Laugardaginn 27. febrúar verður opið hús í Árósum, félagsheimili Ármanna, að Dugguvogi 13. Húsið opnar kl.14 og verður opið í það minnsta til kl.16, lengur ef sá gállinn er á gestum. Á þessu opna húsi gefst gestum kostur á að kynna sér starfsemi Ármanna, hnýta flugur og spjalla um flugur og fluguhnýtingar við jafnt reynda sem óreynda fluguveiðimenn. Efnt verður til fluguskipta þar sem þeim sem hug hafa á er boðið að leggja 10 flugur í púkk og fara síðan heim með einhverjar allt aðrar 10 í farteskinu í lok dags. Að sjálfsögðu eru allir áhugamenn um flugur og fluguveiði velkomnir á þetta opna hús, óháð því hvort þeir hafi tekið þátt í Febrúarflugum eða ekki. Kaffiveitingar og góður félagsskapur á staðnum eins og Ármönnum einum er lagið.

Nánari upplýsingar um dagskrá Febrúarflugna, síðustu skil og tímasetningu atkvæðagreiðslunnar er að finna hérna.

Þann 15. janúar opnar Veiðistaðavefurinn á slóðinni http://www.veidistadir.is/  Stefnt er að því að vefurinn innihaldi helstu upplýsingar um alla veiðistaði á Íslandi. Metnaðarfullt átak þeirra sem að vefnum standa, en af því sem ég hef séð af vefnum er óhætt að segja að vel hefur til tekist.

Nú þegar eru skráðir ríflega 300 veiðistaðir á vefinn og áður en yfir líkur verða þeir á bilinu 400 – 500. Fyrir hvern veiðistað má nálgast ýmsar upplýsingar, s.s. veiðileyfi, vinsælar flugur, nákvæma staðsetningu og veiðitölur. Með tíð og tíma eykst síðan tengt efni því kunnugir geta gefið hverjum veiðistað umsögn og stjörnur skv. eigin reynslu og upplifun.

Um þessar mundir og fram til loka febrúar efnir Veiðistaðavefurinn til ljósmyndakeppni meðal veiðimanna þar sem keppt er í ýmsum flokkum. Vegleg verðlaun eru í boði, allt frá völdum silungaflugum og upp í veiðileyfi í Minni-Vallalæk. Áhugasamir geta sent inn myndir í skilaboðum á Facebook síðu vefsins eða með því að senda tölvupóst á myndakeppni@veidistadir.is

Spjallhópar um stangveiði eru engin ný bóla. Til eru nokkrir hópar á samfélagsmiðlum sem hafa náð að skjóta rótum svo um munar, aðrir verða skammlífari eins og gengur. Margir þessara hópa hafa misst flugið eftir að trukkar hafa farið þar hamförum og valtað yfir aðra meðlimi eða úthrópað innlegg þeirra. Aðrir hópar hafa einfaldlega dagað uppi en góðir hópar lifa svo lengi sem umræður á þeim eru áhugaverðar, fjölbreyttar og haldið á siðuðum nótum.

Flugur og skröksögur hafa nú sett á fót hóp á Facebook með það fyrir augum að meðlimir geti sett þar inn hverja þá fyrirspurn sem þeim dettur í hug sem tengist stangveiði. Því fleiri sem taka þátt í hópinum, því meiri líkur eru á að fá góð og gild svör við jafnt einföldum sem flóknum spurningum. Vel að merkja, það er engin spurning heimskuleg, nema þá sú sem aldrei var lögð fram.

Það er von okkar að væntanlegum meðlimum hópsins takist að halda umræðum á siðuðum nótum, gæti orðavals og sýni almenna kurteisi í samskiptum, rétt eins og í samræðum manna í millum á förnum vegi.

Því miður hafa margir góðir spjallhópar og vefir liðið undir lok í gegnum tíðina vegna óhóflegra auglýsinga, beinna og óbeinna. Hér verða engar hótanir hafðar uppi um brottvísun meðlima, fjarlægingu innleggja eða aðra ritskoðun. Auglýsingar eiga einfaldlega ekki heima í þessum hópi. Honum er ætlað að vera vettvangur þeirra sem hafa áhuga á stangveiði sem áhugamáli, ekki atvinnu- eða tekjuöflun. Meðlimir eru beðnir að virða þetta.

Áhugasamir geta tekið þátt í hópinum með því að smella hérna og um að gera að bjóða áhugasömum vinum að vera með.

Flugur og skröksögur senda öllum lesendum vefsins og Vatnaveiði -árið um kring sínar bestu óskir um ánægjulega hátíð með von um að efnið hafi verið lesendum til einhvers gagns og mögulega gamans.

Síðustu daga höfum við verið að breyta útliti vefsins töluvert. Markmiðið með þessum breytingum var helst að styðja betur við farsíma og spjaldtölvur, nokkuð sem fyrri vefur gerði ekki nægjanlega vel. Nú hefur nærri allt efni vefsins, tæplega 1000 greinar og síður, verið yfirfarnar og aðlagaðar nýju útliti eins og unnt er.

Smávæginlegar breytingar voru gerðar á virkni vefsins. M.a. er nú hægt að skoða allar færslur vefsins í fullri lengd á einni síðu (FÆRSLUR) í stað smámyndar og úrdráttar áður.  Allir yfirflokkar efnis hafa verið settir á forsíðuna með smámyndum, en sem fyrr er hægt að opna hvern flokk sérstaklega í valmyndinni efst á skjánum. Valmyndin var einnig lagfærð þannig að hún á sér nú fastan samastað, efst á síðunni, sama hvert vafrað er á vefnum.

Einn af stærstu kostum þessa nýja útlits er að nú getum við sett stærri myndir með efninu og einkennt hverja grein með sérstakri mynd í haus. Þennan kost ætlum við að nýta okkur í meira mæli framvegis en nú þegar hefur fjölda mynda verið bætt við umfjöllun um (VÖTNIN).

Svo fékk hitt barnið, Vatnaveiði -árið um kring smá pláss á forsíðunni þar sem við birtum úrdrætti úr umsögnum bókarinnar sem komið hafa fram.

Með þessari breytingu vonumst við til að gestir síðunnar verði enn sáttari og eigi auðveldar með að finna og nýta sér efni hennar.

Vegna annmarka á eldra útliti vefsins erum við að vinna í að skipta um útlit og virkni. Allt efnið er auðvitað aðgengilegt, en það gæti litið eitthvað skringilega svona rétt á meðan við aðlögum það nýju útliti.

Stefnum á að vera komin á rétt ról öðru hvoru megin við jól 🙂