Fly Tying 101 – Fjórði þáttur

Þá er fjórði og síðasti þáttur hnýtingarkennslu Loon outdoors er kominn á Livestream. Þáttinn má skoða með því að smella hérna. Þetta hafa verið áhugaverðir þættir að fylgjast með og þeir verða væntanlega aðgengilegir í náinni framtíð á heimasvæði Loon á Livestream, rétt eins og aðrar leiðbeiningar þeirra eru í dag. Þess má svo geta að á YouTube er að finna fjölda annarra leiðbeininga og kynningar frá Loon.

fos_loon_flytying101

Fly Tying 101 – Þriðji þáttur

Þriðji þáttur af fjórum í hnýtingarkennslu Loon outdoors er kominn á Livestream. Næsti þáttur kemur svo auðvitað eftir viku. Smelltu hérna til að horfa á upptökuna. Eins og gefur að skilja eru vörur Loon outdoors áberandi í þessum myndböndum. Þeir sem vilja kynnast Loon betur, ættu endilega að skoða úrvalið hjá Árvík eða endurseljendum.

fos_loon_flytying101

Fly Tying 101 – Fyrsti þáttur

Þessar vikurnar stendur Loon outdoors fyrir hnýtingarkennslu á netinu. Um er að ræða fjórar kennslustundir í beinni útsendingu, ein í hverri viku janúar. Einhverjir nátthrafnar hafa eflaust vakað yfir fyrsta tímanum sem var 6.janúar, en fyrir þá sem sváfu á sínu græna þá er hægt að horfa á upptöku af honum með því að smella hérna.

fos_loon_flytying101

Næsti þáttur er á dagskrá aðfaranótt föstudagsins 14.janúar klukkan 2 eftir miðnættið og hægt verður að horfa á hann á Livestream. Upptaka af þættinum verður gerð aðgengileg hér á FOS.IS eins fljótt og auðið verður.

Myndir á samfélagsmiðlum

Það hefur aldrei verið eins einfalt að taka myndir og í dag. Viðráðanlegar stafrænar myndavélar er að finna af ýmsum gerðum og þær eru orðnar eins sjálfsagðar og blýantur með strokuleðri var fyrir 20 árum. Eftir á að hyggja, þá ganga trúlega fleiri með myndavél á sér í dag heldur en blýant.

Þegar ég eignaðist mína fyrstu stafrænu myndavél féll ég algerlega fyrir þessari tækni. Að geta tekið næstum eins margar myndir og mér datt í hug, farið með þær heim í tölvuna og fært þær inn í skoðara, skorið og klippt þær góðu til og hent þeim lélegu strax, þetta þótti mér bylting. Eina vandamálið var að ég hafði kannski ekkert úr mjög mörgum stöðum að velja til að setja myndirnar mínar á. Jú, ég átti vísi að heimasíðu hjá Yahoo, en þar með var sagan eiginlega sögð.

Í dag eru miðlar fyrir ljósmyndir nánast óendanlega margir. Facebook, Instagram, Twitter og alls konar heimasíður einstaklinga og félaga. Framboð mynda á þessum síðum er ógnvænlegt og maður eyðir sífellt meiri tíma í að vafra um vinaslóðir á netinu og skoða myndir. Þær myndir sem maður tekur helst eftir, setur like á, þurfa fyrst og fremst að falla að smekk og áhugamálum. Svo þurfa þær að vera þokkalega vel teknar; skýrar, í fókus og ekki of brenglaðar hvað liti varðar. Persónulega leiðast mér myndir sem hafa verið smitaðar svo óskaplega af ýmsum síum að náttúrulegir litir og áferð er nánast horfinn. Svo leiðast mér líka myndir og myndbrot sem tekin eru upp á hákant því flestir samfélagsmiðlar stíla inn á það að myndflöturinn sé lægri heldur en hærri og helst í mjög ákveðnum hlutföllum.

Til að ná fram bestu nýtingu myndefnis með færslu á Facebook er t.d. gott að hafa myndina sem næst í stærð 1200×630. Þegar myndinni er hlaðið upp, þá skalar Facebook hana að vísu niður um rúmlega helming, en upplausn hennar verður betri með þessu móti og myndin öll skarpari þegar hún kemur lesendum fyrir sjónir. Það er því um að gera að nýta allan myndflötinn og skera jafnvel myndina örlítið til áður en henni er hlaðið upp.

Instagram aftur á móti mælir með ferkantaðri mynd í stærð 1080×1080 sem er sköluð niður um tæplega helming þegar hún kemur lesendum fyrir sjónir. Twitter skalar ekki myndir með færslum, þær eru alltaf geymdar sem 440×220 og síðan stækkaðar eða minnkaðar eftir þörfum á síðunni.

Væri ekki tilvalið að prófa þetta þegar flottu flugumyndirnar verða settar inn á Febrúarflugur í næsta mánuði?

fos_feb2017

Bakgrunnur

Góð ljósmynd getur laðað fram tilfinningar, aðdáun og áhuga. Að sama skapi getur léleg mynd, virkað fráhrindandi og orðið til þess að gott myndefni veki enga athygli. Það leynir sér ekkert þegar myndabankarnir mínir eru skoðaðir, t.d. á Instagram, að ég hef helst áhuga á myndefni þar sem veiðiflugur eða landslag er viðfangsefnið. Þegar kemur að því að taka myndir af veiðiflugum, þá finnst mér skipta miklu máli að velja viðeigandi bakgrunn til að laða fram hughrif.

Ef ég sækist eftir ljósmynd sem á að sýna fluguna nákvæmlega eins og hún er, þá reyni ég að hafa bakgrunn myndarinnar sem hlutlausastan. Hvítur bakgrunnur er alltaf í ákveðnu uppáhaldi hjá mér, en stundum er erfitt að ná hvítu hvítt og því getur verið ráð að hafa hann ljósbláan eða grænan. Umfram allt reyni ég að hafa bakgrunninn ekki of ögrandi, hann má ekki draga athyglina frá flugunni.

fos_peacock_big

Ef ég er aftur á móti að setja upp stemmningsmynd af flugu, eitthvað sem á að laða áhorfandann að, þá nota ég stundum kork, blaðsíðu úr bók eða einfaldlega svamp sem ég get stungið flugunni í. Umfram allt reyni ég að hafa bakgrunninn einsleitan og ekki troðfullan af litum.

fos_higas_svort_raud

Illa misheppnuð mynd af annars ágætri flugu hefur neikvæð áhrif á áhorfandann og er ekki til þess fallinn að fá mörg like á myndasíðum. Dæmi um slíka mynd er hér að neðan, þar sem ég fór greinilega hamförum í bakgrunninum og flugan geldur verulega fyrir það auk þess sem skott flugunnar fellur óþarflega mikið inn í bakgrunninn. Þarna hefði mér verið nær að velja hlutlausari bakgrunn, kápan á þessari uppáhalds veiðibók minni er allt of ögrandi, ber fluguna eiginlega ofurliði.

fos_blackzulu_feb_big

Þetta eru mögulega einhverjir punktar sem vert er að hafa í huga þegar ég tek myndir af flugunum sem ég ætla að setja inn á Febrúarflugur í næsta mánuði.