Það fer færri sögum af fiskum heldur en vatni og vindum í þessari frásögn. Frá því í febrúar hefur það staðið til að heimsækja Bjarnarfjörð á Ströndum og renna fyrir sjóbleikju. Þegar ég keypti veiðileyfið hafið ég vitaskuld ekki hugmynd um það hvernig veður og vindar yrðu þann 15. ágúst þannig að það var ekki um neitt annað að ræða fyrir okkur veiðifélagana heldur en láta okkur hafa þessa kuldalegu vindaspá og halda norður á Strandir á miðvikudag.

Neðan ármóta Goðdalsár

Veðrið lék ekki alveg við okkur þegar við mættum á staðinn, töluverður strekkingur og hitastigið hefði mátt vera örlítið hærra. Auk þessa hafði rignt töluvert norður á Ströndum síðustu daga og vatnsstaða ókunn. Hvað um það, við hreiðruðum um okkur í grennd við Kotbýli kuklarans við Klúku, betur þekkt sem tjaldstæðið við Hótel Laugarhól og renndum síðan meðfram Bjarnarfjarðará frá ósi og upp að ármótum við Goðdalsár. Við skönnuðum sem sagt allt svæðið og komum til baka alveg jafn blönk á bestu staðina eins og fyrir, vissum hreint og beint ekkert hvað við ættum að byrja næsta morgun.

Bjarnarfjarðará

Í því sem ég hafði lesið mér til um Bjarnarfjarðará komu orð eins og snotur á, lítil og nett, fjöldi veiðistaða og góð byrjendaá fyrir í nokkur skipti. Tja, áin var nú ekki beint lítil og nett, vatn var töluvert í henni og þegar ég gluggaði í nokkrar ljósmyndir þegar heim var komið, þá var ljóst að hún var eitthvað í áttina að því að vera á sterum eftir rigningar síðustu daga. Goðdalsá byrjaði á því að þrefalda vatnsmagnið, Þverá var nokkuð hress líka og fyrir neðan brú létu Hallardalsá og Geitará ekki sitt eftir liggja.

Ofan Eggertsholu

Jæja, þetta yrði bara að ráðast, hingað vorum við komin og vissum hvorki í þennan heim né annan hvar við ættum að bera niður.

Er bleikja við enda regnbogans?

Fimmtudagurinn heilsaði okkur með því veðri sem spáð var, vindur af óræðum metrum af norðri og hitastig sem gældi vð tveggja stafa tölu, en náði því ekki. Í morgunsárið vöknuðu óhjákvæmilega einhverjar vonir um að bleikjan væri við enda regnbogans, þ.e. í Gildruhyl við gömlu brúnna. Það reyndist nú ekki vera og sama má segja um Hallardalsfljót, Framnes, Berg og alla hina staðina sem við þræddum frá morgni til kvölds. Við urðu hreint og beint ekki vör við einn einasta fisk í ánni, en nutum þess í stað fegurðarinnar við ána, sérstaklega við efstu staðina, Ármótahyl og þar fyrir neðan. Það verður ekki af þessu svæði tekið að þarna er einstaklega fallegt.

Hallardalsfljót

Daginn enduðum við niðri undir Bergi þar sem ég þræddi Skolakelduna eins og mér var unnt, þjakaður af víðtækri vanþekkingu á staðháttum og almennu kunnáttuleysi í rennandi vatni. Heilt yfir var ég samt mjög sáttur við þetta langa ferðalag og engan afla. Það hefur lengi verið á listanum mínum að leita að sjóbleikju norður á Ströndum, nú er ég búinn að fara einu sinni og fann enga. Það er því næsta víst að ég þurfi að fara aftur norður á Strandir, þótt síðar verði.

Bleikjur í ferð Bleikjur alls Urriðar í ferð Urriðar alls Fj.ferða
0 / 0 55 / 71 0 / 0 15 / 36 19 / 20

2 Athugasemdir

  1. En uppúr þessari ferð hjá mér stendur þó það skemmtilega og næstum óvenjulega dýralíf sem sýndi sig þarna á svæðinu. Hvalurinn (hrefnan, hnýsan, steypireyðurinn eða langreyðurinn…hvað sem þetta nú var) sem ég sá fyrir utan Selá, allar humlurnar á tjaldstæðinu og síðast en ekki síst minnkarnir fjórir sem gáfust líka upp á ánni og lölluðu sér í rólegheitunum eftir götunni yfir í næsta fjörð væntanlega í leit að fisk. Við hefðum kannski betur gert það líka. Jú og svo allur þessi urmull af regnbogum…held ég hafi aldrei séð jafnmarga á einum degi.

Senda ábendingu

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google photo

You are commenting using your Google account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s

This site uses Akismet to reduce spam. Learn how your comment data is processed.