Sauðleysuvatn

Sauðleysuvatn er um 0,8 km² og er í 576 metra hæð. Vatnið er ógnar djúpt þar sem það er dýpst, 56 metrar. Þetta mikla dýpi hefur freistað marga veiðimanna til að halda að þarna geti stórar ránbleikjur hreiðrað um sig, en engar sögur hef ég samt heyrt af slíkum fiskum komið á land.

Áður en lengra er haldið skal þess getið að slóðinn inn að Sauðleysu er aflagður og því ekki akfært að vatninu og hefur ekki verið síðan vorið 2019.

Sauðleysuvatn er eitt af bleikjuvötnunum sunnan Tungnaár sem illa gekk að halda í horfi varðandi fjölda einstaklinga og holdafar. Reynt hefur verið að grisja vatnið og vissulega hafa margir fiskar komið á land en það sér vart högg á vatni.

Að mínu mati er þetta eitt fallegasta vatnið í Framvatna klasanum og synd og skömm hve bleikjan er orðin liðmörg í því og að sama skapi illa haldin, hausstór og horuð. Því miður er hér hægt að segja það saman og um mörg önnur vötn; bleikjusleppingar > gróska > ofsetið > óveiðanlegt.