Kristján Friðriksson

Fyrstu dagarnir

4. febrúar 2023

Febrúarflugur

Upp

Forsíða

Febrúarflugur fara heldur betur laglega af stað þetta árið, langt yfir 100 flugur litu dagsins ljós fyrstu þrjá dagana og meðlimum hópsins á Facebook fjölgar á degi hverjum.

Eins og nærri má geta er FOS.IS í skýjunum með þessar undirtektir hnýtara. Styrktaraðilar hafa heldur ekki látið sitt eftir liggja, nú sem endranær, og stöndum við í mikilli þakkarskuld við þá. Það er ljóst að FOS.IS getur veitt nokkrum heppnum hnýturum afar veglegar viðurkenningar fyrir þátttökuna í lok mánaðar og það fer ekki framhjá neinum að veglegir afslættir bjóðast hnýturum víða þennan mánuðinn og því um að gera að fylla á hnýtingarefnið eða tryggja sér nýtt og spennandi efni til að prófa í febrúar.

Styrktaraðilar okkar þetta árið eru

Smelltu til heimsækja Fish Partner

Smelltu til að heimsækja Flugubúlluna

Smelltu til að heimsækja Flugusmiðjuna

Smelltu til að heimsækja JOAKIM’S

Smelltu til að heimsækja Kolskegg

Smelltu til að heimsækja Valdemarsson

Smelltu til að heimsækja Veiða.is

Smelltu til að heimsækja Veiðiflugur

Smelltu til að heimsækja Veiðikortið

Smelltu til að heimsækja Vesturröst

FOS.IS ítrekar boð sig til hnýtingarklúbba og veiðifélaga að skjóta á okkur upplýsingum um samkomur og hnýtingarkvöld sem FOS.IS getur komið á framfæri við meðlimi Febrúarflugna sem nú telja tæplega 1.300 einstaklinga.

Höfundur:

Kristján Friðriksson
Coronation Bucktail

4. febrúar 2023

Fréttir

Upp

Forsíða

Ný fluga hefur verið sett inn á Flugur – uppskriftir : Klassísk straumfluga í sjóbirting, ættuð úr Vesturheimi

Smellið á myndina til að skoða uppskriftina

Höfundur:

Kristján Friðriksson
Alexandra

2. febrúar 2023

Fréttir

Upp

Forsíða

Ný fluga hefur verið sett inn á Flugur – uppskriftir : Alexandra, þessi margfræga fluga er loksins komin inn á FOS.IS

Smellið á myndina til að skoða uppskriftina

Höfundur:

Kristján Friðriksson
Febrúarflugur að hefjast

31. janúar 2023

Febrúarflugur

Upp

Forsíða

Nú eru Febrúarflugur 2023 rétt handan við hornið og það sem heitið gæti formleg dagskrá liggur fyrir og síðustu styrktaraðilar átaksins hafa verið að tilkynna stuðning sinn síðustu daga.

Eins og undanfarin ár verður heimavöllur Febrúarflugna á Facebook þar sem áhugasamir geta fylgst með þeim flugum sem hnýtarar eru að dunda við í mánuðinum. Þeir sem ekki eru á Facebook geta annað hvort póstað myndum á Instragram og merkt þær með #februarflugur eða sent FOS.IS tölvupóst með myndum og við sjáum um að pósta þeim á Facebook í nafni sendanda.

Þetta árið mun FOS.IS standa fyrir viðburði föstudagskvöldið 17. febrúar kl. 20:00 og hefur Stangaveiðifélagið Ármenn léð félagsheimili sitt að Hverafold 1-5 til afnota þetta kvöld.

Við undirbúning kvöldsins vaknaði sú hugmynd að leyfa fylgjendum Febrúarflugna og hnýturum sjálfum að fylla dagskrá kvöldsins. Eins skemmtilegt og það er að fylgjast með nýjum flugum á netinu, þá er líka áhugavert að sjá hnýtingar í raunheimum og jafnvel nýta tækifærið til að spyrja út í aðferð og efnisval í flugu. Því langar FOS.IS að biðja alla sem sjá áhugaverða flugu í Febrúarflugum og vilja fræðasta meira um hana að setja komment undir innsenda mynd með #langaraðsjá og FOS.IS mun kanna hvort viðkomandi hnýtari sjái sér fært að mæta þann 17. og hnýta eins og eina slíka og mögulega svara fyrirspurnum gesta. Vitaskuld eru allir hvattir til að mæta með hnýtingargræjur, hnýta nokkrar flugur og eiga létta og skemmtilega stund með öðru áhugafólki um flugur og fluguhnýtingar.

Eins og undanfarin ár höfum við haft nokkurn pata af Febrúarflugukvöldum hingað og þangað á vegum stangaveiðifélaga og hnýtingarklúbba í febrúar. Þeim sem vilja koma slíkum kvöldum á framfæri við meðlimi Febrúarflugna og á FOS.IS er velkomið að senda okkur skilaboð á heimasíðu okkar eða á Facebook og við munum koma viðburðinum á framfæri.

Fleira var það ekki að sinni, góða skemmtun kl.00:01 þann 1. febrúar þegar fyrstu flugurnar detta inn á Febrúarflugur 2023.

Höfundur:

Kristján Friðriksson
Hvaða taum ertu með?

26. janúar 2023

Línur og taumar

Upp

Forsíða

Nei, nú er ég ekki að spyrja lesendur, heldur vísa til þess þegar maður situr í mestu makindum heima við og einhver hringir, hendir á mann skilaboðum eða sendir tölvupóst og spyr hvaða taum maður notar. Úff, að fá svona spurningu er eins og flétta fjölþátta reipi, það eru svo margar breytur sem geta haft áhrif á svarið að maður eiginlega verður bara að svara einhverju almennu um sver- og stífleika miðað við flugu og lengd miðað við á hvaða dýpi viðkomandi ætlar að veiða. Þá hefur maður ekki tekið hitastig vatns, efni í taum eða mögulega stærð fisks með í reikninginn og þá getur voðinn verið vís fyrir þann sem spyr.

Kannski bara einfaldast að nota spún?

Auðvitað er hægt að víkja sér pent undan svari og vísa á einhverja af ‘standard’ formúlum fyrir taum eins og t.d. Taumalengd en þá er samt sem áður horft framhjá afar stuttum taumum og afar löngum taumum, mismunandi hráefni og umfram allt því sem skiptir verulegu máli; aðlögunarhæfni og reynslu veiðimanns. Það er nefnilega mikill munur á hæfum veiðimanni og reynslubolta. Ég hef nefnilega fengið það á tilfinninguna að reynsluboltarnir spá afskaplega lítið í mismunandi tauma, eru ekkert að velta sér upp úr samsetningu eða efnisvali, það er eins og mismunandi aðstæður, fiskur eða hvað eina sem getur haft áhrif á taumavalið sé orðið innbyggt í atferli þeirra og þeir þurfa ekkert að spá og spekúlera. Mér skilst að þetta sé fylgifiskur þess að vera reynslubolti umfram þá sem ‘bara’ brenna af áhuga.

Höfundur:

Kristján Friðriksson
Það má skipta um skoðun

24. janúar 2023

Kast

Upp

Forsíða

Eitt af undrum fluguveiðinnar, sem margir að vísu gleyma, er að flugulínan ferðast sömu slóð og toppur stangarinnar. Þetta getur vissulega orðið til vandræða, eins og til dæmis þegar maður ‘óvart’ sveigir stangartoppinn í síðasta framkastinu, línan skýst fram en tekur allt í einu upp á því að beygja af leið og lenda á allt öðrum stað en maður ætlaði henni.

Til að halda umræðunni á jákvæðu nótunum, þá er rétt að nefna hér stóra kost þessarar hegðunar. Segjum sem svo að við séum búin að leggja línuna niður, snúum nefinu vitaskuld í átt að skurðpunkti línunnar við vatnið og erum byrjuð að draga inn, þegar …. við verðum vör við að fiskurinn er að gúffa í sig æti hægra megin við okkur, vel innan kastfæris. Hvað er til ráða? Draga inn með hraði, lyfta línunni upp úr vatninu, snúa okkur í 90° og leggja af stað í ótilgreindan fjölda falskasta til að koma flugunni niður fyrir framan fiskinn? Vissulega hægt, en það er líka til auðveldari leið sem nýtir sér tregðu vatnsins og fylgni línunnar við feril stangartopps.

Leyfðu línunni að liggja í vatninu, haltu stangartoppinum alveg niðri við vatnsborðið og teiknaðu 90° (+/-) horn með með auknum hraða þar til toppurinn vísar í þá átt sem þú vilt kasta. Án þess að stoppa, lyftu stönginni upp með sama hætti og gert er í veltikasti og kastaðu beint út. Vatnið hjálpar þér að hlaða stöngina og því er engin þörf á falskasti.

Ef rétt er gert, þá mun línan fylgja boganum sem þú teiknaðir með stangartoppinum, lyftast upp úr vatninu og fara beint fram á nýja staðsetningu. Auðvitað er þetta bara veltikast, eini munurinn er upphafið þegar þú teiknaðir þennan huggulegan boga á vatnið sem línan fylgdi síðan.

Höfundur:

Kristján Friðriksson