mættir einn og einn kúreki í vöðlum, vopnaðir ógnvekjandi beituhlunkum til þess að ná einhverjum af þessum löxum sem sluppu framhjá veiðimönnunum í Laxá og komust alla leið upp í vötnin í Svínadalnum.  Sagan segir að einhver hafi náð 14 löxum í Eyrarvatni nú fyrir skemmstu.  Kannski var það bara einn af þeim sem dóluðu fram og til baka á bátunum sínum með spúnadræsuna í eftirdragi?

Frúar-flugur

Það réðst nokkuð í síðustu veiðiferð, hvernig kvöldunum verður varið hjá mér næstu dagana.  Nú er unnið hörðum höndum að því að fylla á fluguboxið hjá frúnni.  Black Ghost í nokkrum útfærslum og stærðum og svo var hún eitthvað að tala um flotta marfló sem hún sá á flugur.is, og svo einhver önnur sem var ‘rosalega flott’, auðvitað Peacock og svo…..

Mér tókst nú samt að lauma þremur Dentist í boxið hennar, það verður jú ekki alltaf veður fyrir Black Ghost.

Áhuginn er orðinn svo mikill að þegar ég leit yfir á hennar vallarhelming í gærkvöldi blöstu við mér tvö uppglennt, æðisgengin augu og Veiðiflugur Íslands í öllu sínu veldi.  ‘Rosalega eru til margar gerðir af flugum, góða nótt’, og svo var hún lögst á hliðina og dreymdi bolta bleikjur og spriklandi urriða, væntanlega á Black Ghost. Hverju er ég eiginlega lentur í?

Hlíðarvatn, Hnappadal 31.júl.-2.ág.

Ekki klikkar Hlíðarvatnið, þótt það hafi ekki verið neitt brjálæði.  Tókum heim með okkur ein 14 stk. á bilinu 1 1/2 – 2 pund.  Vatnið hefur minnkað enn meira frá því við vorum þar um miðjan júlí og mér sýnst að vanti c.a. 3 m í vatnið.  Ókostur: gróðurinn er að verða verulega til trafala.  Kostur: ekki þarf að leita lengi að dýpinu þar sem ‘þeir stóru’ leynast.  Vorum eins og venjulega í landi Heggsstaða og tókum alla fiskana innst í vatninu.  Prófuðum allt svæðið út að Álftatanga en gróðurinn var aðeins of mikill. Veiðarfæri: 6 stk. á Black Ghost, 3 stk. á Dentist, 4 stk. á svartan og gylltan spinner og 1 stk. á maðk.  Frúin stimplaði sig heldur betur inn í fluguveiðinni og tók 6 stk. á Black Ghost eins og ekkert væri á meðan ég þráaðist við með Dentist og einhverjar aðrar sem ekkert gáfu.

Á meðan við drápum eins og við gátum, var yngri sonurinn á fullu að bjarga urriðaseyðum úr þornandi pollum og koma þeim í öruggt skjól í lækjarsprænunni.  Kannski átti strákurinn bara metið í ferðinni, því hann bjargaði á milli 20 – 30 stk.  Vonandi fer vatnsbúskapurinn á svæðinu eitthvað að rétta úr sér, það var í það minnsta rigning þegar við fórum heim.

Hópið 23.- 25. júlí

Jómfrúarferð í Hópið í Húnavatnssýslu. Eftir nokkra leit og svaðilfarir komum við okkur fyrir rétt austan ósa Gljúfurár. Sagan segir að í vatninu sé staðbundinn stofn bleikju og urriða, ásamt sjógöngufiski og ‘laxa von’. Laxinn var mættur og beið óþolinmóður eftir að ganga upp í Gljúfurá sem var einstaklega vatnslítil.  Annar fiskur var ekki á staðnum, utan hornsíla sem týnd voru í flæðarmálinu.Laxinn var mjög tregur og leit lengi vel ekki við neinu, hvorki spún, maðki né flugu.  En á laugardaginn missti stóri bróðir einn sem stal af honum öngli og sökku með miklum látum eftir að hafa tekið hressilega.  Sjálfur missti ég síðan einn af spún þannig að fisklaus fórum við úr Hópinu eftir annars mjög góða helgi í sól og blíðu. Af hverju annar fiskur var ekki sjáanlegur, veit ég ekki.  Eina sem mér dettur í hug er að laxinn hafi hrakið annan fisk  af svæðinu með ofsafengnum stökkum og látum fyrir framan ós Gljúfurár og meðfram bakkanum til beggja átta.

Kleifarvatn 17.júlí

Jú, verð að setja svona mynd á söguna því ég fékk einn mjög vænann urriða og missti annan.  Stóri bróðir fékk einn líka.  Betri helmingurinn kom heim með öngulinn í rassinum.

Get ekki orða bundist yfir umgengni manna við vatnið.  Maður er orðinn nokkuð vanur því að flækjast í girnisafgöngum og ýmsu drasli sem menn skilja eftir sig.  En, að festa í plastpoka í vatninu með haus og úldnum innyflum er svolítið of mikið.  Hvað í andsk….. gengur mönnum eiginlega til?  Er það virkilega til of mikils mælst að menn takið með sér og komi í sorpílát því sem menn ekki éta eða vilja hirða?  Fyrir utan það að henda slógi aftur í vatnið viðheldur aðeins ormi og óværu í fiskinum.  Ef menn geta ekki hugsað sér að taka slóg með sér, þá er skárri kostur að urða það í móanum þannig að vargurinn komist ekki í það og beri orm og egg aftur í vatnið.

Hlíðarvatn, Hnappadal 14.-15.júlí

Brjáluð veiði báða dagana.  Vorum tvö saman (eins og venjulega) og tókum 51 stk. sem voru á bilinu 1/2 – 1 1/2 pund.  Fengum leyfi hjá Guðmundi á Heggstöðum og vorum mest í víkinni vestan Sandfells.  Næstum allir komu á land með spún, helst svartur Toby eða svartur og gylltur spinner.  Heyrðum skýringar á skiptingu tegunda í vatninu frá staðkunnugum; urriðinn heldur sig lang mest vestan Sandfells að Álftatanga, en (stór) bleikjan heldur sig mest í dýpinu við Álftatanga og vestur í hraunið fyrir landi Hraunholts.  Eitthvað minnsta vatn í vatninu sem við höfum séð, vantaði minnst 2,5 m upp á vatnshæðina.

Á leiðinni heim fórum við norður Heydal og í Haukadalsvatnið.  Eftir smá skoðunartúr meðfram vatninu fundum við okkur stað fyrir fellihýsið og tjölduðum í þeirri von að strekkingsvind sem var á staðnum myndi lægja með kvöldinu.  En það varð ekki.  Þvert á móti, þannig að við pökkuðum saman og fórum heim með smá krókum.

Langavatn 9.-11. júlí

Ágætis ferð í Langavatn í Borgarfirði.  Tókum heim með okkur 11 þokkalegar bleikjur eftir tvo daga, ef ég tel sunnudag ekki með vegna rosalegrar rigningar (hagl) rétt fyrir síðdegisveiðina sem sendi væntanlega allan fisk niður í dýpstu dýpi það sem eftir lifði dags. Frúin prófaði fluguna, en mest veiddum við á spún (svartur Toby) og eitthvað á maðk, en ‘Vinstri græn‘ og Dentist gáfu líka. Veiddum í sandfjörunni frá ósi Beilár og til norðurs. Prófuðum líka undir Réttarmúlanum og undir hrauninu að sunnan, en hvorugt gaf.

Tungufljót 6.-8. júlí

Ekki lofaði nú veðurspáin góðu með þessa veiðiferð, en það hefði nú alveg verið hægt að koma út einhverri línu með ormi á endanum þótt hann spáði 4-9 m/sek. en að koma einhverju kvikindi út í 16 – 26 m/sek. er svolítið annað mál. Gerðum heiðarlega tilraun í gærkvöldi til að leita að fiski við sleppitjörnina í Kjarnholti og ég sá einn, enn hann vildi frekar liggja á botninum heldur en eltast við spún eða maðk.  Vegna vinds var ekki viðlit að koma út flugu svo eitthvað vit væri í og svo tók steininn alveg úr þegar á okkur skall þetta kolvitlausa veður í nótt og í morgun svo ekkert varð úr hollinu kl.7 – 13.  Þegar svo veðrið gekk nánast ekkert niður eftir hádegi og fyrirséð að hollið frá 16-22 yrði tómur barningur í vindi (sbr. myndina hér að ofan), pökkuðum við okkar hafurtaski og fórum heim.  Nei, ég neita því alfarið að við höfum komið með öngulinn í rassinum, hann lá óhreyfður í veiðiboxinu og því telst þetta ekki með.

Meðalfellsvatn

Skruppum í Meðalfellsvatnið í gær, sem var lítið spennandi.  Væntanlega var eins farið með fiskinn og mig, mér fannst hávaðinn og lætin við vatnið aðeins of mikil. Látum það vera að menn slái blettinn sinn eða snyrti einn og einn runna með bensíngræjunum, en 20 feta spíttarar á fullu gasi á vatninu eru nú ekki alveg á top 10 óskalistanum mínum á fallegum laugardegi.  Já, ég er fúll enda fékk ég ekki einn einasta fisk.