Fern ný tölublöð skutu upp kollinum í síðustu viku inn á FOS.IS  Þetta eru Southern Trout – Ozark Edition, The Flyfisher Magazine, H2O og Lure. 

Þá er nýtt ár gengið í garð eins og vera ber. Hér á síðunni hefur skapast sú hefð að uppfæra dagatalið þann 1.janúar ár hvert og ekki verður brugðið út frá þeirri hefð. Nýlega kannaði ég hverju gestir síðunnar hafa leitað helst að á umliðnum árum og þá lenti orðið dagatal nokkuð ofarlega á listanum og þessi einstaki liður hefur verið opnaður yfir 25.000 sinnum frá því hann birtist hér fyrst. Það eru því greinilega einhverjir sem nýta sér þetta grúsk mitt að setja gagnlegar upplýsingar fyrir veiðimenn saman í eitt dagatal.

Dagatalið vinn ég með ýmsum reikniformúlum og sameina síðan fyrir hvern dag ársins. Þannig má í dagatalinu finna upplýsingar um alla helstu tillidaga ársins; sólarupprás hvers dags, sólsetur, ásamt tímasetningu og hæð árdegis- og síðdegisflóðs. Innan hvers mánaðar má svo vitaskuld finna upplýsingar um stöðu tungls og þannig stærstu strauma.

Þar sem hér er um útreiknaðar upplýsingar að ræða geta þær vikið frá rauntíma um einhverjar mínútur, en það kemur vonandi ekki að sök. Dagatal ársins 2017 má nálgast hér.

Flugur og skröksögur halda ró sinni yfir hátíðarnar og fagna hækkandi sól með þá von í brjósti að fylgjendur síðunnar, vinir og vandamenn hafi það náðugt þessa fáu en góðu daga.

Meðal efnis í nýjasta This is fly má nefna grein um Mark Rauschenberger, fluguveiðimann og hnýtara. Annars er flest af efninu í þessu tölublaði að mestu ættað í grend við miðbaug jarðar og töluvert fjallað um veiði á framandi fiskum sem ég kann ekki að nefna.

Það kveður við nokkuð annan tón í nýjasta tölublaði Flyfishers Inc.  Þetta Ný-Sjálenska tímarit hefur lengi verið á leslistanum mínum, enda umhverfi veiðimanna þar og fiskarnir sem þeir glíma við ekki svo frábrugðið okkar hér á Íslandi.

Það hefur væntanlega ekki farið framhjá neinum að Veiðikortið 2017 er lent. Sem fyrr eru 35 vötn á kortinu, eitt fellur út og eitt nýtt kemur inn frá því í fyrra. Eflaust sakna einhverjir Meðalfellsvatns af kortinu, ég er sannanlega einn þeirra og þarf nú að finna mér nýtt fyrsta vatn vorsins þar sem ég get vaðið krapa og skautað á ís upp úr 1.apríl.

Nýliðinn á kortinu er Berufjarðarvatn í Reykhólahreppi. Þótt vatnið sé nýtt á kortinu er óhætt að segja að fá vötn eiga sér jafn langa sögu af veiði eins og Berufjarðarvatn og Alifiskalækur sem í það rennur að suðvestan. Í Þorskfirðingasögu er frá því sagt að ungir menn þar í sveit hafi verið frumkvöðlar í fiskirækt, væntanlega einhverjar elstu heimildir um silungseldi sem um getur á Íslandi. Tóku menn fisk úr vatninu og settu í lækinn og gerðu góða veiði þar á eftir. Úr Berufjarðarvatni rennur Kinnastaðaá til Hóps sem gengur inn úr Þorskafirði.

Með tilkomu Berufjarðarvatns hefur orðið til skemmtilegur veiðislóði sem hefst að sunnan í Haukadalsvatni í Dölum þaðan sem maður getur skotist yfir í Berufjarðarvatn í Reykhólasveit. Þaðan er svo einstaklega falleg leið inn að Vatnsdalsvatni í Vatnsfirði og ef menn kjósa að fara örlítið lengra eru örfáir kílómetrar í Sauðlauksdal og Sauðlauksdalsvatn við Patreksfjörð. Þetta gæti orðið skemmtilegt ferðalag næsta sumar og ekki þarf að hafa með sér ógrynni matar, því öll þessi vötn hafa gefið ágætlega og jafnvel betur en það, hin síðari ár.