Ætli það sé ekki óhætt að leggja árar í bát þetta árið og segja vertíðinni lokið. Litið um öxl má sjá að sumarið hafi látið bíða svolítið eftir sér. Fyrsti dagur í veiði hjá mér hefur yfirleitt verið 1. eða 3. apríl, ekki mikið síðar og þetta árið varð sá 3. fyrir valinu. Eins og nærri má geta var ekki mikið um afla upp úr ísnum við Meðalfellsvatn og langt var í næstu veiðiferð, 9. maí og næstum jafn langt í þar næstu, 30. maí.
Í gegnum tíðina hefur ágætur kunningi minn haft þann sið að telja upp konunga Danmerkur í hvert skipti sem við sjáumst að vori, jafn marga og fisklausar veiðiferðir mínar. Hæst hefur hann komist í Kristján XIII (sem er víst ekki enn sestur á valdastól) en þetta árið hefði hann aðeins náð Kristjáni II (ríkti 1513 – 1523) Fyrsti fiskur sumarsins kom á land 9.maí á silungasvæði Elliðaáa og þá var vorið eiginlega alveg að ganga í garð og eftir það fóru aflatölur að rétta úr sér.

This slideshow requires JavaScript.

Heilt yfir var sumarið eitt það besta hjá mér frá upphafi. 20 veiðiferðir færðu mér 144 bleikjur og 28 urriða sem verður að teljast alveg ágætt. Meðaltalið í ferð voru því 8,6 fiskar og þá eru nokkrar núll-ferðir taldar.
Vetrardagskrá FOS verður með nokkuð hefðbundnum hætti. Fljótlega fara reglulegar greinar að birtast á vefnum um hin og þessi málefni sem mér eru hugleikin. Niðurstöður úr nokkrum tilraunum sem gerðar voru í sumar og eitthvað sem ég hef lært því maður lærir svo lengi sem veiðir.

Hin árlegi Hlíðarvatnsdagur verður n.k. sunnudag, 23. ágúst. Þennan dag bjóða stangveiðifélögin við Hlíðarvatn í Selvogi gestum og gangandi að veiða frítt í vatninu á sunnudaginn til kl.17 Ef ég þekki félaga stangveiðifélaganna rétt, þá verða nokkrir þeirra á staðnum, boðnir og búnir að leiðbeina ungum sem öldnum um bestu staðina, aðferðirnar og flugurnar. Vel að merkja, leyft agn í Hlíðarvatni er fluga og spónn og skrá ber allan afla hjá einhverju félaganna áður en haldið er heim á leið að kvöldi.

Þeim sem vilja undirbúa sig fyrir helgina er bent á umfjöllun um Hlíðarvatn hér á vefnum. Kennir þar ýmissa grasa og bendi ég sérstaklega á Hlíðarvatnsbæklinginn góða.

Þegar maður er búinn að fá eitthvað að láni þá þakkar maður fyrir, launar jafnvel greiðan og gætir þess að það sem lánað var sé í eins eða svipuðu ástandi og það var fyrir. Fyrir kemur að maður gleymir algjörlega að skila því sem var lánað og verður nokkuð lúpulegur þegar innt er eftir skilum. Hvað gerir maður þá? Jú, maður bætir að lágmarki afsökunarbeiðni við allt sem á undan er talið. Þetta á við um alla forgengilega hluti, eitthvað sem bæta má með kaupum ef svo illa fer að hluturinn skemmist.

Allt öðru máli gegnir um náttúru landsins, dýralíf og umhverfi okkar. Ekkert mannanna verk getur bætt listasmíð náttúrunnar og við getum ekki keypt okkur óspillta náttúru ef sú gamla skemmist. Fótumtroðinn svörður verður aldrei samur þótt við sáum í hann, klettadrangi verður ekki endurreistur hafi hann verið brotinn og veiðivatn verður aldrei samt ef allur fiskur deyr. Sumt verður einfaldlega aldrei bætt og afsökunarbeiðni gagnar lítið.

Ég er í félagsskap veiðimanna, Ármönnum sem hafa, meðal annarra einkunnarorðin; Hann (Ármaðurinn) ræðir af háttvísi um veiðibráð, fer með gát að öllu lífi,nýtur veru sinnar við veiðivatn og skilur ekki eftir annað en sporin sín. Þetta eru hástemd orð og mikið vildi ég að fleiri tækju þau sér til fyrirmyndar. Á síðustu árum hefur ýmislegt slæðst í netið mitt á ferðum um veiðislóð. Á topp 10 listanum er; girni og taumaefni, þar næst koma drykkjarílát og plastpokar. Mér hefur alltaf þótt þetta heldur nöturlegar þakkir til náttúrunnar fyrir afnot af dásemdum hennar. Það koma sveiflur í þessa ‘fundvísi’ mína, eitt árið er lítið framboð af rusli, annað er allt á kafi og stundum hreint og beint ekkert. Hið síðasta þykir mér alltaf vænst um.

Ekki alls fyrir löngu vorum við hjónin á ferð við Selvallavatn í Helgafellssveit. Þeir sem þekkja til á þessum slóðum eru eflaust sammála mér að vatnið er ein af fegurstu perlum Snæfellsness. Umhverfið og vatnið er einstakt og það sem meira er þarna er fjölskrúðugt fugla- og dýralíf og fallegur urrið og bleikja í vatninu. Það hefur þótt sjálfgefið að gestir gangi snyrtilega um svæðið sem er í einkaeigu og skilji ekki annað eftir sig en sporin sín. Því miður ber myndin hér að ofan nokkurs annars vitni, því þessu söfnuðum við saman (makríl stampinum líka) á 5 mín. við vatnið. Það hefði nú örugglega ekki gengið að gestum dauðum að hirða þetta upp eftir sig. En þetta rusl hefði svo sannanlega geta gengið að einhverjum öðrum dauðum, fugli og fiski.

Eins og sjá má voru þarna hnífsblöð af beittari gerðinni og girnisflækjur í töluverðu magni auk plastpoka og annarra umbúða. Hvernig gestum dettur í hug að skilja hnífsblöð sem þessi eftir á víðavangi er mér algjörlega fyrirmunað að skilja. Selvallavatn er vinsæll áningastaður og þarna skottast börn gjarnan eftir vatnsbakkanum, frelsinu fegin úr bílbeltunum. Þarna hefði getað orðið stórslys sem hvorki afsökunarbeiðni né fjármunir hefðu getað bætt. Þökkum nú fyrir okkur með góðri og varfærinni umgengni. Það eru kaldar kveðjur og lítið þakklæti til náttúrunnar og vina hennar að skilja svona rusl eftir sig.

Veiðidagur fjölskyldunnar verður haldinn næstkomandi sunnudag, 28. júní. Þá gefst landsmönnum kostur á að veiða án endurgjalds í fjölmörgum vötnum víðsvegar um landið. Landssamband Stangaveiðifélaga hefur staðið fyrir Veiðidegi fjölskyldunnar í á þriðja áratug ásamt veiðiréttareigendum.

Hugmyndin á bak við daginn er að kynna stangveiði sem fjölskylduíþrótt. Þetta árið verða 32 vötn í boði á veiðideginum. Allar upplýsingar um vötnin má nálgast á vef Landssambands Stangaveiðifélaga.

Viðburðaríkur dagur að kveldi kominn. Viðtal í Síðdegisútvarpi Rásar 2 og ákaflega ánægjulegt útgáfuhóf bókarinnar í Árósum. Kærar kveðjur með þökk til allra sem sáu sér fært að heilsa upp á mig í tilefni dagsins.