Smellið á kort fyrir fulla stærð

Herbjarnarfellsvatn er skammt vestan Landmannahellis og er vel fært að vatninu fyrir alla bíla eftir miklar vegabætur sumarið 2019. Brekkurnar upp að hálsinum og síðan niður að vatninu eru þó nokkrar, en ættu ekki að hamla för. Vatnið er í 625 metra hæð í fallegri skál undir Herbjarnarfelli og áætlað hefur verið að það sé um 1 km2 að flatarmáli.

Aldrei hefur farið miklum sögum af aflabrögðum í þessu vatni, en þar með er alls ekki sagt að þar megi ekki gera góða veiði. Eingöngu er urriði í vatninu og þannig hefur það blessunarlega verið frá því fyrst var sleppt í það árið 1967. Stærðir fiska sveiflast nokkuð í vatninu og er það í beinum tengslum við sleppingar, mest veiðist af pundurum fyrstu árin eftir sleppingar, en heppnir veiðimenn ná þó alltaf stærri fiski. Sögur hafa gengið af stórum fiski þar á sveimi, en sjálfur hef ég sótt þangað fiska á bilinu eitt til tæplega þrjú pund, góður matfiskur og sérlega fallegur á holdið. Ég þekki aftur á móti vel til veiðikonu sem fékk svo öfluga töku í vatninu að hún skaut henni verulegum skelk í bringu og víst var að þar var stærri fiskur á ferð. Því miður náðist umræddur töku-urriði ekki á land þessu til sönnunar.

Með hliðsjón af staðsetningu, nálægð við tjaldsvæðið við Landmannahelli og því að þarna er fisks að vænta, þori ég alveg að mæla með því að menn prófi þetta vatn, því hefur ekki verið ofgert hin síðari ár, hverju sem það nú sætir og reglulegar sleppingar frá árinu 2016 hafa styrkt fiskistofninn í vatninu verulega.

Þess ber að geta að á nokkrum kortum er sýndur slóði frá bílastæðinu og inn með vatninu að austan og að Löðmundarvatni. Þessi slóði eru ekki akvegur, hér hafa kortameistarar farið hamförum og teiknað gönguleiðir sem akvegi.

TENGLAR


Kort

Bæklingur

FLUGUR


Kibbi: Ágúst
Peacock
Nobbler – Svartur
Nobbler – orange
Damsel – olvie
Authum Spendor
Humumgus

MYNDIR


Herbjarnarfellsvatn allt

ÖNNUR VÖTN