Nú er sko allt að gerast, Veiðikortið 2012 með tveimur nýjum vötnum að koma í lok mánaðarins á sama verði og 2011. Nú styttist í að Veiðikortið 2012 komi út en áætlað er að það komi út í lok mánaðarins. Búið er að semja um að tvö ný vatnasvæði bætast við þau vötn sem fyrir eru. Heildarfjöldi vatnasvæðanna er þá orðinn 37. Áætlað er að byrjað verði að dreifa Veiðikortinu á sölustaðið síðustu daga nóvember og fyrstu vikuna í desember, þannig að Veiðikortið 2012 verður klárt í jólapakka landsmanna. Nú þegar er byrjað að selja kortið á vefnum, http://www.veidikortid.is og er verðið óbreytt frá fyrri árum eða aðeins kr. 6.000.-  Lesa meira…

Mér hefur borist til eyrna að Veiðikortið 2012 bjóði okkur upp á tvö ný vötn í Dölunum; Hólmavatn og Laxárvatn. Hvort öll s.k. Sólheimavötn verða með í spilinu er aftur á móti spurning en um Hólmavatn má segja að þar hafa menn átt von á bæði urriða og bleikju en í Laxárvatni aðeins urriða. Nú er um að gera að fylgjast með á vef Veiðikortsins og næla sér í bæklinginn þegar hann kemur.

Þá hefur mestu forvitninni verið svalað. Daglegar heimsóknir á síðuna hafa verið nokkuð rokkandi síðustu vikur sem er e.t.v. ekkert óeðlilegt því um þriðjungur þeirra sem svöruðu skoðanakönnuninni hjá mér eru þeir sem kíkja annars lagið á bloggið. 45% kíkja vikulega, 17% daglega, en aðeins tæp 6% nýta sér RSS þjónustu og fylgjast með blogginu í lesara (Reader).

Ef ég nota nú þessa niðurstöðu og heimfæri upp á daglegar heimsóknir síðustu fjögurra vikna þá reiknast mér til að u.þ.b. 600 lesendur séu að fylgjast með blogginu. Getur maður ekki bara verið nokkuð sáttur?

Fram að næstu vertíð, sem vonandi byrjar með stæl snemma næsta vor, hafði ég hugsað mér að bæta jafnt og þétt í fluguuppskriftirnar, einhverja punkta um hnýtingar og hnýtingarefni ásamt því sem til fellur. Vonandi svalar þetta aðeins helsta veiðikláðanum sem vill oft leggjast á veiðimenn svona yfir vetrarmánuðina.

Nú er fimmta tölublaðið af Veiðislóð komið á netið. Eins og útgefendur sjálfir nefna þá eru nokkrar áherslubreytingar í efnistökum, skotveiðinni gert hærra undir höfði en auðvitað er einnig að finna skemmtilegar greinar um stangveiði í þessu blaði.

Ég þreytist víst seint á því að hrósa þeim félögum fyrir frábært blað og þetta gefur fyrri blöðum ekkert eftir. Blaðið má nálgast hér.

Af öllu veiðibloggi að dæma, þá eru margir, ef ekki flestir stangveiðimenn búnir að leggja árar í bát þetta árið. En vertíðinni er ekki lokið fyrr en menn hafa gengið frá græjunum, yfirfarið og komið fyrir í öruggri geymslu. Fyrir þá sem ekki eru búnir að ganga frá, þá er hér pistill sem ég tók saman í fyrra með nokkrum ábendingum um frágang og geymslu veiðigræja. Kíktu á hann hérna.