Nýjavatn

Nýjavatn tók miklum breytingum á 8. áratug síðustu aldar þegar bleikjan úr Vatnakvísl náði þar fótfestu. Eins og svo víða annarsstaðar þar sem bleikjan helgar sér ný búsvæði, var meðalvigt hennar ágæt í fyrstu en síðan hefur hún fallið nokkuð hratt og nú er svo komið að fiskar vel undir pundinu eru þar allsráðandi í afla. Nýjavatn hefur ætíð verið á meðal aflahæstu vatna svæðisins, þar veiðast alltaf einhverjir tugir urriða ár hvert, en þúsundin liggja í bleikjunni. Vatnakvísl hefur nokkuð greiðan samgang við vatnið og á meðan svo er virðist því lítil von til að urriðinn nái þar fyrri fótfestu

Vatnið er töluvert stórt, 0,56km² að flatarmáli og meðaldýpt þess er 6,6 metrar og fjöldi veiðistaða er merktur hringinn í kringum vatnið. Mín upplifun af vatninu er sú að því nær Vatnakvísl sem maður veiðir, því smærri fiskur hleypur á snærið, hvort þetta sé algilt eða tengist aðeins minni veiðitækni, þori ég ekki að fullyrða.