Það þarf svo sem ekkert að koma á óvart að FOS birti flugu sem fáir, ef þá nokkrir nota. Undirrituðum finnst einfaldlega gaman að grufla í sögu flugna og eltast við upplýsingar sem finna má í gömlum bókum sem hann safnar. Að þessu sinni er farið allt aftur til 1857 í bókina með stutta nafninu; The Practical Angler or the art of trout-fishing more particularly applied to clear water. Já, þeir voru ekkert að spara nöfnin á veiðibækurnar á tímum Viktoríu drottningar. Ef þú vilt vita eitthvað meira og jafnvel kafa enn dýpra, þá getur þú smellt á myndina hér að neðan og kíkt á það sem ég hef dregið saman um þessa klassísku silunga- og laxaflugu sem ættuð er frá Skotlandi.

Ef það hefur farið framhjá einhverjum, þá eru Febrúarflugur í gangi einmitt núna. Ein þeirra flugna sem brá fyrir í Febrúarflugum fyrir nokkrum árum var Þessi rauða frá Helgu Gísladóttur. Það var kannski eins gott að undirritaður var ekkert að æsa sig að krefja Helgu um uppskrift að flugunni, því sú sem birtist hér fyrst var hálfgerður unglingur, ekki búin að taka út fullan þroska eins og hún virðist hafa gert núna. Feikilega vinsæl fluga í Veiðivötnum og víðar, hef meira að segja heyrt af henni lítið dressaða á votflugukrók #12 fyrir lækjarsprænur þar sem hún gerði góða hluti. Þessi Rauða er fluga nr. 147 sem birtist hér á FOS. Þú getur skoðað uppskriftina að flugunni með því að smella á myndina hér að neðan.

FOS fær oft orðsendingar frá lesendum; ábendingar um efni, veiðisögur eða eitthvað annað skemmtilegt sem vert er að skoða. Í sumar sem leið fékk FOS orðsendingu sem fól þetta allt í sér og tengdist flugu sem sendandinn, Tómas Auðunn Þórðarson, hafði sett saman og prófað í Hraunsfirðinum. Einföld og skemmtileg fluga sem gaf honum og konu hans 16 bleikjur á einum þessara dauðu daga sem stundum gera vart við sig í Hraunsfirðinum. Daganna þegar ekkert gengur og bleikjan fúlsar við öllu sem henni er boðið. Tvær þær stærstu sem féllu fyrir flugunni voru 50 og 54 cm að lengd. Síðar um sumarið gerði þessi fluga einnig gott mót í Hlíðarvatni í Selvogi og undirritaður getur vottað að bleikjurnar í Hlíðarvatni vestra (í Hnappadal) eru alveg jafn hrifnar af þessi flugu. Þar að auki voru urriðar Hnappadalsins álíka spenntir fyrir henni.

FOS lagðist vitaskuld í grúsk og leitaði og leitaði á netinu, fletti og fletti í bókum, en það virðist enginn hafa haft fyrir því að birta uppskrift eða gefa þessari flugu heiti, annar en faðir hönnuðarins sem þótti tilvalið að skíra hana Grábrók. Grábrók er fluga nr. 144 sem birtist hér á síðunni með uppskrift og smá lýsingu.