Kristján Friðriksson

Hnýtingar- og kynningarkvöld

13. febrúar 2017

Fréttir

Upp

Forsíða

Hnýtingar- og kynningarkvöld í kvöld kl. 20 – 22 í Árósum, Dugguvogi 13

Mánudagur í febrúar og það þýðir aðeins eitt; það er hnýtingar- og kynningarkvöld í Árósum í kvöld. Að þessu sinni kemur Robert Nowak og setur í nokkrar af uppáhaldsflugunum sínum, en Robert er áhugamönnum um fluguhnýtingar að góðu kunnur frá fyrri viðburðum þar sem hann sópaði að sér viðurkenningum í fyrra, enda hafa flugur hans notið mikillar athygli hér heima og erlendis.

Auðvitað verður hnýtingaraðstaða í boði fyrir alla sem vilja smella í eins og eina, tvær eða fleiri flugur og það verður örugglega heitt á könnunni, eins og önnur kvöld.

Vesturröst verður með kynningu á sínum vörum, enda af nógu að taka þar sem hnýtingarrekkarnir í versluninni eru hlaðnir skemmtilegum vörum.

Allir velkomnir og auðvitað er aðgangur ókeypis, bara svo það sé á hreinu.

Höfundur:

Kristján Friðriksson
Opinn og hæfilega uppsveigður

11. febrúar 2017

Hnýtingar

Upp

Forsíða

Í síðustu viku smellti ég hér inn greinarkorni um lokaðan, uppsveigðan væng votflugu. Það er ekkert leyndarmál að ég hef horft töluvert til flugna Don Bastian þegar kemur að votflugum. Hann hefur haldið því fram að mismunandi vængir votflugu væru mögulega meira fyrir veiðimanninn heldur en silunginn. Á sama tíma tekur hann fram að helst vilji hann veiða votflugu þar sem vængurinn sé hæfilega uppsveigður og vængirnir örlítið aðskildir.

Opinn vængur, uppsveigður endi

Don færir rök fyrir því að hæfilega opinn vængur færi flugunni meiri stöðugleika, en á sama tíma líf þegar hann leggst saman og opnast, allt eftir því hvort flugan sé dregin inn eða í pásu. Jú, ég held að ég kaupi þessi rök en síðan er það allt önnur saga hvort þetta skiptir fiskinn einhverju máli.

Þegar ég fór í gegnum votfluguboxið mitt, þá voru mína ýmist með vænginn lokaðan eða opinn og það sem meira var og það sem meira er; ýmist með uppsveigðan væng eða niðursveigðan.

Höfundur:

Kristján Friðriksson
Tilvitnun

10. febrúar 2017

Tilvitnanir

Upp

Forsíða

Höfundur:

Kristján Friðriksson
Fréttir af Febrúarflugum

9. febrúar 2017

Fréttir

Upp

Forsíða

Nú hafa ríflega 100 flugur komið fram í Febrúarflugum þetta árið og greinilega mikið líf með hnýturum landsins. Síðastliðið mánudagskvöld var fyrsta hnýtingar- og kynningarkvöldið á vegum Febrúarflugna og Ármanna haldið í Árósum og aðsókn var hreint út sagt frábær. Á fjórða tug hnýtara og áhugamanna um fluguveiði mættu og áttu góða stund saman.

Næsta mánudag, 13. febrúar, kemur svo Robert Nowak og sýnir okkur hvernig hann ber sig að við að hnýta sínar glæsilegu flugur og ef við þekkjum hann rétt, þá mun ekki standa á svörum eða ráðleggingum til þeirra sem vilja fræðast af honum. Við hvetjum alla sem vettlingi geta valdið að mæta í Árósa á mánudaginn. Ef að líkum lætur verður þétt setinn bekkurinn við hnýtingarborðið og því eins gott að taka með sér tól og tæki og mæta á slaginu kl. 20.

Að gefnu tilefni skal það tekið fram að hnýtingar- og kynningarkvöldin í Árósum eru öllum opin og allir áhugamenn um flugur og fluguveiði eru hvattir til að mæta, byrjendur jafnt sem lengra komnir.

Þetta kvöld verður Vesturröst líka á staðnum með sýnishorn af vöruúrvali sínu og aldrei að vita hvað þeir draga skemmtilegt fram og sýna okkur, af nógu er að taka í versluninni.

Sömuleiðis verða Ármenn á staðnum, reiðubúnir að uppfræða gesti um starfsemi félagsins, leiðbeina og svara spurningum ef eftir því verður leitað. Tilvalið að kíkja við og grípa með sér eintak af félagsriti Ármanna, Áróð eða kynningarbæklingi um félagið. Nánar má fræðast um starfsemi Ármanna á nýrri heimasíðu þeirra armenn.is

Höfundur:

Kristján Friðriksson
Þrjár tegundir eða fjórar?

8. febrúar 2017

Hnýtingar

Upp

Forsíða

Þurrflugur, púpur og straumflugur. Þarf þetta að vera eitthvað flóknara? Mér hefur verið tíðrætt um þá upplifun mína frá fyrstu dögum fluguveiðinnar þegar ég vafraði um netið og skoðaði allar straumflugurnar, t.d. frá Ray Bergman og stórbrotnar klassískar laxaflugur eins og þessar. Svo kíkti maður á allar flottu þurrflugurnar og púpurnar.

Þrjár tegundir flugna, ekki satt? Nei, ég vil gjarnan halda mig við fjórflokkunina. Eins og ég upplifði í Skotlandi s.l. haust þegar ég heimsótti Edinburgh Angling Center, þá er fjórði flokkurinn enn við góða heilsu þótt hann hafi farið hallloka fyrir púpuástríðu vestrænna veiðimanna hin síðari ár, votflugurnar lifa, meira að segja þokkalega góði lífi ennþá.

Hluti flugubarsins í Edinburgh Angling Centre

Ef eitthvað er að marka umfjöllun og úrval þurrflugna í þessari stærstu veiðiverslun Bretlandseyja, þá eru þær vinsælastar allra flugna sem eru á boðstólum. Næstar á eftir þeim koma klassískar votflugur og þeim er haldið vel aðskildum frá öllum púpunum sem eru þar á boðstólum. Held reyndar að ég hafi aldrei séð annað eins úrval og fjölda af púpum í einni verslun. Fæstar tegundir voru af straumflugum og hreint og beint engar gamlar klassískar laxaflugur eins og maður glápti úr sér glyrnurnar yfir hér um árið. Ég geri mér reyndar þokkalega grein fyrir að þær séu meira til hátíðarbrigða hjá hnýturum heldur en til daglegs brúks.

Eigum við síðan eitthvað að ræða úrval hnýtingarefnis í þessari stórverslun? Nei, það tekur því ekki. Íslenskar veiðiverslanir hafa hreint ekkert að skammast sín fyrir þegar kemur að úrvali hnýtingarefnis.

Höfundur:

Kristján Friðriksson
Vetrarverk

6. febrúar 2017

Hnýtingar

Upp

Forsíða

Um þessar mundir eru þeir forföllnu að hnýta eins og enginn sé morgundagurinn. En hvað verður svo um allar þessar flugur, það er að segja áður en þær fara í vatn? Fyrir einhverjum árum síðan var ég spurður, í fullri alvöru held ég, hvað ég gerði eiginlega við allar þessar flugur sem ég hnýtti, kannski 10 stk. af þeirri sömu. Ég þarf nú ekki að týna nema 5 og þá er ég lens, ég hnýti nefnilega fyrir tvo veiðimenn.

Eins þjál og meðfærileg og litlu fluguboxin geta verið, meira að segja suma þeirra á fleiri en tveimur hæðum, þá yrði fjöldi þeirra óviðráðanlegur ef ég ætlaði að koma öllum mínum flugum fyrir í þeim. Þess í stað flokka ég flugurnar gróflega niður í geymsluboxin mín og er með 2-3 minni box í vestinu sem ég fylli reglulega á eða skiptu um þemu í eftir því sem sumrinu vindur fram.

Fluguboxin

Hvaða reglu sem veiðimenn hafa á boxunum sínum ætti að vera undir hverjum og einum komið. Hver um sig verður að finna hentugustu aðferðina þannig að nokkuð víst sé að hann finni ákveðna flugu þegar eftir henni er sóst. Umfram allt mæli ég með því að flokka flugurnar, ekki hafa allt í belg og biðu. Mín flokkun er ekki flókin; púpur, votflugur, þurrflugur og straumflugur. Það segir væntanlega sína sögu að ég er með tvö púpubox sem er skipt eftir þemalitum púpa. Vestisboxin eru aftur á móti þrjú; púpur, vot- og straumflugur og þurrflugur. Hvað þarf maður meira?

Höfundur:

Kristján Friðriksson