Hítarvatn

HÍTARVatn

Hítarvatn hefur í gegnum tíðina alltaf þótt eitt besta veiðivatns landsins og mikið mært. Mín persónulega reynsla af vatninu er nokkuð önnur, mörg önnur vötn standa mér nær hjarta þegar kemur að veiði þó það verði aldrei af þessu vatni tekið að umhverfið er fallegt og oft nokkur veðursæld á þessum slóðum.

Á árum áður var ekki óalgengt að veiðimenn færu í Hítarvatn til að fylla á matarkistuna fyrir veturinn. Eitthvað hefur dregið úr slíkum sögum hin síðari ár og veiði þar getur verið upp og ofan eins og í öðrum vötnum. Það er ekki svo langt síðan að staðkunnugum þótti heldur fátt um fína drætti í bleikjuveiði í vatninu en síðan hafa nokkur góð ár komið sem blásið hafa vonum í brjóst veiðimanna að stofninn sé á uppleið. Sem kunnugt er, þá er það almennt svo að bleikju fer fækkandi á láglendi á Íslandi sökum hlýnunar vatns, en vonandi fáum við notið bleikjunnar í Hítarvatni eitthvað lengur.

Veiðistaðir eru fjölmargir eins og kunnugt er og má segja að þeir nái hringinn í kringum vatnið. Gangur inn með vatninu, hvort heldur að austan eða vesta er ekki slæm hugmynd. Gangurinn að austan getur verið nokkuð erfiður á köflum, gróft hraun og ekki allra að fóta sig neðan Foxufells þegar hátt stendur í vatninu og því alveg til umhugsunar að fara upp fyrir fellið á leið inn með vatninu.

Hítarvatn er eitt þeirra vatna sem lengi hefur verið á Veiðikortinu og nú (2023) er það aftur innan vébanda þess eftir stutta fjarveru.