Hlíðarvatnið skartaði sínu fegursta þegar við renndum í hlað við Hlíðarsel Ármanna upp úr hádeginu í dag. Fjöldi fólks nýtti sér fría veiði og leiðsögn á árlegum Hlíðarvatnsdegi veiðifélaganna, enda hefur vatnið verið í sínum gamla ham þetta árið, flott veiði og vænn fiskur.
Það var gestkvæmt hjá Ármönnum í dag
Heimsókn okkar var e.t.v. ekki sérstaklega til þess ætluð að taka fram stangirnar, meira svona til að sýna sig og sjá aðra. Engu að síður settum við saman þegar u.þ.b. klukkustund var eftir af veiðideginum og tókum stefnuna á Mosatanga með stuttu stoppi á Flathólma. Það fór svo að lokum, þ.e. eftir að hafa prófað næstum allar flugur í bókinni að ég setti rauðan Higa’s SOS undir (tilraundýr frá því í vetur) að ég setti í tvær bleikjur, 25 og 35 sm. Sú minni fékk líf, en hin bíður matreiðslu á morgun.
Vitaskuld renndum við að Hlíðarseli eftir veiði og kvittuðum fyrir þessum fiskum í veiðibókina og settum trúlega þar með punktinn fyrir aftan i-ið þennan dag og þar með voru skráðir 37 fiskar hjá Ármönnum.
Það var farið að nálgast mánuð frá því við fórum síðast í veiðiferð, þannig að það var ekki um annað að ræða en láta slag standa og nýta í það minnsta part úr laugardeginum í veiði. Gíslholtsvatn varð fyrir valinu því sunnudagurinn var frátekinn í Hlíðarvatnsdaginn.
Ekki var það veðrið sem varð þess valdandi að við vorum heldur sein á ferðinni á laugardaginn, en á áfangastað komumst við rétt um seinna kaffi og fengum að pota vagninum niður við sunnanvert vatnið, takk fyrir strákar að hleypa okkur svona alveg ofan í ykkur.
Himbrimapar á Gíslholtsvatni
Áður en vagninn var settur upp, töltum við hjónin inn með vatninu til vesturs og gerðum heiðarlega tilraun til að setja í einhverja fiska. Frúin setti í afskaplega vænan og sprækan urriða sem tók flugunni með loftköstum og losaði sig snilldarlega af. Um leið og urriðinn tók þessi loftköst, köfuðu nálægir himbrimar og hafa trúlega gert sé þennan urriða að góðu þegar hann hafði sagt skilið við flugu frúarinnar. Sjálfur setti ég í einn titt sem fékk líf og þá eru nú öll afrek okkar talinn.
Eftir að hafa sett upp vagninn og svalað mesta þorstanum, tölti ég aftur inn með vatninu á meðan frúin litaðist aðeins um fyrir innan augnlokin. Í þá tæpa tvo klukkutíma sem ég barði vatnið með öllum mögulegum flugum varð ég ekkert frekar var við fisk, þannig að ég hætti snemma og tók á mig náðir að hætti gamalmenna, var sofnaður rétt um kl.23 og svaf eins og steinn fram undir kl.9 Kannski flensuskítur síðustu vikna hafði haft eitthvað með þetta að gera, en mikið ofboðslega var samt gott að komast út undir bert loft og út í sveit.
Ég deili greinum og myndum af þessum vef á ýmsum samfélagsmiðlum. Einn þessara miðla er Instagram þar sem ég hef verið að setja inn myndir úr veiðiferðum og einstaka fiski sem slæðist á land undir merkinu @fosvefur Þær eru yfirleitt ekki margar myndirnar sem ég birti af mínum aflabrögðum, en um daginn deildi ég einni sem tekin var í lok fyrsta veiðidags í Veiðivötnum hjá okkur hjónum í fyrra. Myndin er nokkuð hressileg, tekin við Litlasjó þar sem ég hafði raðað afla dagsins á vatnsbakkann.
Umrædd mynd á Instagram
Með myndinni var stuttorð lýsing, ekki ósvipuð þeirri hér að ofan. Ekki leið á löngu áður en hún hafði fengið 32♥ sem jafngilda Like á Facebook. En svo komu ein ummæli sem hafa verið að angra mig aðeins; 23 dead fish. Hideous …. sem útleggst á íslensku; 23 dauðir fiskar. Hræðilegt …. Ég sagði að þetta hefði angrað mig, ekki það að einhver hafi skrifað þessi ummæli, heldur sú áleitna spurning hvort mynd sem þessi stuði veiðimenn sem gæta hófsemi í veiði og láta sér nægja einn til tvo fiska í soðið eða sleppi jafnvel öllum fiskum, sama hvar þeir eru veiddir og hverrar tegundar þeir eru.
Ég geri á engan hátt ráð fyrir því að þessi erlendi aðili og ummælahöfundur þekki til Veiðivatna og Litlasjós og geri sér því grein fyrir að vatnið er með stærstu sleppitjörnum norðan Alpafjalla. Því er nú einu sinni þannig farið að urriði á almennt fárra kosta völ til hrygningar í Veiðivötnum og stofninum hefur verið viðhaldið með seiðasleppingum. En burtséð frá því, þá gæti þessi mynd auðveldleg talist sönnun á frystikistuveiði eins og einhverjir kalla það að veiða sér til matar og þá ekki aðeins eina máltíð í einu. En, ég skammast mín ekkert fyrir að veiða mér til matar. Fiskur er frábær fæða, svo maður tali nú ekki um þegar hann kemur úr hreinni náttúru norðurhjara veraldar.
Á sama tíma og neysla fiskpróteins hefur rokið upp á heimsvísu er talað um að ríflega 30% þess komi nú úr eldisfiski. Þetta eru ógnvekjandi tölur því til að framleiða 1 kg. af eldisfiski þarf að gefa honum fóður sem unnið er úr 1,46 kg. af viltum fiski (lýsi og fiskimjöl) og 1,3 kg. af jurtaafurðum (soja, repja, maís og hveiti). Þetta er því í raun fáránleg sóun og því þykir mér óþægilegra að sjá metralangar raðir af eldislaxi og silungi í stórmörkuðum eins og á myndinni hér að neðan, heldur en af hressilegum afla stangveiðimanna. Þessi mynd er tekin í stórmarkaði rétt við höfnina í Bergen í Noregi. Hér er ekki einn einasti villtur fiskur á myndinni, þetta er allt eldisfiskur úr innfjörðum Noregs og þetta fiskborð er rómað fyrir stærð sína, úrval og umfang.
Frá Bergen í Noregi
Ég velti því fyrir mér hvaða ummæli vinur minn á Instagram léti falla ef ég mundi birta þessa mynd þar. Þegar ég lék mér að þessu í huganum, sá ég hann fyrir mér með gómsætt sushi úr eldislaxi í glansandi plastboxinu sínu á leið heim til sín að dissa stangveiðimenn á Instagram. Verði honum að góðu, vonandi veit hann að plastboxið endar í holdi sjávardýranna sem síðan verða notuð sem fóður í eldislaxinn sem hann svo étur í sushi eftir einhver ár. Á meðan ætla ég að fá mér ristað brauð með reyktum eða gröfnum urriða úr Veiðivötnum.
Sunnudaginn 12. júní verður haldið upp á hinn árlega Hlíðarvatnsdag í Selvoginum. Undanfarin ár hefur verið gestkvæmt í Selvoginum í lok ágúst, en þetta árið verður dagurinn haldin hátíðlegur nú í júní.
Þennan dag bjóða veiðifélögin gestum og gangandi til veiði í vatninu og ef að líkum lætur gefst mörgum kostur á að smakka einhverja bestu bleikju landsins næsta sunnudagskvöld. Vatnið hefur farið einstaklega vel af stað þetta árið, veiði verið góð og fiskurinn einstaklega vænn og vel haldinn.
Hlíðarvatn í Selvogi
Þeim sem hafa áhuga á að kynnast þessu frábæra veiðivatni er bent á að hér má nálgast ágætar leiðbeiningar um flugur og veiðistaði sem teknar voru saman í bækling árið 2012. Veiðifélögin sem standa að Hlíðarvatnsdeginum eru; Stangaveiðifélagið Stakkavík, Stangaveiðifélag Hafnarfjarðar, Stangaveiðifélag Selfoss, Ármenn og Stangaveiðifélagið Árblik. Veiðihús þessara félaga verða vel mönnuð á sunnudaginn, kaffi á könnunni og nægar tröllasögur til áheyrnar.
FOS 