Veiðitölur og önnur tákn

Nú hefur aðeins verið bætt í upplýsingar á vötnunum hér á síðunni. Nýjasta viðbótin er veiðitölur síðustu ára eins og þær hafa verið skráðar í veiðibækur og skilað inn til Hafró / Fiskistofu. Svipist því um eftir þessari táknmynd

og prófið að smella á hana. Þegar hafa verið settar inn veiðitölur fyrir 30 vötn og von er á fleirum á næstu vikum.

Annað slagið hefur FOS borist fyrirspurn um ákveðnar upplýsingar um veiðivötnin á síðunni og í mörgum tilfellum eru þær upplýsingar þegar til staðar og eiga sér yfirleitt ákveðna táknmynd sem unnt er að smella á til að nálgast þær. Til að hnykkja á þeim helstu, þá má lesa sér til um þær hér að neðan.

Veiðikort FOS.IS af vatninu
Önnur vötn á sama svæði
Veiðiferðir FOS.IS í viðkomandi vatn
Dýptarkort
Dýptarkort frá Orkustofnun af vatninu
Veðurathuganir frá Veðurstofunni
Verðurspá fyrir vatnið frá Windy
Veðurspá frá Bliku fyrir vatnið
Veðurspá frá YR.NO fyrir vatnið
Veðurstöð
Staðbundin veðurstöð við vatnið
Myndavél
Vefmyndavél við eða í grend við vatnið
Tengill á bækling eða lesefni um vatnið

Það er von okkar að þessar leiðbeiningar komi veiðimönnum að góðum notum þegar stefnt er á ákveðinn eða leitað að heppilegum veiðistað fyrir næstu ferð.

Áttu veiðitölur?

Á FOS.IS er að finna upplýsingar um nær 100 vötn á Íslandi og nú höfum við hug á að bæta við þær upplýsingar allverulega. Við höfum viðað að okkur upplýsingum um árlega heildarveiði úr nokkrum fjölda þeirra vatna sem finna má á síðunni, en töluvert vantar enn upp á. Ef svo heppilega vill til að þú lesandi góður, lumir á veiðitölum úr einhverju því vatni sem finna má hér á síðunni og ert tilbúinn að deila þeim upplýsingum með okkur, þætti okkur vænt um að þú sendir okkur þær á tölvupósti á fos(hjá)fos.is

Við erum m.a. að eltast við veiðitölur úr eftirtöldum vötnum; Dratthalavatni (Stóraverslóni) – Elliðavatni – Eyrarvatni í Svínadal, Fellsendavatni, Geitabergsvatni, Gíslholtsvatni, Glammastaðavatni, vötnunum á Skagaheiði, Hafravatni, Haukadalsvatni, Hópi, Hlíðarvatni í Hnappadal, Hlíðarvatni í Selvogi, Hraunsfjarðarvatni, Hraunsfirði, Kleifarvatni, Langavatni á Mýrum, Meðalfellsvatni, Sauðafellsvatni, Sporðöldulóni, Vatnsdalsvatni, Vífilsstaðavatni og Þórisvatni. 

Í gær var 1. apríl

Í gær var 1. apríl og ég gat ekki stillt mig um að bæta smá bulli við greinina um Sleppingar og veiði sem birtist hér. Niðurlag greinarinnar var í tilefni dagsins og því ættu veiðimenn að fara varlega í að stóla á aukna veiði þó þeir séu í nýjum vöðlum.

fos_veidiv_afli_vodlur

Annað í greininni á sér þó einhvern rökstuðning í raunverulegum tölum.

Smá viðbót

Nú eru allar myndirnar sem komu fram í hópinum á Facebook og á Instagram komnar inn í myndasafnið hér á síðunni. Það reynið aðeins á þolinmæðina ef þið viljið skoða safnið því það tekur smá tíma fyrir rúmlega 1430 myndir að raðast upp. Vinsamlegast athugið að safnið opnast aldrei í sömu röð, þannig að það getur orðið smá leit að einni ákveðinni flugu eða verkum einhvers eins af þeim 192 hnýturum sem lögðu sitt að mörkum að gera síðasta mánuð einn skemmtilegasta mánuður ársins eins og einn þeirra komast að orði í kveðju sem hann sendi FOS.IS

FOS.IS er þegar farið að dreyma um 22022 og hvað við getum gert skemmtilegt á næsta ári, vonandi saman í raunveruleikanum, ekki aðeins á vefnum.

Lokafréttir Febrúarflugna 2021

Nú er Febrúarflugum lokið að þessu sinni. Það má eiginlega segja að þátttakendur hafi farið á kostum síðustu daga mánaðarins og það beinlínis streymdu inn flugur og nýir þátttakendur á hverjum degi.

Að lokum fóru leikar svo að alls bárust 1.430 flugur / myndir inn í mánuðinum, meðlimum hópsins á Facebook fjölgaði snarlega upp í 952 og á endanum voru það 192 hnýtarar sem lögðu til flugur í mánuðinum.

Íslendingum er tamt að hampa hópíþróttum á góðum degi, fótbolta-, handbolta- og körfubolaliðum. Ef við heimfærum þann fjölda sem lagði sitt að mörkum í febrúar, þá má smala saman í nokkur slík lið og hefði það eflaust þótt fréttaefni.

FOS.IS hefur lengi staðið í þeirri trú að fjöldi hnýtara væri töluvert meiri en almennt væri talið og það væri mjög orðum aukið að fluguhnýtingar væru deyjandi á Íslandi. Eigum við eitthvað að ræða þann fjölda sem tók þátt í Febrúarflugum 2021 eða þann fjölda af flugum sem komu fram í mánuðinum?

Ekki má gleyma styrktaraðilum Febrúarflugna, þeir fóru á kostum og gerðu okkur kleyft að draga út nöfn 27 heppinna hnýtara sem hlutu viðurkenningar fyrir sitt framlag í ár. Nöfn og viðurkenningar hafa verið birtar í hópinum á Facebook og samband verið haft við styrktaraðilana. Enn og aftur, kærar þakkir fyrir stuðninginn þetta árið.

FOS.IS er fyrst og fremst þakklæti í huga, en líka örlítill aðgerðarkvíði. Sökum ýmissa anna hefur myndasafnið með flugum ársins ekki verið uppfært hér á síðunni í 3-4 daga og það er töluverður haugur af myndum sem bíður vinnslu og innsetningar. Vonandi tekst okkur að ljúka þeirri vinnu á morgun og þá uppfærum við myndasafnið þannig að það verður hægt að skoða allar flugurnar á einum stað.

Það er von okkar að meðlimir hópsins og allur sá fjöldi sem fylgdist með átakinu hér á FOS.IS hafi haft jafn gaman að þessu eins og við. Þetta var frábær mánuður, takk fyrir þátttökuna.

Fréttir af Febrúarflugum

FOS.IS má bara til með að hrósa meðlimum Febrúarflugna þetta árið, öllum 915 meðlimum hópsins og þeim 161 hnýtara sem hafa lagt til meistarastykki í mánuðinum.

Við vorum rétt í þessu að hlaða inn nýjum myndum sem hafa komið síðustu daga og nú eru allar 1.041 flugumyndirnar komnar inn á myndasafnið hér á síðunni. Það langt því frá að gamanið sé búið, það eru fjórir heilir dagar eftir af febrúar og enn hlaðast inn flugur og nýir þátttakendur bætast í hópinn á hverjum degi.

Eitt af því sem er hve ánægjulegast er að meðlimir hópsins hafa sýnt frábært viðbrögð við flugum hvers annars. Það eru örugglega ekki margir hópar á Facebook af þessari stærðargráðu sem státa af 32.304 like‘s á innan við mánuði og ummælin sem skráð hafa verið eru nú að nálgast 2.000

Svo hrósum við auðvitað styrktaraðilum okkar sérstaklega sem gera okkur kleift að veita heppnum hnýturum viðurkenningar í lok mánaðarins:

Cats Wisker

Veiðihár kattarins hefur verið í hópi vinsælustu vatnaveiðiflugna Bretlandseyja frá því hún kom fram árið 1985. Upphaflega notaði höfundur hennar, David Train, veiðihár af heimiliskettinum til að stífa marabou vænginn þannig að hann vefðist ekki um legginn. Grínverjar hafa síðan komið með þá sögu að nær allir kettir á Bretlandi hafi verið orðnir sköllóttir í framan og því hafi David hafi neyðst til að breyta uppskriftinni lítillega, slíkar voru vinsældir flugunnar.

Upphafalega voru hvorki vaskakeðja né önnur augu á þessari flugu, en fljótlega bættust þau við og nú er svo komið að flugan er til með öllum mögulegum útfærslum höfuðskrauts.

Þessi fluga hefur gefist mér vel í vatnaveiði hér heima snemmsumars og síðla sumars þegar skyggja tekur. Á drungalegum sumardögum hefur hún gert skemmtilega hluti og ekki er hún síðri þegar urriðinn liggur djúpt og chartreuse liturinn nýtir sín best.

Höfundur: David Train
Öngull: straumfluguöngull 6 – 12
Þráður: hvítur
Skott: hvítt marabou (UV marabou ef vill)
Búkur: ljómandi lime grænt Fritz eða sambærilegt chartreuse litað efni
Vængur: hvítt marabou (UV marabou ef vill)
Haus: kúla, vaskakeðja, dumbbell eða einfaldlega úr hnýtingarþræði

Fréttir af Febrúarflugum

Í gærkvöldi fóru flugurnar / myndirnar yfir 700 sem eru komnar inn á Febrúarflugur, bæði á Facebook og hér á síðunni. Meðlimir hópsins eru orðnir 865 og fjölgar dag, frá degi. Að gamni kíktum við á heimsóknartölurnar inn á myndasafnið hér á síðunni og svo skemmtilega vildi til að þær voru einmitt 2021 það sem af er og það eru u.þ.b. 8000 heimsóknir komnar inn á flugubankann okkar hérna á síðunni í febrúar.

FOS.IS gerði smá tilraun á mánudagskvöldið og opnaði Hnýtingaherbergi á Facebook frá kl.19 og fram til kl.22. Um og yfir 20 meðlimir Febrúarflugna litu við, hnýttu flugur eða voru bara að forvitnast hvað væri í gangi. Væntanlega gerum við þetta aftur innan skamms, enda létt og lipurt að stilla vefmyndavélinni upp og leyfa henni að rúlla á meðan við bætum í boxið fyrir næsta sumar.

Fréttir af Febrúarflugum

Hver hefði trúað því að það séu slétt 70 ár á milli hnýtaranna sem standa á bak við þessar tvær flugur sem komu inn á Febrúarflugur í dag, en það er nú samt svo.

Þessa flugu hnýtti Hilmar Þór 11 ára og setti inn á Febrúarflugur í dag. Hilmar hefur hrifið meðlimi Febrúarflugna þetta árið með flottum flugum. Sannanlega efnilegur hnýtari hér á ferðinni.

Góðvinur FOS.IS og Febrúarflugna, Stefán Bjarni Hjaltested fangar 81 árs afmælisdegi sínum í dag, en það kom ekki í veg fyrir að hann setti þessa flugu inn í dag.

Annars er það að frétta af Febrúarflugum að fimmhundraðasta innleggið kemur að öllum líkindum inn í kvöld (fimmtudagskvöld). Meðlimum hópsins fjölgar sífellt og telja nú 821 og nýir meðlimir eru ótrúlega duglegir að setja inn myndir, það er gróska í fluguhnýtingum.

FOS.IS stendur fyrir tilraun n.k. mánudag þegar við ætlum að prófa að opna Hnýtingaherbergi með Facebook Room í hópinum. Tilgangurinn er að skapa vettvang þar sem hnýtarar geta án mikillar fyrirhafnar hitt aðra hnýtara á netinu, mögulega sett í nokkrar flugur, kastað fram fyrirspurnum eða hverju því sem þeim dettur í hug. Ef vel tekst til, þá gæti þetta orðið að reglulegum viðburði í hópi Febrúarflugna.

 

10.02.21 1.000.000

Undarleg fyrirsögn og ekki sú fyrsta hér á síðunni. Í dag er 10. febrúar 2021 og talan á bak við dagsetninguna er fjöldi heimsókna á vefinn frá því hann fór í loftið 21.05.2010

Aldrei hefði mig grunað að þetta pár mitt næði þessu flugi og nyti þess að vera með 873 áskrifendur á síðunni sjálfri, 673 fylgjendur á Facebook og 693 á Instagram.

Takk fyrir samfylgdina og þessar milljón heimsóknir á liðnum árum.
Kristján Friðriksson

Fréttir af Febrúarflugum

Nú er rétt tæp vika liðin af Febrúarflugum og flugurnar eru komnar vel yfir 300 og meðlimum hópsins hefur fjölgað úr 700 í 796. Af þessum 796 meðlimum hópsins á Facebook hafa rúmlega 90 sett inn myndir af flugum, þeir duglegustu á hverjum degi, aðrir eitthvað færri. Það er e.t.v. ekki fjöldinn sem skiptir máli, en vissulega alltaf gaman að sjá sem flestar flugur af öllum mögulegum gerðum.

Það er áberandi hve yngri meðlimum hefur hlutfallslega fjölgað mest það sem af er mánaðarins. Þetta gleður FOS.IS alveg sérstaklega því þetta er skýrt merki þess að það er bjart, ef ekki skjannabjart, framundan í fluguhnýtingum á Íslandi. Eina sem mætti mögulega setja út á í þessum tölum er rýr hlutur kvenna. Við þykjumst vita að mun fleiri konur hnýti flugur heldur en þessi 5% og það væri gaman að sjá fleiri í hópinum.

Viðbrögð þeirra sem fylgjast með framlagi hnýtara hafa heldur ekki látið á sér standa. Vinsælustu færslurnar hafa fengið allt að 120 þumla og yfir 20 ummæli, öll vinsamleg og uppbyggjandi.

Eins og endranær er flugunum bætt inn í myndasafn á FOS.IS nokkuð reglulega þannig að fleiri en Facebook notendur geti notið þeirra meistarastykkja sem koma fram í mánuðinum.

Fréttir af Febrúarflugum

Það var með ólíkindum hvernig fyrstu dagurinn í Febrúarflugum æddi áfram. Rétt fyrir miðnættið voru 52 flugur komnar inn í hópinn og þátttakendum fjölgaði snarlega úr 700 í 732. Frábærar undirtektir og greinilega mikil stemming í hnýturum.

Við munum uppfæra FOS.IS reglulega með myndum af Facebook og nú er fyrsti skammturinn kominn inn á myndasíðu Febrúarflugna 2021 hér á síðunni. Þannig gefst þeim sem ekki eru á Facebook einnig kostur á að fylgjast með framvindunni.

Svo má ekki gleyma Instagram þar sem hnýtarar merkja flugur sínar með #febrúarflugur og/eða #februarflugur

Fyrri Febrúarflugur

Í dag er föstudagurinn fyrir Febrúarflugur og eflaust er einhverja farið að klæja í að setja inn myndir á mánudaginn þegar Febrúarflugur 2021 hefjast. Það væri e.t.v. tilvalið að renna í gegnum Febrúarflugur fyrri ára, velja sér einhverja árennilega og æfa sig um helgina. Með því að smella á myndirnar hér að neðan má sjá allar flugurnar sem þátttakendur hafa lagt fram í átakinu frá byrjun, að fyrsta árinu undanskildu.

Styrktaraðilar átaksins hafa ekki látið sitt eftir liggja og brugðist einstaklega vel við þetta árið. Viðurkenningarnar sem verða dregnar út í lok febrúar hafa trúlega aldrei verið jafn rausnarlegar og nýir styrktaraðilar bæst í hóp þeirra sem stutt hafa við bakið á átakinu frá byrjun. FOS.IS mun kynna styrktaraðila ársins til leiks með hefðbundnum hætti strax eftir helgi, enn eiga nokkrir þeirra eftir að svara sníkjupóstinum okkar og því ekki tímabært að upplýsa um alla sem styðja við bakið á okkur og gera okkur kleift að sýna hnýturunum þakklætisvott fyrir þátttökuna.

Umfram allt er þetta þó átak / vettvangur / tækifæri fyrir einstaklinga að sýna handverkið sitt, sækja sér leiðbeiningar og álit annarra hnýtara á því sem hver og einn leggur fram í eigin nafni.

FOS.IS verður í snurfusi og ýmsu stússi um helgina til undirbúnings en vonandi gefst færi á að setja í nokkrar flugur, vaka til kl.00:01 á sunnudagskvöldið og sjá fyrstu flugurnar detta inn á Fésbókarsíðu átaksins.

Í lok árs

Nú líður að lokum þessa 10. árs sem FOS.IS hefur verið í loftinu. Þetta hefur verið bæði viðburðaríkt og sérstakt afmælisár svo ekki sé meira sagt. Ef það er eitthvað sem þetta ár hefur kennt manni, þá er það að meta alla litlu hlutina sem undir venjulegum kringumstæðum væru sjálfsagðir.

Þegar þetta brölt mitt fór af stað var tilgangurinn í raun sá einn að halda utan um veiðiferðir, skrá afla, það agn sem fiskurinn tók, tíðarfar og þar fram eftir götunum. Þessar færslur eru nú orðnar í miklum minnihluta þess efnis sem birtist á síðunni og á nýju ári er eins líklegt að snið þeirra breytist eitthvað, það þykir víst ekki lengur smart að geta afla í veiðisögum nú til dags.

Eins og sjá má á myndinni hér að ofan, þá hefur verið nokkuð jafn stígandi í heimsóknum á síðuna þessi 10 ár, ef undan eru skilið árin 2016 og svo það ár sem nú er að líða með rétt um 195.000 heimsóknir. Í einhverju gamni lét ég það út úr mér í upphafi þessa árs að það væri nú gaman að geta rofið milljóna múrinn á árinu, en það skeikaði svo nam 15.000 heimsóknum. Eins og segir; það gengur bara betur næst og ef að líkum lætur skríður heimsóknatalan yfir milljónina fljótlega upp úr áramótunum.

Síðan tók smávægilegum breytingum á árinu, ekkert stórkostlegum þó. Fjöldi greina var svipaður og síðustu ár og það sama má segja um efnistökin. Þau hafa verið og halda áfram að vera það sem mér dettur í hug að setja í orð út frá eigin reynslu og tilraunum.

Febrúarflugur voru að vanda í samnefndum mánuði og tókust frábærlega. Aldrei hafa fleiri fylgst með, aldrei hafa fleiri sótt viðburði sem tengdust átakinu og aldrei hafa jafn margar flugur verið settar inn á hópinn á Facebook og þar með hér á síðuna. Kosturinn við Febrúarflugur er að fjöldatakmarkanir ættu að hafa lítil sem engin áhrif á þátttökuna og það er staðfest að næsta átak hefst 1. febrúar 2021 og stendur til 28. febrúar, sama hvaða sóttvarnarreglur verða í gildi.

Fastur liður á þessum degi ár hvert hefur verið að ýta nýju ári úr vör með dagatali komandi ársins sem jafnframt þjónar lesendum sem flóðatafla árdegis- og síðdegisflóða, tímasetningu sólriss og sólarlags, sem og stöðu tungls og þar með stærsta straums. Dagatalið eða flóðatöfluna má nálgast með því að smella hérna.

Að þessu sögðu óska ég lesendum FOS.IS gleðilegast nýs veiðiárs og þakka ykkur öllum kærlega fyrir samfylgdina á árinu sem er að líða.

24. desember

Ljómandi fallegar bleikar marabou fjaðrir komu úr þessum síðasta dagatalspakka ársins. Uggagæir ku vera afbrigði af jólasveini, meiri gæi heldur gægir og virðist í nokkuð nánu sambandi við veiðifélaga minn sem á þessum árstíma fer að sverma fyrir bleikum Nobbler.