Kristján Friðriksson

Blóðormur

7. febrúar 2026

Hnýtingar

Upp

Forsíða

Það eru örugglega til milljón tegundir af Blóðormi, þ.e.a.s. veiðiflugunni, kannski þeim náttúrulega líka. Í gegnum tíðina hef ég hnýtt nokkrar flugur sem ég hef neytt heitið Blóðormur upp á. Sumar hafa gefið, aðrar ekki, sumar eru flóknar, aðrar ekki, en það sem mér hefur virst standa upp úr af þeim sem ég hef prófað er að það eru þær einföldu sem virka og oftast þær sem fljótlegastar eru í hnýtingu.

Mynd: Mike Wilkinson

Fyrir rúmum áratug síðan var ég eitthvað að grúska eins og svo oft áður og rakst þá þennan blóðorm frá Nýsjálendingnum Mike Wilkinson frá Cromwell á bökkum Dunstanvatns. Mike þessi er glettilega skemmtilegur hnýtari og fer ekki alltaf troðnar slóðir í efnisvali. Í þessa útgáfu af blóðormunum þræðir hann svartan vír í gegnum rautt Veniard Ultra Lace Tubing, setur lykkju á vírinn og festir CDC fjaðrir í lykkjuna. Þetta festir hann síðan á grupper krók með svörtum tvinna og bætir CDC fjöður í haus flugunnar.

Þessa flugu spreytti ég mig á að hnýta en átti því miður ekki rautt Ultra Lace, þannig að ég notaði glært og þræddi rauðan vír í gegn. Eftir töluvert bölv og ragn við að festa CDC fjöður í lykkjuna gafst ég upp og notaði þess í stað UV Ice garn sem ég reytti aðeins í sundur og þynnti. Síðan þá hef ég hnýtt þessa flugu bæði úr glæru Ultra Lace með rauðum vír og rauðu með svörtum vír, en alltaf haldið mig við að nota UV Ice garn og þannig hefur hún fært mér nokkra fiska. Ég mæli alveg með þessari útfærslu flugunnar, hún er fljótleg í hnýtingu og endist alveg ótrúlega vel. Annars biður Mike að heilsa til Íslands, hann er um þessar mundir að þyngja flugurnar sínar þarna hinum megin á hnettinum, hitinn hefur rokið upp í vötnunum og urriðinn hefur sökkt sér niður í kaldara vatn.

Ef þú vilt skoða örlítið breytta útfærslu af flugunni og lýsingu hennar, þá er hana vitaskuld að finna hér á FOS.

Höfundur:

Kristján Friðriksson
Föndurstund

4. febrúar 2026

Fréttir

Upp

Forsíða

Það er ekki ný saga að fluguhnýtarar eru margir hverjir miklir föndrar, þeir föndra við hverja flugu sem þeir hnýta, taka allt út úr núvitundinni að sitja við þvinguna og raða alls konar hnýtingarefni upp á rör eða króka. Þó flestir hnýtarar sæki efni í veiðivöruverslanir hér heima. þá eru það ekki einu verslanirnar sem bjóða upp á hráefni sem nýta má í flugur. Sumir kíkja reglulega í garnbúðir og athuga hvort eitthvað skemmtilegt garn hafi komið í hillurnar, aðrir kíkja eftir frauði í föndurbúðum til að lyfta flugunum aðeins upp eða jafnvel glerperlum af ýmsum stærðum og gerðum sem hægt er að nota í hnýtingar.

Fyrir margt löngu síðan eignaðist ég box með einum 12 hólfum, fullum af glerperlum í þremur litum frá gulu yfir í brúnan í fjórum stærðum. Ég þori ekki að skjóta á hve margar perlur eru í þessu boxi, einfaldast að segja að þær eru óendanlega margar. Þessar perlur hef ég notað í ýmsar flugur í gegnum árin, flestar til að auka sýnileika þeirra eða þyngja hóflega. Þannig að því sé haldið til haga, þá munar reyndar ekki miklu á þyngd glers og kopars eða brass, en það klampar óneitanlega meira á glerið heldur en málminn.

Ýmsir hnýtarar hafa spreytt sig á að nota glerperlur, skemmst er að minnast Kavíar, Helgu Gísladóttur og sjálfur hef ég hnýtt Hrognið að erlendri fyrirmynd (einhver aulalega einfaldasta flugu sem til er). Blóðorm úr litlum rauðum glerperlum og ýmsar aðrar með glærri perlu í haus til að líkja eftir loftbólu rísandi klekju (e. emerger).

Ekki alls fyrir löngu settist ég síðan niður og hnýtti afar einfalda flugu eftir að hafa lesið mér til um kviðpokaseiði laxfiska, stærð þeirra og hvenær helst er að rekast á þau í ám, vötnum og lækjum hér á landi. Flugur þessar ganga, með einum eða öðrum samtengingum, undir heitinu Beaded Alevin upp á enska tungu, sem ég leyfði mér að einfaldlega að kalla Kviður upp á íslensku. Þegar ég hafði föndrað nokkur eintök af þessari flugu eftir ýmsum mismunandi uppskriftum, þá slökkti ég á skjánum og hnýtti þessa flugu eftir eigin höfði. Uppskrift að flugunni má nálgast hérna.

Því miður átti ég ekki hárauða glerperlu í réttri stærð, annars hefði ég líka hnýtt horsílahæng með sömu aðferð á örlítið stærri krók og nefnt hann Rauðkóng. Ég þarf kannski að kíkja í föndurbúð og verða mér úti um rauðar glerperslur.

Höfundur:

Kristján Friðriksson
Fyrsti í febrúar

2. febrúar 2026

Febrúarflugur

Upp

Forsíða

Það kenndi sannanlega ýmissa grasa fyrsta daginn í Febrúarflugum þegar 45 flugur rúlluðu þar inn í gær. Flugurnar voru af öllum gerðum; silungapúpur, straumflugur, laxaflugur og svo mætti lengi telja. Virkilega skemmtilegt að sjá allt það sem hnýtarar eru að dunda við. Fyrsti samantektar skammturinn er kominn inn í myndasafn ársins á FOS (sjá: hérna) sem verður uppfært reglulega þar til yfir lýkur.

Vildarvinum Febrúarfluga, þ.e. þeim sem gera extra vel vil hnýtara í febrúar, fjölgar nú óðum og um að gera að fylgjast með tilkynningum í hópinum á Facebook. En það er ekki aðeins vildarvinum sem fjölgar, meðlimum í Febrúarflugum fjölgar einnig og nú eru þeir farnir að narta í 2.000

FOS vill sérstaklega benda á að í kvöld, 2. febrúar er fyrra opna hnýtingakvöldið hjá SVAK í Brekkuskóla á Akureyri. Áhugasömum er bent á þetta frábæra framtak SVAK og hvattir til þess að mæta í kvöld eða þá að viku liðinni, þann 9. febrúar. Allar nánari upplýsingar má nálgast á heimasíðu SVAK (sjá: hérna).

Eins og oft áður, þá hefur FOS fengið til liðs við sig fréttaveitur sem hyggjast fylgjast með og færa landsmönnum fréttir og samantektir þess sem er að gera í Febrúarflugum og eiga aðstandendur þeirra hrós skilið fyrir. Þeir sem ætla að færa okkur fréttir að þessu sinni eru; Flugufréttir (flugur.is) – Ertu að fá’nn (brakandi nýr fréttamiðill Sigga Haugs) og Sporðaköst (mbl.is). Endilega fylgist með þessum veitum, allt sjónarhorn miðla á Febrúarflugur er fluguhnýtingum til framdráttar.

Höfundur:

Kristján Friðriksson
Þær eru að detta inn

31. janúar 2026

Febrúarflugur

Upp

Forsíða

Einhverra hluta vegna finnst mér eins og vinsælasta spurning dagsins sé ekki tengd EM í handbolta, Grænlandi eða verðbólgu á uppleið, heldur „Hvernig verða Febrúarflugur þetta árið?“ Stutta svarið er einfaldlega „Ég veit það ekki, en ég vona að þær verði jafn skemmtilegar og síðustu ár.“ Ef þetta gengur eftir, þá eiga stuðningsaðilar átaksins hrós skilið, en ekki síst rúmlega 1.800 hnýtarar og áhugafólk um flugur og fluguveiði sem fylgjast með á Facebook.

Og núna styttist í fyrsta útspil ykkar. Á miðnætti í kvöld gengur febrúar í garð og í fyrramálið vöknum við upp og virðum kannski fyrir okkur bronslitaðar EM flugur, útblásna appelsínugula Nobblera eða rauðar og hvítar Grænlandsflugur, hver veit? Eitt er víst, ég verð ævarandi þakklátur öllum þeim sem hafa tekið þátt í Febrúarflugum í gegnum árin og ég bíð spenntur eftir því að Flugurnar komist í fyrsta sætið enn einn heilan mánuð.

Stuðningsaðilum Febrúarflugna sem vilja koma sér á framfæri er bent á að skjóta skilaboðum á FOS (t.d. hérna) og láta vita af sínu framlagi þannig að unnt sé að koma því til meðlima Febrúarflugna.

Höfundur:

Kristján Friðriksson
Atlas

30. janúar 2026

Flugur

Upp

Forsíða

Títaninn Atlas ber himininn uppi samkvæmt grísku goðafræðinni og til þess hefur væntanlega þurft töluverða krafta, Grettistak ef við færum okkur heim í átthaga þessarar flugu. Eins og um margar aðrar þekktar flugur, þá varð hún til fyrir ákveðinn veiðistað, nánar tiltekið Sogið. Á síðasta snúningi, korter í háttatíma settist höfundur flugunnar, Ólafur Hilmar Foss niður kvöldið fyrir veiði og hnýtti þessa flugu vorið 2021. Hann hafði heyrt að eitthvað dökkt, með einhverju pínulitlu rauðu, væri að virka vel í Soginu og vegna tímaskorts varð hún að vera einföld og fljóthnýtt þar sem allt var á síðasta snúningi þetta umrædda kvöld.

Flugan sannaði sig ævintýralega daginn eftir og þegar Ólafur hafði sett í sjöundu bleikjuna á innan við hálftíma, fauk svolítið í makkerinn hans sem hafði ekki fengið eitt einasta högg og hann krafðist þess að fá að sjá þessa nýju flugu sem Ólafur hafði „grautað saman, hálfmeðvitundarlaus af þreytu kvöldið áður“, svo notuð séu hans eigin orð.

Undirritaður hefur fylgst með höfundi flugunnar allt frá árinu 2021 þegar hann setti sínar fyrstu flugur inn í Febrúarflugur og til gamans þá gefur hér að neðan að líta allar Febrúarflugurnar hans frá upphafi, 79 talsins.

Ólafur var svo vinsamlegur að hnýta nokkur eintök af Atlas fyrir FOS og upplýsa um efnistökin þannig að (loksins) er Atlas kominn hérna inn á FOS.

Höfundur:

Kristján Friðriksson
Hnýtingakvöld SVAK í febrúar

26. janúar 2026

Febrúarflugur

Upp

Forsíða

Í tilefni af Febrúarflugum ætlar Stangaveiðifélag Akureyrar að bjóða gestum og gangandi upp á tvö hnýtingakvöld í Brekkuskóla 2. febrúar og 9. febrúar kl 19:30-21:30.

Kennarar verða þeir Jón Bragi Gunnarsson og Guðmundur Ármann Sigurjónsson. Áhugasamir eru hvattir til að taka með sér græjur en vitaskuld verða áhöld og efni til staðar fyrir þá sem enn hafa ekki fjárfest í slíku. Aðgangur er ókeypis en óskað er eftir að þátttakendur staðfesti mætingu með því að senda póst á svak@svak.is og nýta þá tækifærið til að láta vita hvort þeir óski eftir áhöldum og efni.

FOS mælir sterklega með því að áhugasamir bregðist fljótt og vel við og nýti sér þetta kostaboð SVAK.

Ef þú ert enn að velta fyrir þér Febrúarflugum eða hvernig þú getur lagt þitt að mörkum, þá er eins líklegt að svarið sé að finna hérna á FOS.

Höfundur:

Kristján Friðriksson