Það er greinilega ekki mikið samráð á milli þeirra bræðra Rugludalls og Hnútaskrækis því taumaklippur #2 komu úr pakka dagsins, rétt eins og fyrsta pakkanum. Maður getur reyndar alltaf á sig blómum bætt, taumaklippum líka.

Jólasveinn dagsins, Flotgleypir er væntanlega sá sem er ábyrgur fyrir því að nappa tökuvörum af veiðimönnum. Enn önnur sterk vísbending að koma sér að hnýtingum og ekki spara lakkið.

Nú var Bleik mínum brugðið, Bleikjubregðir hafði greinilega fundið aldraða keflishöldu og laumað í dagatalspokann. Vísbending? Já, ég er alveg að hafa mig í að hnýta nokkrar flugur.

Það er ekki oft sem maður rekst á Urriðabing en honum er greinilega umhugað um að ég eigi nóg af taumaefni.

Lækjarræsir færði mér þessar línulykkjur. Datt helst í hug að þessi sveinn hefði eitthvað haft með það að gera að taka tappann úr Árbæjarstíflunni, kann strax vel við hann.

Jólasveinn dagsins er Flugnafeikir og hann veit greinilega að það er aldrei til of mikið af Peacock, best að taka til á borðinu og hnýta smá.