Já, þetta er ljómandi gott rauðvín og hæfir öllum aldurshópum silungsveiðimanna. Þó silungsveiðin sé komin vel af stað í þessu ljómandi góða árferði sem verið hefur síðustu vikur og vel flestir silungsveiðimenn búnir að fylla í boxin sín, þá má alltaf bæta í þau. Hér er á ferðinni fluga sem vakti töluverða athygli í Febrúarflugum 2025 og hefur reynst vel í urriða og bleikju, bæði staðbundnum og göngufiski.
Sökum mikillar eftirspurnar hefur flugunni Rauð-Vín verið bætt inn á FOS og það þótti tilvalið að fá nokkur eintök frá höfundi flugunnar, Jóhanni Ólafi Björnssyni til að sitja fyrir á mynd fyrir FOS. Þú getur smellt hér eða á myndina að neðan til að skoða uppskriftina að þessari flugu.
Ég sá einhverja frétt um daginn að matseðlar á einhverjum hluta veitingahúsa hér á landi væru aðeins á ensku og fengu veitingahúsin bágt fyrir. Matseðlar eru mikilvægir, þeir segja manni hvað er á boðstólum og (oftast) hvað máltíðin heggur stórt skarð í heimilisbókhaldið. Í lauslegri könnun sem ég gerði, þá kom í ljós að matseðlar eru misvel úr garði gerðir, óháð tungumáli:
Steiktur fiskur í raspi með lauk, smjöri og remúlaði
Ég veit alveg hvað laukur er, smjör og remúlaði, en fiskur segir mér lítið sem ekkert hvers er að vænta. Ef ég væri togaraskipstjóri, þá væri ég að renna blint í sjóinn að henda út trollinu, ég gæti allt eins veitt fisk sem ég ætti engan kvóta fyrir og fengi þar af leiðandi á mig sekt.
Fiorentina steak, kemur með með steiktum kartöflum, bernaise eða piparsósu
Óveraldarvanur einstaklingurinn sem ég er, veit ekkert hvað Firorentina steak er og það þýðir ekkert fyrir mig að nota Google translate því þýðingin er Firorentina steik. Google sýndi mér myndir af einhverju kjöti á beini og sagði réttin ættaðan frá Toscana á Ítalíu, oftast úr steer eða heifer. Google translate vildi meina að þetta væri stýri eða kvíga. Ég hefði pantað kvígu, stýri er allt of hart undir tönn.
Ef þú hefur nennt að lesa þetta, þá er alveg eins líklegt að orð myndi setningar í hausnum á þér; Þetta er búið – Nú er hann búinn að tapa sér endanlega.
Það er eldgömul saga, en virðist alltaf vera ný af nálinni þegar maður vekur máls á henni við bakkann, að veiðimenn ættu að gefa sér smá tíma til að lesa matseðil fiskanna. Sem betur fer er sá matseðill settur fram í myndum og því þarf engar áhyggjur að hafa þó veiðimaðurinn þekki ekki latnesk tegundarheiti vorflugu, mýflugu eða toppflugu. Það nægir alveg að opna augun, skima umhverfið og velja agn í samræmi við það sem fyrir augu ber. Auðvitað er alltaf eitthvað sem ekki sést, eins og t.d. vatnabobbar og hornsíli, en með því að skima vatnsbakkana má alltaf sjá einhverjar vísbendingar um það sem vatnið geymir. Lestu matseðilinn með augunum, það gerir fiskurinn áður en hann fær sér bita.
Nú, þegar Febrúarflugum 2025 er lokið, er mér efst í huga þakklæti til allra þeirra 148 hnýtara sem lögðu sitt að mörkum með því að setja inn 1.316 flugur í mánuðinum og gera hann enn einu sinni að topp mánuði Febrúarflugna*) Og ekki má heldur gleyma öllum þeim sem svöruðu kalli FOS að standa fyrir viðburðum og/eða gera vel við hnýtara með einum eða öðrum hætti og gera þannig febrúar að einhverjum skemmtilegasta mánuði ársins. Takk, þetta tókst frábærlega og þið eigið öll miklar þakkir og hrós skilið fyrir ykkar framlag.
*) Ég leyfi mér að undanskilja árin 2021 og 2022 þegar hnýtarar höfðu litlu öðru að sinna í einverunni heldur en fluguhnýtingum.
Vöxtur Febrúarflugna í gegnum árin hefur verið langt, langt framar vonum og ég hef sannast sagna alveg eins átt von á að fjöldi flugna hafi náð hámarki sínu á hverju ári frá 2018 þegar þær náðu því að verða 523, en áfram hafa þær vaxið og dafnað. Talnaglöggir sjá að í heildina hafa 9.922 flugur komið fram í Febrúarflugum frá upphafi, það er slatti.
Hópurinn á Facebook hefur dafnað og styrkst á liðnum árum og telur nú rúmlega 1.800 meðlimi og í febrúar var hann heimsóttur 27.031 sinni, 643 komment voru sett við myndir og viðbrögð voru 27.714
Mér telst til að áhugafólk um fluguhnýtingar hafi geta brugðið sér 12 sinnum af bæ í febrúar og heimsótt þá sem stóðu fyrir viðburðum í mánuðinum og það hefur aldrei verið annað eins framboð af skemmtun og fróðleik eins og í ár.
Svo góðar undirtektir voru við þessum viðburðum að Stangaveiðifélag Borgarness og Fluguhnýtingar á Vesturlandi ætla að nýta sér meðbyrinn og standa fyrir hnýtingakvöldum í mars sem hér segir; Borgarnesi 10. mars kl.19:00 í Grillhúsinu og Akranesi 14. mars kl.18 í Stúkuhúsinu. FOS mælir eindregið með því að kíkja á þessi hnýtingakvöld.
Að þessu sögðu, þakkar FOS kærlega fyrir undirtektirnar, stuðninginn og góðar kveður, sjáumst eigi síðar en 1. febrúar 2026.
Lokasprettur Febrúarflugna er hafinn og eftir því sem næst verður komist, þá verða það 138 hnýtarar sem koma hnífjafnir í mark þetta árið með um 1.200 flugur (þegar tveir dagar eru raunar eftir) og yfir 1.800 fylgjendur Febrúarflugna tryllast af fögnuði á bekknum.
Í kvöld, 27. febrúar verða tveir mjög áhugaverðir viðburðir í boði fyrir hnýtara og áhugafólk um flugur. Á Microbar í Kópavogi verður hnýtingakvöld á vegum 3 á stöng kl.18:00 þar sem nokkrir landsþekktir hnýtarar ætla að smella í flugur með gestum og hjá Stangaveiðifélagi Hafnarfjarðar verður Bjartur Ari Hansson á fyrsta hnýtingakvöldi vetrarins ásamt góðum gestum. Ef einhver á ekki heimangengt í kvöld, þá er óþarfi að örvænta því SVH mun vera með hnýtingakvöld annað hvert fimmtudagskvöld til vors og þangað eru alltaf allir velkomnir.
Undirtektir viðburða í febrúar hafa verið með eindæmum góðar, svo mjög að Stangaveiðifélag Borgarness ætlar að fylgja mánuðinum eftir og bjóða til hnýtingarkvölds þann 10. mars kl. 19:00 í Grillhúsinu í Borgarnesi og þann 14. mars ætla grasrótarsamtökin Fluguhnýtingar á Vesturlandi að standa fyrir hnýtingarkvöldi á Akranesi. Það er því um að gera að fylgjast vel með þó Febrúarflugum fari brátt að ljúka, það er nefnilega mikið líf með hnýturum eftir Febrúarflugur.
Þau eru fá morgunverkin sem gleðja undirritaðan jafn mikið þessa dagana eins og skyggnast yfir Febrúarflugur, smella á þær myndir sem komið hafa fram síðasta sólarhringinn og afrita þær yfir í myndasafn Febrúarflugna á FOS.
Annað sem gleður mig ósegjanlega er hve frábærlega ýmsir einstaklingar, fyrirtæki og stangaveiðifélög hafa tekið við sér og bryddað upp á skemmtilegum viðburðum fyrir hnýtara og áhugafólk um fluguhnýtingar og hjálpast þannig að við að gera febrúar að þeim viðburðaríka og skemmtilega mánuði eins og hann hefur verið núna. Svo má ekki gleyma þeim 128 hnýturum sem hafa lagt ómælda vinnu í að raða inn þeim rétt tæplega 900 flugum sem komnar eru fram þetta árið. Þið eigið öll hrós skilið fyrir ykkar framlag og ég hlakka til að fylgjast með ykkur það sem eftir lifir febrúar.
Nú er síðasta vika Febrúarflugna gengin í garð og af því sem FOS hefur fengið vitneskju um að sé á döfinni, þá er Ólafur Hilmar Foss í Flugubúllunni í dag (laugardag) á milli 12:00 og 15:00 og þeir félagar Sigþór Steinn og Valgarður verða að venju í Veiðiflugum á mánudagskvöldinu kl. 19:30 þar sem þeir ætla að beina sjónum að sjóbirtingsflugum. Ég hvet alla sem vettlingi geta valdið að rífa þá nú af sér og taka fram græjurnar og slást í hópinn á Facebook og/eða heimsækja þessa meistara sem leggja sitt að mörkum hjá Flugubúllunni og Veiðiflugum.
Þá er önnur vika Febrúarflugna að baki og enn bætist í hópinn á Facebook, bæði af flugum og hnýturum. Skemmtilegt að sjá frumraunir og fjölda flugna sem hnýtarar koma á framfæri þetta árið. Flugurnar eru rétt tæplega 650 og af öllum stærðum og gerðum, eins og búast mátti við og hægt er að skoða þær allar á einum stað hérna.
Þriðja vikan að hefjast og nú hafa velunnarar Febrúarflugna heldur betur tekið við sér og frá og með deginum í dag og út næstu viku býðst hnýturum að heimsækja og taka þátt í fimm viðburðum sem geta glatt og frætt viðstadda um flugur og fluguhnýtingar:
Laugardaginn 15. febrúar verður Eiður Kristjánsson í Flugubúllunni frá kl. 12 – 15, hnýtir og spjallar við gesti og gangandi.
Sunnudaginn 16. febrúar hefur Flugurveiðifélag Árborgar og nágrennis vetrarstarf sitt með hnýtingakvöldi og kaffispjalli í Víkinni á Selfossi kl. 19:00 Að vanda eru allir velkomnir og minnt á að það er jafn stutt á Selfoss frá höfuðb.svæðinu eins og það er frá Selfossi til höfuðb.svæðisins.
Mánudaginn 17. febrúar bíður Stangaveiðifélag Borgarness til hnýtingakvölds á Grillhúsinu í Borgarnesi kl. 19:30 þar sem gestir og gangandi geta kynnt sér fluguhnýtingar, mætt með eigin græjur eða fengið lánaðar græjur. Minnt er á dreifbýlisregluna, jafnt langt á Borgarnes eins og þaðan til Reykjavíkur.
Mánudaginn 17. febrúar verða þeir félagar Sigþór Steinn Ólafsson og Valgarður Ragnarsson hnýturum innan handar í Veiðiflugum frá kl. 19:30 þar sem áherslan verður á þurrflugur, púpur og straumflugur sem hafa reynst vel m.a. í Mývatnssveit og Laxárdal.
Þriðjudaginn 18. febrúar verður síðan blásið til Barflugna á Ölver í Glæsibæ. Að samkomunni standa SVFR, Ertu að fá’ann?, Patagonia og Fasteignasalan Miklaborg. Á staðnum verða landsfrægir hnýtarar, allir hvattir til að mæta með eigin græjur og eiga sér skemmtilega kvöldstund. Húsið opnar kl. 19:00 og dagskrá kl. 20:00, tilboð á hamborgurum og kaldur á krana meðan birgðir endast.
Undirritaður verður á ferð og flugi á milli viðburða eins og við verður komið og ekki laust við að tilhlökkunin fyrir vikunni sé að verða óbærileg. Kærar þakkir, öll þið sem sýnið Febrúarflugum og hnýturum velvild í febrúar og ekki síst öll sem leggið til flugurnar sem hafa laðað þær 14.000 heimsóknir að Febrúarflugum sem komnar eru þetta árið.
FOS 