Kristján Friðriksson

Vetrardagskrá

3. október 2015

Fréttir

Upp

Forsíða

Ætli það sé ekki óhætt að leggja árar í bát þetta árið og segja vertíðinni lokið. Litið um öxl má sjá að sumarið hafi látið bíða svolítið eftir sér. Fyrsti dagur í veiði hjá mér hefur yfirleitt verið 1. eða 3. apríl, ekki mikið síðar og þetta árið varð sá 3. fyrir valinu. Eins og nærri má geta var ekki mikið um afla upp úr ísnum við Meðalfellsvatn og langt var í næstu veiðiferð, 9. maí og næstum jafn langt í þar næstu, 30. maí.
Í gegnum tíðina hefur ágætur kunningi minn haft þann sið að telja upp konunga Danmerkur í hvert skipti sem við sjáumst að vori, jafn marga og fisklausar veiðiferðir mínar. Hæst hefur hann komist í Kristján XIII (sem er víst ekki enn sestur á valdastól) en þetta árið hefði hann aðeins náð Kristjáni II (ríkti 1513 – 1523) Fyrsti fiskur sumarsins kom á land 9.maí á silungasvæði Elliðaáa og þá var vorið eiginlega alveg að ganga í garð og eftir það fóru aflatölur að rétta úr sér.

This slideshow requires JavaScript.

Heilt yfir var sumarið eitt það besta hjá mér frá upphafi. 20 veiðiferðir færðu mér 144 bleikjur og 28 urriða sem verður að teljast alveg ágætt. Meðaltalið í ferð voru því 8,6 fiskar og þá eru nokkrar núll-ferðir taldar.
Vetrardagskrá FOS verður með nokkuð hefðbundnum hætti. Fljótlega fara reglulegar greinar að birtast á vefnum um hin og þessi málefni sem mér eru hugleikin. Niðurstöður úr nokkrum tilraunum sem gerðar voru í sumar og eitthvað sem ég hef lært því maður lærir svo lengi sem veiðir.

Höfundur:

Kristján Friðriksson
Þverá, Þjórsárdal 12. & 13. sept.

13. september 2015

Veiði

Upp

Forsíða

Af ástæðum sem ekki verða kunngerðar hér, vorum við hjónin beðin um að hverfa af heimilinu í sólarhring um helgina. Við hugsuðum okkur því gott til glóðarinnar, skreppa í veiði og láta fara vel um okkur á einhverjum góðum stað. Fyrir valinu varð að splæsa í bændagistingu með veiðivon austur að Fossnesi í Gnúpverjahreppi. Þar á bæ er hægt að fá prýðilega gistingu fyrir stóra sem smáa hópa og …… bleyta færi í Þverá.

Laugardagurinn var sannkallaður sumarauki austur í sveitum og vart hægt að hugsa sér betra veður fyrir réttir á Skeiðum og veiði í grennd. Við vorum heldur seinni á ferðinni austur en til stóð og því ákváðum við að renna strax niður að ós Þverár þar sem hún rennur í Þjórsá. Verandi allsendis ókunnug veiði í jafn lituðu vatni og rennur í Þjórsá, varð heldur lítið úr aflabrögðum en frúin setti nú samt í einn urriða sem var sleppt og skömmu síðar tókum við okkur upp og röltum með Þverá, inn Bæjargljúfur og að fossinum sem þar er.

Þverá – Kort: map.is

Heldur meira urðum við vör við fisk á sunnudeginum, lax stökk í fögrum boga í litaskilunum og tók hraustlega í fluguna hjá frúnni en var heldur fljótur að losa sig. Ákveðin vonbrigði að hún fengi ekki að takast á við þennan fallega fisk. Sjálfur fékk ég einn putta sem ég sleppti en frúin tók einn urriða sem hægt er að éta með sér heim. Nóg virtist vera af fiski þar sem Þverá og Þjórsá mætast og skemmtilegt að fylgjast með breytileika litaskilanna þar sem bergvatnið úr Þverá rann undir jökulvatn Þjórsár.

Sagnir herma að það séu allar tegundir íslenskra laxfiska í Þverá. Jú, við getum sagt að við höfum orðið vör við lax og urriða, en bleikju sáum við ekki. Vera má að göslagangur okkur hjóna hafi orðið þess valdandi að fiskur fyrir ofan brú hafi einfaldlega látið sig hverfa áður en við náðum að koma auga á hann. Vel kemur til greina að plata einhvern góðan veiðimann til að segja okkur til um veiði í straumvatni næsta sumar, það er ekki ólíklegt að reynsluleysi okkar sé að setja mark sitt á aflatölur.

Fyrir áhugasama er rétt að geta þess að verð fyrir veiðileyfi í Þverá er mjög í hóf stillt enda áin stutt fyrir landi Fossness og ekki um marga veiðistaði að ræða. Skv. heimasíðu Fossness eru aðeins seldar 1 – 2 stangir hverju sinni, hálfir eða heilir dagar. Utan háannatíma er síðan lítið mál að fá gistingu á bænum, uppábúið rúm með aðgangi að baði og eldhúsi fyrir 6.000,- og óhætt að mæla með aðbúnaðinum og viðmóti húsráðenda.

Veiðitölur ársins

Bleikjur í ferð Bleikjur alls Urriðar í ferð Urriðar alls Fj.ferða

0 / 0 117 / 144 2 / 1 19 / 28 17 / 20

Höfundur:

Kristján Friðriksson
Frostastaðavatn

8. september 2015

Myndbönd

Upp

Forsíða

Örklippa dagsins: Frostastaðavatn

Höfundur:

Kristján Friðriksson
Framvötn 5. & 6. sept.

7. september 2015

Veiði

Upp

Forsíða

Eins og segir í ágætri bók sem ég var að glugga í um daginn; Ef tíðarfar er gott má fara í dags- og helgarferðir langt fram eftir mánuðinum ….. göngutúr með stöng á öxl og nesti í poka getur verið lykillinn að góðri veiði á þessum árstíma. Það er bara eins og þetta hafi verið mælt úr mínum munni og við tókum höfundinn á orðinu og brugðum okkur upp að Landmannahelli um helgina og áttum þar yndislega helgi við veiðar. Ef að líkum lætur þá var þetta síðasta ferð okkar hjóna í Framvötnin á þessu ári, eða hvað? Það verður jú opið í Landmannahelli til 25. sept. og ef veðrið helst eitthvað í líkingu við það sem var um helgina, þá er ekkert sem mælir gegn því að skreppa í haustlitaferð að Fjallabaki.

Laugardagurinn var að vísu svolítið að flýta sér, nokkuð hressilegur andvari að vestan sem nægði til þess að innfæddir héldu sig heldur mikið til hlés. Malli lét t.d. ekki sjá sig þótt við værum á stjái í bakgarðinum hans við Frostastaðavatn og bleikjurnar voru svolítið tregar til töku. Okkur hjónum tókst samt að særa upp sitt hvora fimm fiskana, vænstu bleikjur plús tveir tittir sem hefðu undir venjulegum kringumstæðum endað í Malla maga, en þar sem hann lét sig vanta fóru þeir í úrkast.

Enn er forvitni okkar um vötnin og veiðistaði ekki að fullu svalað og því ákváðum við að gera okkur ferð á ókunnar slóðir við Frostastaðavatn á sunnudaginn. Fyrir þá sem þekkja til staðhátta lögðum við leið okkar að víkinni innan við hraunið að sunnan og gerðum prýðilega veiði þar. Fimm fiskar á stuttum tíma, allir vænir sem tóku hressilega á. Úr víkinni lögðum við síðan leið okkar út með hrauninu að vestan og norður fyrir og komum við á nokkrum völdum stöðum og bættum í bleikjusafnið. Það var svo ekki fyrr en við komum í aðra-víkina í hrauninu að Malli lét sjá sig eða sendi fulltrúa sinn öllu heldur. Eitthvað minni útgáfa af honum mætti á staðinn og gerði sig nokkuð heimakominn við fiskana mína á tímabili. Eftir smá umhugsun og fimmaura-orðaleiki varð úr að hann fékk viðurnefnið; Smalli og ég gaukaði að honum smælki sem annars hefði farið í ruslið.

Veðurguðirnir ákváðu að reka ræknar sögusagnir af kulda og vosbúð á hálendinu af höndum sér og Frostastaðavatnið var baðað í blíðu og hitatölum sem hefðu sómt sér ágætlega á miðju sumri. Hreint dásamlegur dagur og það var með herkjum að maður hafði sig inn í bíl og héldi áleiðis í amstur hversdagsleikans. Það fór því svo að við vorum heldur síðar á ferðinni heim en ráðger var og einföld skilaboð voru send í vinnuna; Mæti seint í dag.

Aflabrögð helgarinnar voru annars með ágætum. 35 fiskar í heildina á land, flestir um pundið, nokkrir stærri og fjórir í úrkast. Ég held að maður verði bara að una vel við þennan fjölda, sérstaklega í ljósi fregna sem við höfðum af netlaögnum bænda. Mér skilst að fjögur net hafi aðeins skilað 50 fiskum þessa tvo daga sem lagt var.

Veiðitölur ársins

Bleikjur í ferð Bleikjur alls Urriðar í ferð Urriðar alls Fj.ferða

14 / 21 117 / 144 0 / 0 17 / 27 15 / 19

Höfundur:

Kristján Friðriksson
Hraunsfjörður 29. & 30. ágúst

30. ágúst 2015

Veiði

Upp

Forsíða

Skv. orðabók er kvenkynsorðið branda; 1. lítill silungur, 2. fiskur, 3. glíma, 4. raftur yfir dyrum. Ekkert af þessu kom við sögu í veiðiferð helgarinnar hjá okkur hjónum, þ.e. ef undan er skilin ein flundra sem í ótuktarskap sínum tók Peacock með orange skotti hjá mér rétt við Búðanes.

Síðsumar 2015 í Hraunsfirði

Eins og stundum hefur komið fyrir, gekk veðurspá helgarinnar ekki alveg eftir og við vorum því ekki í þeirri blíðu í dag sem spáð var og hitastigið var heldur ekki það sem kom fram í auglýsingu Veðurstofunnar. Raunar vil ég einmitt kenna hitastiginu um þetta gæftaleysi í firðinum sem raun varð á. Mér skilst að á aðfaranótt laugardags hafi hitastigið rétt marið að vera yfir frostmarki og það var frekar kalt, langt fram eftir laugardagsmorgni og það gránaði heldur í fjöllum. Maður má víst eiga von á svona dögum inn á milli úr því sem komið er fram í árið.

Ekki vantaði veiðimennina í firðinum en afskaplega fáum sögum fór af aflabrögðum. Tveir veiðimenn eru þó líklegir til að hafa komið fiski á land, en ég náði ekki fréttum frá þeim áður en við tókum okkur saman í dag og héldum heim á leið. Þar voru á ferðinni gallharðir lesendur FOS sem við hittum á Búðanesi í gærkvöldi, klárir í slaginn með tjald, varðeldivið og vel útbúnir veiðigræjum. Sjáum til hvort við fáum ekki komment inn á þessa færslu með fréttum af aflabrögðum. Takk annars fyrir skemmtilegt spjall, strákar.

Þessi bauð okkur góðrar nætur í gærkvöldi

Veiðitölur ársins

Bleikjur í ferð Bleikjur alls Urriðar í ferð Urriðar alls Fj.ferða

0 / 0 103 / 123 0 / 0 17 / 27 14 / 18

Höfundur:

Kristján Friðriksson
Framvötn, 22. & 23. ágúst

24. ágúst 2015

Veiði

Upp

Forsíða

Síðla sumars og langt fram í haustið laða vötnin á hálendinu veiðimenn til sín eins lengi og veður leyfir. Framvötnin eru þar engin undantekning og við hjónin höfum gert einhverjar okkar bestu veiðiferða á þessum árstíma. Um leið og einhverja smugu er að sjá í kortunum, höldum við af stað og förum á fjöll.

Við notuðum dagspartinn frá hádegi og fram undir myrkur á laugardaginn til að heimsækja Malla á Frostastöðum sem eins og venjulega lét sig ekki vanta á staðinn um leið og fyrsti fiskur var kominn á land. Við lögðum sem sagt leið okkar að Frostastaðavatni í víkurnar og gerðum alveg ágæta veiði á uppáhalds staðnum okkar og út af skerjunum til vesturs frá hrauninu. Þegar dagurinn var gerður upp voru 27 fiskar á landi og aðeins 5 þeirra undir matfiskstærð. Kunnugir mega geta sér til um hvað varð um þá fiska. Hvorki við né Malli fórum því fisklaus heim eftir þennan dag. Veðrið, þennan annars ágæta laugardag var svona upp of ofan, smá sýnishorn af flestum gerðum en heilt yfir mjög gott og kvöldið eins og það gerist fegurst á fjöllum.

Horft yfir Frostastaðavatn, Löðmundur í síðustu sólargeislum dagsins

Loksins, loksins kom að því að ég færi með veiðistöng í hönd að Kýlingavatni. Eftir hádegisskúri sunnudagsins renndum við inn að Kýlingum. Og þvílík fegurð. Veðrið var e.t.v. ekki það besta, en umhverfið skartaði þessu gullfallega vota litskrúði sem einkennir Landmannalaugar og fjöllin í grennd. Vanþekking undirritaðs var alger þegar við komum að vatninu og því ósköp lítið hægt að segja meira um þessa heimsókn, en ég á örugglega eftir að fara að Kýlingum aftur. Ósköp þætti mér vænt um að geta sett einhvern afla úr Kýlingavatni á veiðiskýrslu.

Á leiðinni að Landmannahelli stoppuðum við í Frostastaðavatni að norðan þar sem enn var bætt á bleikjukvótan og að lokum kíktum við aðeins í Löðmundarvatnið þar sem frúin tók eina í mjög góðri matfiskstærð svona rétt til að setja punktinn yfir i-ið í þessari frábæru ferð.

Kaffi, kleina og fiskar við Frostastaðavatn

Ef veðurguðirnir leyfa er greinilega enn nóg eftir að veiðisumrinu á fjöllum og um að gera að nýta haustið til útiveru. Það gefst örugglega nógur tími til að húka inni við í vetur.

Veiðitölur ársins

Bleikjur í ferð Bleikjur alls Urriðar í ferð Urriðar alls Fj.ferða

14 / 16 103 / 123 0 / 0 17 / 27 13 / 17

Höfundur:

Kristján Friðriksson