Flottur dagur í nágrenninu í dag. Svo skemmtilega vildi til að þegar við hjónin mættum þar nokkru eftir hádegið, var þar mættur vinnufélagi minn ásamt afsprengi. Þeir feðgar reyndu mest fyrir sér með maðk og uppskáru einn urriða í soðið. Við hjónin vorum aftur á móti eins og endranær á flugunni og reyndum ýmsar tegundir áður en tæpur tveggja pundari lét glepjast af stuttum rauðum Nobbler. Þar sem frúin var ekki með neinn slíkan haldbæran skipti hún yfir í Orange Nobbler, sem ekki virtist koma að sök þar sem hún setti stuttu síðar í einn sem slagaði í pundið.

Rétt áður en við tókum okkur kaffipásu setti frúin síðan í annan sem náði tveimur pundum. Eftir pásu setti ég síðan í einn sem náði hálfu öðru pundi, frúin missti einn og ég þrjá. Þegar kvöldkulið setti að okkur, tókum við okkur upp og héldum heim á leið, sæl og ánægð með prýðilegan dag. Takk fyrir okkur, Halla.

Veiðitölur ársins