Að loknum tíundu Febrúarflugunum er FOS efst í huga þær frábæru undirtektir sem þetta litla hugarfóstur hefur fengið meðal hnýtara og áhugafólks um flugur og fluguhnýtingar í ár og á liðnum árum. Ef bókhaldið stemmir, þá eru flugurnar þessi 10 ár komnar í 7.566 sem er ekkert smáræði.

Í ár tókum tæplega 1.500 aðilar þátt með því að fylgjast með á Facebook og/eða á Instagram, auk þeirra fjölmörgu sem heimsóttu myndasafn Febrúarflugna á FOS.IS í mánuðinum. Að þessu sinni komu 1.140 flugur fram, þökk sé þeim 185 hnýturum sem lögðu flugur sínar á borð fyrir áhugasama.

Það lætur nærri að okkur hafi verið gert kleift að veita um fjórðungi hnýtara viðurkenningarvott fyrir þeirra framlag, þökk sé styrktaraðilum okkar sem létu ekki sitt eftir liggja, nú sem endranær. Nöfn heppinna hnýtara hafa verið birt á Febrúarflugum og eru þeir beðnir um að snúa sér til styrktaraðila átaksins og vitja eða virkja viðurkenningar sínar, nema annað sé sérstaklega tekið fram.

Til ykkar allra, kærar þakkir og vonandi sjá sem flestir sér fært að taka þátt í Febrúarflugum 2024.

Þann 1. mars mun FOS draga út nöfn 22ja heppinna hnýtara sem fá viðurkenningu frá styrktaraðilum okkar fyrir þátttökuna í Febrúarflugum þetta árið.

Veglegir styrkir velunnara okkar hafa í gegnum árin gert okkur kleyft að gauka glaðningi að hópi hnýtara sem árlega hafa verið dregnir úr hópi þeirra sem setja inn flugur í átakið og kunnum við styrktaraðilum okkar bestu þakkir fyrir stuðninginn.

Það var hreint út sagt frábær mæting á Febrúarflugukvöldið í Árósum, félagsheimili Ármanna í gærkvöldi. Rétt um 20 hnýtarar settust niður, hnýttu og spjölluðu við ríflega 20 gesti og hvern annan fram eftir kvöldi.

FOS langar að færa öllum þeim sem sáu sér fært að mæta, kærlega fyrir komuna og Ármönnum fyrir afnotin af Árósum.

Miðvikudaginn 22. febrúar mun FOS síðan heimsækja Stangaveiðifélag Borgarness í Landnámssetrið þar sem félagið stendur fyrir hnýtingakvöldi kl.20:00 FOS hvetur Borgnesinga og nærsveitunga til að mæta og kynna sér starf SVFB sem er eitt af mörgum stangaveiðifélögum sem er í sókn þessa dagana.

Það hefur vonandi ekki farið fram hjá neinum sem fylgist með Febrúarflugum að það er mikið að nýjum hnýturum sem hafa sprottið fram þetta árið. Nú þegar mánuðurinn er alveg við það að vera hálfnaður, þá er fjórðungur þeirra sem smellt hafa hér inn flugu, einstaklingar sem ekki hafa tekið þátt í Febrúarflugum áður. Ef okkur telst rétt til, þá eru samtals 122 hnýtarar búnir að leggja sitt að mörkum í mánuðinum og þar af eru 32 sem eru að sýna flugurnar sýnar í fyrsta skiptið í Febrúarflugum.

FOS má til með að ávarpa þennan hóp sérstaklega og bjóða þá hjartanlega velkomna í hópinn. Mikið af fallegum flugum meðal þeirra sem þessir nýju meðlimir hafa verið að setja inn í mánuðinum og sífellt bætast fleiri meðlimir í hópinn. Kærar þakkir til allra nýrra meðlima, gaman að sjá hve samfélagið okkar fluguhnýtara er að stækka, já eða koma fram í dagsljósið.

Enn sem fyrr réttist örlítið úr kynjahlutfallinu í hópinum, af 1341 eru konur 6% en voru rétt innan við 5% í fyrra. Þetta gengur hægt, en gengur þó. Áfram stelpur!

Já, svona rétt í lokin; flugurnar eru nú komnar vel yfir 500 og við vitum fyrir víst að það eru nokkur hnýtingarkvöld eftir í mánuðinum, þar á meðal Febrúarflugukvöldið á föstudaginn. Eru ekki örugglega öll búin að skrá sig sem ætla að mæta? Ef ekki, þá er um að gera að skrá sig og deila viðburðinum meðal áhugasamra.

Og alveg í blá lokin, þeim sem eiga umfram eða of mikið af hnýtingarefni er bent á Efnaskiptin á Febrúarflugukvöldinu. Mættu með efni sem þig langar að skipta út, hver veit nema einhver annar komi með einmitt það sem þig vantar.

Eins og boðað var í upphafi mánaðar þá stendur FOS.IS fyrir Febrúarflugukvöldi þann 17. febrúar kl.20:00 í Árósum, Hverafold 1-5.

Eins og segir í fundarboði, þá eru allir velkomnir á létt og lipurt hnýtingarkvöld þar sem boðið verður upp á veitingar á kostnaðarverði (kaffi, bjór, vín, gos). Tilvalið tækifæri til að hittast og spjalla um flugur og fluguveiði, grípa með sér hnýtingargræjurnar og eiga ánægjulega kvöldstund í hópi áhugafólks um flugur og fluguhnýtingar.

Þeir sem ætla að mæta eru beðnir um að skrá sig á viðburðinn þannig að unnt sé að áætla veitingar.

Það er von FOS.IS að þeir hnýtarar sem uppskorið hafa #langaraðsjá sjái sér fært að mæta, hnýta og spjalla við gesti og svara fyrirspurnum. Nú þegar hafa tveir þeirra staðfest mætingu og því um að gera fyrir meðlimi hópsins hnýtarar úr Febrúarflugum sem uppskáru #langaraðsjá staðfest komu sína.

Fyrirkomulagið á þessari nýbreytni hefur eitthvað vafist fyrir meðlimum hópsins, en í raun er það sára einfalt:

Ef þú sérð áhugaverða flugu í Febrúarflugum sem þú vilt fræðast nánar um, sjá hnýtta eða hefur spurningar um efnisval eða aðferð, settu þá #langaraðsjá í ummæli / komment undir myndina og FOS.IS sér um afganginn.

Eina sem þú þarft síðan að gera er að mæta á Febrúarflugukvöldið, þann 17. febrúar og ef lukkan er með okkur öllum, þá mætir hnýtarinn og þú getur fræðst nánar um fluguna.