Misbrestur – Kuðl

Smellið fyrir stærri mynd

Þegar línan kuðlast niður í vatnið fyrir framan okkur hefur framkastið væntanlega lekið niður frá kl.11 án þess að um ákveðið stopp hefur verið að ræða. Finndu ákveðnara stopp (kl.11) og láttu stöngina síðan síga niður í stöðu á milli kl.8 og 9.

Misbrestur – Svipusmellir

Smellið fyrir stærri mynd

Svipusmellir í framkasti orsakast vegna þess að framkastið er hafið of snemma eða með of miklu afli. Aflið í framkastinu á að vera með jöfnum rísanda og umfram allt ekki hefjast áður en línan er búin eða við það að klára að rétta úr sér í bakkastinu.

Misbrestur – Vindhnútur

Smellið fyrir stærri mynd

Ein ástæða vindhnúta er að ferill stangartoppsins heldur ekki beinni línu (180°) frá fremra stoppi til þess aftara. Vegna þess að línan fylgir í raun alltaf toppi stangarinnar getur komið slynkur á hana undir þessum kringumstæðum og flugan fellur niður fyrir línuna og flækist. Lausnin er einföld; haldið kastferlinum í 180° eða reisið stöngina eilítið í bakkastinu.

Misbrestur – Í hnakkann

Smellið fyrir stærri mynd

Eftir að hafa fengið ófáar flugurnar í höfuðið, í orðsins fyllstu merkingu, fékk ég smá tilsögn; Ástæðan fyrir því að þú færð fluguna svona oft í hnakkann er slakur úlnliður og því stoppar þú ekki nógu ákveðið í bakkastinu. Snúðu höfðinu en ekki úlnliðnum og fylgstu með aftara stoppinu. Og viti menn, ég týndi færri flugum eftir þetta og hnakkinn er alveg við það að gróa. Sem sagt; ef hornið á milli stangar og framhandleggjar er meira en 30°og/eða aftara stopp er eftir kl.1, þá opnast kasthjólið í bakkastinu og línan fer sínar eigin leiðir.

Misbrestur – Ekkert kasthjól

Smellið fyrir stærri mynd

Eitt af því sem hrjáði mig lengi vel í fluguköstum, sérstaklega ef ég var búinn að vera lengi að berja vatnið, var að kasthjólið sem línan myndar í framkastinu hvarf. Það bara gufaði upp og bakkastið seig  niður í jörðina. Lengi vel skrifaði ég þetta á hverja aðra þreytu en svo kom orsökin í ljós. Í stað þess að kastferillinn væri tiltölulega stuttur, þ.e. kraft horn á milli fremstu stöðu og þeirrar öftustu, varð hann gleiður, eins og höndin héldi ekki lengur við í fremra og aftara stoppi. Lækningin var einföld; stöðugri úlnliður, öruggara grip og þar með styttri, skarpari kastferill. Sem sagt, ekki þreyta heldur léleg tækni, halda ferli stangarinnar í 180° línu frá aftara til fremra stopps.


Double Haul

Hef ekki minnstu hugmynd um hvernig ‘Haul’, hvað þá ‘Double Haul’ hefur verið þýtt yfir á íslensku.  Ef menn vilja sjá hvernig Google þýðir ‘Haul’ yfir á íslensku þá má kíkja hér.  Hvað um það, hérna er þokkaleg klippa sem ég fann á YouTube.