Nú eru aðeins 10 dagar í að Febrúarflugur hefji göngu sína enn á ný. Að þessu sinni hverfa Febrúarflugur áratug aftur í tímann með þemanu Flugurnar í fyrsta sætið. Flugurnar verða í fyrsta sæti á Facebook og hér á FOS og það verður undir vildarvinum Febrúarflugna komið að gera vel við hnýtarana.
En hvað þýðir þetta? Jú, í stað þess að veita heppnum þátttakendum viðurkenningar í lok febrúar eins og gert hefur verið undanfarin ár, þá hef ég nú beint þeim tilmælum til þeirra sem vilja styðja Febrúarflugur að láta allt áhugafólk um fluguhnýtingar njóta stuðningsins í formi afsláttar eða sérkjara í febrúar, standa fyrir uppákomum hvers konar eða fræðslu og leggja þannig sitt að mörkum að gera febrúar að skemmtilegasta mánuði ársins fyrir hnýtara.
Ef þú ert einn af þeim sem vilt sýna Febrúarflugum og hnýturum velvild þína að þessu sinni eða veist um einhver áhugasaman, þá má nálgast allar upplýsingar um fyrirkomulag þess á heimasíðu Febrúarflugna á FOS, með því að smella á hnappinn Stuðningur.
Nú þegar hafa nokkrir vildarvinir boðað aðkomu sína og sumir eru alveg vissir hvað þeir ætla að gera fyrir hnýtara og áhugafólk um flugur. Aðrir eru enn að hugsa málið, en ég veit fyrir víst að þeir eru að hugsa stórt og það verður spennandi að sjá hverju þeir bridda uppá.
Fram að 1. febrúar mun FOS væntanlega setja inn nokkrar viðeigandi færslur á síðuna, kannski einhverjar spennandi flugur sem hnýta mætti í febrúar eða fróðleik um flugur og fluguhnýtingar.
Þá er Febrúarflugum 2024 lokið og búið að hnýta endahnútinn á það sem hvíldi á FOS og öllu starfsliði vefsins. Ekkert gott tekst með engu var sagt í einhverri sveit hérna um árið og það sama á við um Febrúarflugur, þær væru ekki neitt ef ekki væri áhuginn og atorkan í þeim sem hnýta til staðar. Það voru 178 hnýtarar, allt frá 6 ára og upp í fullþroskaða heldriborgara sem lögðu til 1.194 flugur að þessu sinni og þar með viðhélst aukning miðað við eðlilegt árferði.
1.194 flugur á einu bretti
Svo má ekki gleyma klappliðinu á hliðarlínunni. Yfir 1.700 meðlimir og fylgjendur Febrúarflugna héldu uppteknum hætti síðustu ára; hrósuðu í hástert, spáðu í leikskipulag og uppstillingu á vellinum. Til allrar lukku þurfti ekki að handtelja upp úr kössunum þegar kom að öllum þumlunum og hrósinu sem viðhöfð voru frá 1. til 29. febrúar: 1.155 ummæli og 35.427 viðbrögð náðu til yfir 40.000 einstaklinga í mánuðinum. Það er einfaldlega með því mesta sem sést hér á landi og ekki ein króna í auglýsingar. Það sannast á Febrúarflugum að það þarf ekki að auglýsa gæði og glæsileika, gott efni selur sig sjálft.
Að þessu sinni var 24 heppnum hnýturum færðir glaðningar frá 12 styrktaraðilum Febrúarflugna.
Til ykkar allra, þátttakenda, meðlima hópsins og styrktaraðila; kærar þakkir fyrir ykkar frábæra framlag. Nú eru aðeins 11 mánuðir í næstu Febrúarflugur og allt FOS gengið mun nú leggjast undir feld og hugsa með hvaða hætti megi laða fram og efla fluguhnýtingar enn frekar hér á Íslandi.
Það er helst að frétta af Febrúarflugum að framkomnar flugur eru nú orðnar 500 og meðlimum hópsins á Facebook hefur fjölgar hratt síðustu daga. Í hópinum eru nú 1.600 meðlimir, auk um 200 sem hafa kommentað á stakar færslur en ekki óskað eftir aðild að hópinum. Í því sambandi er rétt að geta þess að allar aðildarbeiðnir og komment, annarra en meðlima, eru handvirkt samþykkt til að koma í veg fyrir spam og óæskilegan áróður af ýmsu tagi sem berast nær daglega.
Vegna mikillar og ánægjulegrar fjölgunar hnýtara sem eru að birta sínar fyrstu flugur í Febrúarflugum hefur verið ákveðið að veita nokkrum þeirra sérstaka viðurkenningu. Þrír styrktaraðilar brugðust hratt og vel við og munu útvega glaðninga til þeirra heppnu í lok mánaðar og kunnum við þeim bestu þakkir fyrir stuðninginn. Þessi aðilar eru:
Þær eru nokkrar flugurnar sem hafa verið fastir gestir í Febrúarflugum í gegnum árin og meðal þeirra er Zulu, bæði Black og Blue. Þetta er fluga sem flestir þekkja enda er flugan sögð gömul, jafnvel há öldruð. Saga þessarar flugu er sveipuð ákveðinni dulúð því ekki hefur tekist að eigna hana einhverjum ákveðnum aðila, ekki vitað með vissu hvar hún kom fram eða þá hvenær.
Flugan er til í nokkrum útfærslum eins og sjá má af þessum myndum sem fengnar eru úr safni Febrúarflugna síðustu árin, en í megin atriðum hafa hnýtarar haldið fast í hefðbundið útlit flugunnar, með örfáum undantekningum.
En hvað ætli þessi fluga sé gömul? Ég sá nýlega grein á vefnum þar sem því var haldið fram að hún væri 300 ára gömul, aðra grein fann ég sem sagði að hún hefði komið fram á miðri 20. öldinni (1900-1999). Hvort tveggja stenst ekki við nánari skoðun. En hvernig ætli flugan hafi þróast í gegnum árin og hvað vitum við elst um hana? Til að leita svara fór FOS í gegnum nokkrar bækur úr safninu og skannaði inn uppskriftir og myndir af Zulu þar sem þær var að finna.
Bob Church’s Guide to Trout Flies útgefin 1987, höfundur: Bob ChurchFly-Dressing útgefin 1975, höfundur: David J. CollyerReservoir and lake flies útgefin 1970, höfundur John VeniardFavorite Flies and Their History útgefin 1892, höfundur: Mary Orvis Marbury
Favorite Flies and Their History er elst þeirra heimilda sem ég fann eitthvað um Zulu. Hvergi var minnst á fluguna í eldri bókum sem FOS hefur aðgang að sem ná þó allt aftur til 1486. Við getum þá sagt með vissu að flugan varð örugglega til fyrir 1892. Ef við gefum okkur að Zulu hafi ekki legið ónefnd í boxum veiðimanna í einhver ár eða áratugi, sem gæti þó raunar verið, þá gæti ákveðin vísbending um aldur hennar legið í nafni hennar.
Það eru í það minnsta tvær sögur sem tengjast nafni flugunnar og þær eiga það sameiginlegt að vísa til Zulu ættbálksins í Zululandi, nú héraðs í Suður Afríku. Önnur sagan segir að flugan hafi verið hnýtt eftir höfuðskrauti leiðtoga (konungi) Zulu ættbálksins, Cetshwayo kaMpande sem ríkti frá 1873 til 1884. Sé þessi saga rétt þá getum við leitt líkum að því að flugan hafi orðið til á árunum á milli 1873 – 1892. Hin sagan sem sögð er tengist einnig Cetshwayo, en þó með öðrum hætti.
Upp úr 1874 tók Breska heimsveldið að ásælast mannauð Zululands sem ódýrt vinnuafl fyrir breska plantekrubændur, m.ö.o. þræla. Cetshwayo konungur stóð upp í hárinu á heimsveldinu og vildi semja um aðild að Breska heimsveldinu með fullu sjálfstæði, ekki innlimun. Bretar höfnuðu öllum samningum og réðust inn í Zululand árið 1879 og upphófst þá blóðugt stríð með gríðarlegu mannfalli beggja herja. Sagan segir að svartar fjaðrir Zulu tákni ættbálkinn sem nánast var útrýmt í þessu stríði og rauði liturinn tákni blóð þeirra sem dóu í átökunum. Eigi þessi saga við rök að styðjast, þá getum við sagt með nokkurri vissu að Zulu hafi orðið til á árinum á milli 1879 og 1892, nær held ég ekki að unnt sé að komast í sögunni.
Eftir situr að hvergi í því sem skráð hefur verið um Zulu, er að finna eitt einasta orð um það hver hafi fyrstur hnýtt fluguna eða hvar nákvæmlega í Englandi hún hafi orðið til. Svo verður að taka með í reikninginn að það er ekkert víst að Claude De Black frá Nova Scotia (heimildarmaður Mary Orvis) hafi gert greinarmun á Englandi og öðrum löndum Bretlandseyja. Þannig er nefnilega að veiðimenn í norðurhéruðum Bretlands hafa áratugum saman talið Zulu vera ættaða úr sínum héruðum. Kannski sannast hér bara hið fornkveðna; Allir vildu Lilju kveðið hafa. Það sem eftir situr er að litasamsetning Zulu hefur gengur svo sannanlega í augu silungsins.
One starts by observing that in weedy rivers trout live in an environment of green; in gravelly or rocky rivers they live in an environment of brown. One knows from the attractiveness of the Red Tag and the Zulu that they are peculiarly sensitive to red.
The Way of a Trout with a Fly, útgefin 1921, höfundur G. E. M. Skues, bls. 29
Líkt og undanfarin ár njóta Febrúarflugur stuðnings öflugra styrktaraðila og kunnum við þeim öllum miklar þakkir fyrir. Sami háttur verður hafður á veitingu viðurkenninga fyrir þátttöku í Febrúarflugum eins og verið hefur, dregin verða út nöfn heppinna einstaklinga sem hljóta einhverja þeirra fjölmörgu viðurkenninga sem styrktaraðilarnir hafa látið í té.
Af Febrúarflugum er það annars helst að frétta að nú þegar hafa borist á fjórða hundrað flugur í mánuðinum og á bak við þær standa 90 hnýtarar og margir þeirra að sýna frumraunir sínar í Febrúarflugum. Velkomin öll og takk fyrir að vera með.
Á innan við viku hefur meðlimum hópsins fjölgað um tæplega 70 aðila, bæði innlendum og erlendum sem áhuga hafa á flugum og fluguhnýtingum. Á sama tíma hefur áskrifendum* og gestum FOS sömuleiðis fjölgað ört síðustu daga og flestir skoða heimasíðu Febrúarflugna þar sem m.a. má finna myndasafn þeirra flugna sem komið hafa fram árið 2024 auk flugna hvers árs allt frá 2015.
* áskrift að FOS er gjaldfrjáls og án allra skuldbindina, áskrifendur fá tilkynningar um nýtt efni í tölvupósti um leið og það birtist.
Febrúarflugur fara heldur betur laglega af stað þetta árið, langt yfir 100 flugur litu dagsins ljós fyrstu þrjá dagana og meðlimum hópsins á Facebook fjölgar á degi hverjum.
Eins og nærri má geta er FOS.IS í skýjunum með þessar undirtektir hnýtara. Styrktaraðilar hafa heldur ekki látið sitt eftir liggja, nú sem endranær, og stöndum við í mikilli þakkarskuld við þá. Það er ljóst að FOS.IS getur veitt nokkrum heppnum hnýturum afar veglegar viðurkenningar fyrir þátttökuna í lok mánaðar og það fer ekki framhjá neinum að veglegir afslættir bjóðast hnýturum víða þennan mánuðinn og því um að gera að fylla á hnýtingarefnið eða tryggja sér nýtt og spennandi efni til að prófa í febrúar.
Styrktaraðilar okkar þetta árið eru
Smelltu til heimsækja Fish PartnerSmelltu til að heimsækja FlugubúllunaSmelltu til að heimsækja FlugusmiðjunaSmelltu til að heimsækja JOAKIM’SSmelltu til að heimsækja KolskeggSmelltu til að heimsækja ValdemarssonSmelltu til að heimsækja Veiða.isSmelltu til að heimsækja VeiðiflugurSmelltu til að heimsækja VeiðikortiðSmelltu til að heimsækja Vesturröst
FOS.IS ítrekar boð sig til hnýtingarklúbba og veiðifélaga að skjóta á okkur upplýsingum um samkomur og hnýtingarkvöld sem FOS.IS getur komið á framfæri við meðlimi Febrúarflugna sem nú telja tæplega 1.300 einstaklinga.
FOS 